JEREMIA 13

₁Jehofa o ntheile jaana, a re: “Ya o ithekele moitlamo wa leloba, mme o itlame ka one mo lothekeng, mme o se ka wa o tsenya mo metsing.” ₂Jalo ka reka moitlamo, ka fa lefokong la ga Jehofa, ka itlama ka one mo lothekeng.

₃Lefoko la ga Jehofa la tla kwa go nna lwa bobedi, la re: ₄“Tsaya moitlamo o o o rekileng, o o mo lothekeng lwa gago, mme o nanoge, o ye kwa Euferatese, mme o o fitlhe gone mo lofarong lwa lefika.” ₅Mme ka ya ka o fitlha fa Euferatese, jaaka Jehofa a ntaotse.

₆Ga dirala e rile malatsi a le mantsi a sena go feta, Jehofa a nthaya a re: “Nanoga o ye kwa Euferatese, mme o tlose moitlamo teng o ke o go laoletseng gore o o fitlhe teng.” ₇Foo ka ya Euferatese, mme ka epa, ka tlosa moitlamo mo felong fa ke ne ke o fitlhile teng; mme bonang, moitlamo o ne o senyegile, o se na tiro.

₈Foo lefoko la ga Jehofa la tla kwa go nna, la re: ₉“Go bua jaana Jehofa, a re: ‘Ke tlaa senya boikgodiso jwa Juta ka mokgwa o o ntseng jaana, le boikgodiso jo bogolo jwa Jerusalema. ₁₀Tšhaba e e bosula e, e e ganang go utlwa mafoko a me, e sepela ka fa logwading lwa pelo ya yone, mme e ile go sala medimo e sele morago, e ya go e direla, le go e obamela, e tlaa nna fela jaaka moitlamo o, o o se nang tiro. ₁₁Gonne jaaka moitlamo o tle o ngaparele lotheka lwa monna, le nna ke dirile gore botlhe ba ntlo ya Iseraele, le botlhe ba ntlo ya Juta ba ngaparele nna,’ go bua Jehofa; ‘gore ba tle ba nne tšhaba e e mo go nna, le leina, le pako, le kgalalelo; mme ba ganne go utlwa.’

₁₂“Ke gone o bue nabo lefoko le, o re: ‘Go bua jaana Jehofa, Modimo wa Iseraele, a re: Nkgwana nngwe le nngwe e tlaa thelwa bojalwa e tlala;’ mme ba tlaa go raya ba re: ‘A ga re itse fa nkgwana nngwe le nngwe e tlaa thelwa bojalwa e tlala?’ ₁₃Foo o tlaa ba raya o re: ‘Go bua jaana Jehofa, a re: Bonang, ke tlaa thela banni botlhe ba lefatshe le, e bong dikgosi tse di dutseng mo setulong sa bogosi sa ga Dafite, le baperesiti, le baperofeti, le banni botlhe ba Jerusalema, ke tlaa ba tlatsa botagwa. ₁₄Ke tlaa ba phatlakanya mongwe mo go yo mongwe, e bong borra batho le bana ba bone ba basimane mmogo, go bua Jehofa; ga nketla ke tlhomoga pelo, le fa e le go rekegela, le fa e le go ba utlwela botlhoko gore ke se ka ka ba senya.’ ”

₁₈Raya kgosi le mma kgosi, o re: “Lo ikokobetse, lo dule fa fatshe; gonne mekgabo ya ditlhogo tsa lona e fologile, e bong serwalo sa kgalalelo ya lona.” ₁₉Metse ya Borwa e tswalegile, mme ga go na ope yo o ka e bulang; Juta o isitswe botshwarong ka bojotlhe jwa gagwe; o isitswe botshwarong gotlhe fela.

₂₀“Tsholetsang matlho, lo bone ba ba tswang ntlheng ya botsheka; le kae letsomane le o le neilweng, letsomane la gago le lentle? ₂₁O tlaa reng mogang o bayang ditsala tsa gago tlhogo godimo ga gago? Ka o ba rutile ka wesi go tlhabana nao, a mahutsana ga a ketla a go tshwara, jaaka a mosadi a le mo pelegong? ₂₂Fa o bua mo pelong ya gago, o re: ‘Ke ka ntlha yang dilo tse di tsile mo go nna?’ Mesese ya gago e senotswe ka ntlha ya bogolo jwa boikepo jwa gago, le direthe tsa gago di utlwisiwa botlhoko. ₂₃A Moethiopia o ka iphetola letlalo, le fa e le nkwe ditshubaba tsa yone? Foo le lona lo ka dira molemo, lona ba lo lemetseng go dira bosula.

₂₄“Ke gone ka moo ke tlaa ba falatsang, jaaka dirine tse di fetelang koo ka phefo ya naga. ₂₅E ke yone kabelo ya gago, kabelo e o e lekanyeditsweng, e e tswang mo go nna,” go bua Jehofa; “gonne o ntebetse, mme wa ikanya maaka. ₂₆Ke gone ka moo le nna ke tlaa senolang mesese ya gago fa pele ga sefatlhogo sa gago, mme ditlhong tsa gago di tlaa bonala. ₂₇Ke bonye makgapha a gago, e bong dikgokafalo tsa gago, le dikgwankgwanyego tsa gago, boatla jwa boaka jwa gago, mo dithoteng mo nageng; a bo go latlhega wena Jerusalema! O gana go ntlafadiwa; e tlaa nama e nna goleele go le kaye?”