Tsholofetso ya bobedi mo go Iseraele
1Gape lefoko la Jehofa la tla mo go Jeremia lwa bobedi, a sa ntse a tswaletswe mo lwapeng lwa balebedi, la re: 2“Go bua jaana Jehofa yo o dirang se, Jehofa yo o se bopang go tla a se tlhomamisa, Jehofa ke leina la gagwe. 3Mpitsa, mme ke tlaa go araba, ke go supetsa dilo tse dikgolo, le tse di thata tse o sa di itseng. 4Gonne Jehofa, Modimo wa Iseraele, o bua jaana, a re: Ka ga matlo a motse o, le ka ga matlo a dikgosi tsa Juta, a a rutlilweng go tla ba dira ka one dikago tsa go tilela ba dimota tsa ntwa le ba tšhaka. 5Ba tla go tlhabana le Bakalatea, e be e le go di tlatsa ditoto tsa batho, ba ke ba bolaileng mo bogaleng jwa me, le mo tšararegong ya me, le ba ke subetseng motse o sefatlhogo sa me, ka ntlha ya boikepo jotlhe jwa bone.
6“Bona, ke tlaa o leretse go fola le phodiso, le bone ke tlaa ba fodisa; mme ke tlaa ba senolela letlotlo la kagiso le boammaruri. 7Ke tlaa busa botshwaro jwa Juta le botshwaro jwa Iseraele, mme ke tlaa ba aga, jaaka ga ntlha. 8Ke tlaa ba ntlafatsa mo boikepong jotlhe jwa bone, jo ba nteofetseng ka jone; ke tlaa ba itshwarela maikepo otlhe a bone, a ba nteofetseng ka one, le a ba ntloletseng ka one. 9Motse o, o tlaa nna mo go nna leina la boitumelo, le pako le kgalalelo, fa pele ga merafe yotlhe ya lefatshe, e e tlaa utlwelang molemo otlhe o ke o ba direlang, e e tlaa boifang e ba e roromela molemo otlhe le kagiso yotlhe e ke e ba direlang.”
10Jehofa o bua jaana, a re: “Gape mo felong fa lo buang ka ga gone lo re: ‘Go kgakgabetse, go se na motho, go se na kgomo,’ e bong mo metseng ya Juta le mo mebileng ya Jerusalema, e e swafetseng, e se na motho, e se na monni, e se na kgomo; 11go tlaa ba go utlwala teng modumo wa boitumelo le modumo wa boipelo, lentswe la monyadi le lentswe la monyadwi, le lentswe la ba ba reng:
“ ‘Bakang Jehofa wa masomosomo,
gonne Jehofa wa molemo,
gonne boutlwelobotlhoko jwa gagwe
bo eme ka bosakhutleng’;
“le modumo wa ba ba lereng ditlhabelo tsa tebogo mo ntlong ya ga Jehofa. Gonne ke tlaa busa botshwaro jwa lefatshe jaaka ga ntlha, go bua Jehofa.
12“Jehofa wa masomosomo o bua jaana, a re: Gape go tlaa ba go nna mo felong fa go kgakgabetseng, go se na motho go se na kgomo, le mo metseng yotlhe ya teng, go tlaa nama go nna boago jwa badisa ba ba bothisang matsomane a bone teng. 13Mo metseng ya lefatshe la makgabana, le mo metseng ya kwa sekhuting, le mo metseng ya Borwa, le mo lefatsheng la Benjamine, le mo mafelong a a mo tikologong ya Jerusalema, le mo metseng ya Juta, matsomane a tlaa ba a feta ka fa tlase ga diatla tsa yo o a balang, go bua Jehofa.
14“Bonang metlha e etla,” go bua Jehofa, “e ke tlaa dirafatsang ka yone lefoko le le molemo leo, le ke le buileng ka ga ntlo ya Iseraele le ka ga ntlo ya Juta.
15“Mo metlheng eo,
le ka lobaka loo,
ke tlaa tlhogisetsa Dafite
Letlhogele la tshiamo;
mme o tlaa dirafatsa katlholo
le tshiamo mo lefatsheng.
16Mo metlheng eo
Juta o tlaa bolokwa,
le Jerusalema
o tlaa nna mo polokegong;
le ke lone leina
le o tlaa bidiwang ka lone,
go twe,
‘Jehofa ke tshiamo ya rona.’
17“Gonne Jehofa o bua jaana, a re: Dafite ga a ketla a tlhoka monna gope yo o dulang mo setulong sa bogosi sa ntlo ya Iseraele; 18le gone baperesiti ba Balefi ga ba ketla ba tlhoka monna fa pele ga me yo o isang ditshupelo tse di fisiwang, le yo o fisang diromololo, le yo o dirang setlhabelo ka gale le ka gale.”
19Lefoko la ga Jehofa la tla mo go Jeremia, la re: 20“Jehofa o bua jaana, a re: Fa lo ka senya kgolagano ya me ya motshegare, le kgolagano ya me ya bosigo, gore go se ka ga nna motshegare le bosigo mo metlheng ya tsone; 21foo le yone kgolagano ya me le Dafite motlhanka wa me, e ka senyega, a ba a tla a tlhoka ngwana wa mosimane yo o tlaa busang mo setulong sa gagwe sa bogosi; le yone kgolagano ya me le Balefi ba baperesiti, badiredi ba me. 22Jaaka bontsintsi jwa legodimo bo sa kake jwa balwa, le fa e le mošawa wa lewatle go lekanngwa; ke tlaa ntsifatsa losika lwa ga Dafite motlhanka wa me jalo, le Balefi ba ba ntirelang.”
23Lefoko la ga Jehofa la tla mo go Jeremia, la re: 24“A ga o akanye se batho ba, ba se buileng, ba re: ‘Ditshika tse pedi tse Jehofa o kileng a di itshenkela, o di latlhile?’ Boo ba nyatsa batho ba me jalo, gore ba se ka ba tlhola ba nna morafe fa pele ga bone. 25Jehofa o bua jaana, a re: Fa kgolagano ya me ya motshegare le ya bosigo e sa eme, fa ke sa tlhoma melao ya legodimo le lefatshe; 26foo le gone ke tlaa latlha losika lwa ga Jakobe, le lwa ga Dafite motlhanka wa me, ke ba ke tla ke gana go tsaya ba losika lwa gagwe go nna babusi ba losika lwa ga Aberahame, le Isake, le Jakobe; gonne ke tlaa dira gore botshwaro jwa bone bo busiwe, mme ke tlaa ba utlwela botlhoko.”
