BAATLHODI 4

₁Bana ba Iseraele ba dira gape se se bosula mo ponong ya ga Jehofa, Ehute a sena go swa. ₂Mme Jehofa a ba rekisetsa mo seatleng sa ga Jabine kgosi ya Kanana, yo o ne a busa mo Hasore; yo kgosana ya ntwa ya gagwe e neng e le Sisera, yo o ne a agile mo Harošethe wa merafe. ₃Mme bana ba Iseraele ba goela kwa go Jehofa; gonne o ne a na le dikara tsa tlhabano tsa tshipi di le 900; mme a patika bana ba Iseraele ka thata ka dinyaga di le 20.

₄Jaana Debora moperofeti wa sesadi, mosadi wa ga Lapidothe, a bo a atlhola Iseraele ka lobaka loo. ₅O ne a agile fa tlase ga mokolane wa ga Debora, fa gare ga Rama le Bethele mo lefatsheng la makgabana la Eferaime. Bana ba Iseraele ba ne ba tle ba ye go atlholwa kwa go ene. ₆A roma a ya go bitsa Barake morwa Abinoame a le kwa Keteše-nafetali, a mo raya a re: “A Jehofa Modimo wa Iseraele ga a a laola, a re: ‘Ya o atamele kwa thabeng ya Tabore, o tseye batho ba le 10 000 tsa bana ba ga Nafetali le ba bana ba ga Sebulone? ₇Mme Sisera, kgosana ya ntwa ya ga Jabine ke tlaa mo gogela kwa go wena kwa nokeng ya Kišone, a na le dikara tsa gagwe le bontsi jwa gagwe jwa batho; mme ke tlaa mo tsenya mo seatleng sa gago.’ ” ₈Barake a mo raya a re: “Fa o tsamaya le nna, foo ke tla tsamaya; mme fa o gana go tsamaya le nna, ga nketla ke tsamaya.”

₉Debora a re: “Ruri ke tlaa tsamaya; le fa go ntse jalo, loeto lo o lo yang, ga lo ketla lo dirana le tlotlo mo go wena; gonne Jehofa o tlaa rekisetsa Sisera mo seatleng sa mosadi.” Debora a menoga a ya le Barake kwa Keteše. ₁₀Barake a phuthela ba Sebulune le ba Nafetali kwa Keteše; ga tsamaya nae batho ba le 10 000; Debora le ene a tsamaya nae.

₁₁Jaana Hebere wa Mokene o ne a kgaoganye le Bakene, e bong bana ba ga Hobabe mogwagadi wa ga Moše, mme o na a tlhomile mogope wa gagwe go ya go fitlha kwa mookeng mo Saanenime, o o fa Keteše.

₁₂Ba bolelela Sisera fa Barake morwa Ahinoame a ile kwa thabeng ya Tabore. ₁₃Sisera a phutha dikara tsa gagwe tsotlhe fela, e bong dikara tsa tshipi tse di 900, le batho botlhe ba o nang nabo, go tswa Harošethe wa merafe go ya nokeng ya Kišone.

₁₄Debora a raya Barake a re: “Nanoga; gonne letsatsi leno ke lone le Jehofa o tsentseng Sisera mo seatleng sa gago ka lone; a Jehofa ga a a bolola fa pele ga gago?” Jalo Barake a fologa thaba ya Tabore le batho ba ba 10 000 ba mo setse morago. ₁₅Jehofa a feretlha Sisera ka bojetla jwa tšhaka fa pele ga Barake, le dikara tsotlhe tsa gagwe, le ntwa yotlhe ya gagwe; mme Sisera a phola mo kareng ya gagwe, a tshaba ka dinao. ₁₆Barake a konatelela dikara le ntwa go ya Harošethe wa merafe; mme ntwa yotlhe ya ga Sisera ya wa ka wa tšhaka; ga go a ka ga sala motho ope.

₁₇Mme le fa go ntse jalo Sisera a tshaba ka dinao a ya kwa mogopeng wa ga Jaele, mosadi wa ga Hebere wa Mokene; gonne go ne go le kagiso gare ga Jabine kgosi ya Hasore le kgotla ya ga Hebere wa Mokene. ₁₈Jaele a tswa a ya go kgatlhantsha Sisera, a mo raya a re: “Tsena, morena wa me, tsena kwa go nna; o se ka wa boifa.” Mme a tsena kwa go ene mo mogopeng, mme a mmipa ka kobo. ₁₉A raya mosadi a re: “A ko o nnose metsinyana; gonne ke bolailwe ke lenyora.” Mosadi a thibolola lekukana la maši a mo nosa, a itse go mmipa. ₂₀Sisera a mo raya a re: “Ema mo mojakong wa mogope wa gago, fa mongwe a tla a go botsa a re: ‘A go nale monna ongwe mono?’ o re, ‘Nnyaa.’ ”

₂₁Mme foo Jaele, mosadi wa ga Hebere, a tsaya lomapo lwa mogope, a ba a tsaya noto, a ya kwa go ene ka nyanyaelo, a kokothela lomapo mo matlhwaneng a gagwe, mme lwa mo phunyeletsa mo mmung; gonne o ne a tshwerwe ke boroko thata; mme a gonoga a swa. ₂₂Mme bonang, ya re Barake a konateletse Sisera, Jaele a tswa a ya go mo kgatlhantsha, a mo raya a re: “Ntlo, ke tlaa go supetsa monna yo o mo senkang.” A ya kwa go ene; a bona Sisera a namaletse a sule, lomapo lwa mogope lo le mo matlhwaneng a gagwe.

₂₃Jalo Modimo wa fenya Jabine kgosi ya Kanana ka tsatsi leo fa pele ga bana ba Iseraele. ₂₄Seatla sa bana ba Iseraele sa nna sa ya kwa pele go fenya Jabine kgosi ya Kanana, ga tsamaya ba senya Jabine kgosi ya Kanana.