Tlhagiso mo bahuming
1Helang tlheng lona bahumi, lo lele, lo bokolelele dilo tse di matladika tse di tlang go lo wela. 2Mahumo a lona a bodile, le diaparo tsa lona di jelwe ke motoutwane. 3Gouta ya lona e jelwe ke morodu, le selefera sa lona; morodu wa tsone o tlaa nna tshupo e e lo sekisang, o tlaa ja nama ya lona jaaka molelo. Lo ipoloketse khumo ya lona mo metlheng ya bofelo. 4Bonang, tuelo ya badiri ba ba segileng mabele a lona, e lo padileng ka yone ka tsietso, e a kua; le go gala ga ba ba robileng, go tsenye mo ditsebeng tsa Morena wa masomosomo. 5Lo ntse lo tshela ka monate mo letlepung, lwa ikgatlha; lo ikotlile dipelo mo letsatsing la polao. 6Lo sekisitse, lwa bolaya mosiami; a sa ganele le lona.
Bopelotelele le thapelo
7Ke gone, bagaetsho, lo nne pelotelele, go tsamaye Morena a tle. Bonang, molemi o tla a lebelele loungo lo lo tlhokegang lwa lefatshe, a le pelotelele mo go lona, go tsamaye lo bone pula ya sephai le ya kgogolammoko.
8Le lona lo nne pelotelele; lo itiise dipelo; gonne go tla ga Morena go gaufi. 9Bagaetsho, lo se ka lwa ngongoregalana, gore lo tle lo se ka lwa sekisiwa; bonang, moatlhodi o eme fa mojako. 10Bagaetsho, lo ipeele sekao sa boitshoko le bopelotelele, ka baperofeti ba ba kileng ba bua mo ineng la Morena. 11Bonang, re a tle re re, go sego ba ba kileng ba nna ba itshoka; lo utlwile ka ga bopelotelele jwa ga Jobe, mme lo bonye bofelelo jwa Morena jaaka Morena a tletse bopelotlhomogi, a le boutlwelobotlhoko.
12Bogolo go dilo tsotlhe, bagaetsho, lo se ka lwa ikana, le fa e le ka legodimo, le fa e le ka lefatshe, le fa e ka bo e le ka ikano nngwe e sele; a “Ee” ya lona e nne Ee, le “Nnyaa” ya lona e nne Nnyaa; gore lo tle lo se ka lwa wela mo tshekisong.
13A mongwe mo go lona o tlhokofetse? A a rapele. A mongwe o a itumela? A a opele pako. 14A mongwe mo go lona o a lwala? A a bitse bagolwane ba phuthego; mme a ba rapele fa go ene, ba mo tlotse lookwane mo ineng la Morena. 15Thapelo ya tumelo e tlaa boloka ene yo o lwalang, mme Morena o tlaa mo kakatlolola; fa a leofile, o tla go itshwarelwa. 16Ke gone lo ipolelelane dibe, lo rapelelane, gore lo tle lo fodisiwe. Mokokotlelo wa mosiami o thusa thata mo go direng ga one. 17Elija e ne e le motho yo o maikutlo a a tshwanang le a rona, mme a rapela ka thata gore pula e se ne; mme e se ka ya na mo lefatsheng ka dinyaga di le tharo le dikgwedi di le thataro. 18A ba a rapela gape; mme legodimo la nesa pula, le lefatshe la ungwa maungo a lone.
19Bagaetsho, fa mongwe mo go lona a timetswe ke boammaaruri, mme mongwe a mo sokolola; 20a a itse fa yo o sokololang moleofi mo timelong ya tsela ya gagwe, a tlaa golola mowa mo losong, a ba a bipa bontsi jwa dibe.
