Go fenngwa ga Jerusalema go bolelelwapele
1Lefoko le le tsileng mo go Jeremia le tswa kwa go Jehofa, jale ka kgosi Setekia a roma Pašure morwa Malekia kwa go ene, le Sefania morwa Maaseia moperesiti, a re: 2“Ke a go rapela, o re boletse mo go Jehofa; gonne Nebukateresare kgosi ya Babilone o re epela dira; e tlaa re gongwe Jehofa a re direle ka fa ditirong tsa gagwe tsotlhe tse di gakgamatsang, gore a tle a tloge mo go rona.”
3Foo Jeremia a ba raya, a re: “Lo tlaa raya Setekia jaana, lo re: 4‘Go bua jaana Jehofa Modimo wa Iseraele, a re: Bonang, dibolao tse lo di tshotseng, tse lo tlhabanang ka tsone kwa ntle ga dithako, lo tlhabana le kgosi ya Babilone le Bakalatea ba ba lo tlhaselang, ke tlaa di busa ka morago, ke tlaa di kokoanya mo gare ga motse o. 5Nna ka nosi ke tlaa tlhabana le lona ka seatla se se otlolotsweng, le ka letsogo le le thata, e bong ka bogale, le ka tšararego, le ka tšhakgalo e kgolo. 6Ke tla kgemetha banni ba motse o, motho le kgomo; mme ba tlaa gailwa ka kgogodi e kgolo. 7Morago ga moo, go bua Jehofa, Setekia kgosi ya Juta, le batlhanka ba gagwe, le batho ba gagwe, e bong ba ba tlogetsweng mo motseng o ke kgogodi, le ke tšhaka, le ke popamo, ke tlaa ba tsenya mo seatleng sa ga Nebukateresare kgosi ya Babilone, le mo seatleng sa baba ba bone, le mo seatleng sa ba ba senkang botshelo jwa bone; mme o tlaa ba kgemetha ka bogale jwa tšhaka; ga a ketla a ba rekegela, le fa e le go ba tlhomogela pelo, le fa e le go ba utlwela botlhoko.’
8“O reye tšhaba e, o re: ‘Jehofa o bua jaana, a re: Bonang, ke baya fa pele ga lona tsela ya botshelo le tsela ya loso. 9Yo o salang mo motseng o, o tlaa swa ka tšhaka, le ka popamo, le ka kgogodi; mme ene yo o tswelang kwa ntle, a ya go wela mo go Bakalatea ba ba lo tlhaselang, o tlaa tshela, mme botshelo jwa gagwe e tlaa nna thopo mo go ene. 10Gonne ke lebile motse o, go o direla bosula, e seng molemo, go bua Jehofa; o tlaa tsenngwa mo seatleng sa kgosi ya Babilone, mme o tlaa o fisa ka molelo.’
Katlholo ya ntlo e tona ya bogosi ya Juta
11“Ka ga ba ntlo ya kgosi ya Juta, o re: ‘Utlwang lefoko la ga Jehofa: 12Lona ba ntlo ya ga Dafite, go bua Jehofa, a re: Dirafatsang tshiamiso mo mosong, lo golole ba ba thopilweng mo seatleng sa mopatiki, ka tšararego ya me e ka tla ya tswela kwa ntle jaaka molelo, mme ya fisa go tsamaye go se nne ope yo o ka e timang, ka ntlha ya bosula jwa ditiro tsa lona. 13Bona, ke tlhabana nao, wena monni wa molapo, le wa lefika la lobala, go bua Jehofa; lona ba lo reng: E mang yo o tlaa fologang a tla go re tlhasela? Kgotsa e mang yo o tlaa tsenang mo mannong a rona? 14Ke tlaa lo betsa ka fa loungong lwa ditiro tsa lona, go bua Jehofa; ke tlaa tukisa molelo mo sekgweng sa gagwe, mme o tlaa laila gotlhe mo go mo tikologong ya gagwe.’ ”
