JAKOBE 3

₁Bagaetsho, lo se ka lwa nna baruti lo le bantsi, ka lo itse fa rona baruti re tlaa bona tshekiso e e bokete bogolo. ₂Gonne re tle re kgopise rotlhe mo dilong di le dintsi. Fa mongwe a sa kgopise mo puong, yoo e be e le motho yo o itekanetseng, yo o nonofileng go kganela le one mmele otlhe. ₃Jaana fa re tsenya dipitse mogala mo ganong, gore di re utlwe; re bo re sokolola le mmele otlhe wa tsone. ₄Lebang le tsone dikepe, le fa di le dikgolo jalo, mme di kgweediwa ke diphefo tse di thata, le fa go ntse jalo di tle di sokololwe ka lomatsanyana, di isiwe kwa molaodi o ratang tsa ya teng. ₅Jalo loleme le lone ke tokololo e potlana, lo bolela dilo tse dikgolo ka go ipelafatsa. Bonang, sekgwa se segolo jang se se tshujwang ka molelo o le monnyennye! ₆Loleme ke molelo; lobopo lwa tshiamololo mo dinameng tsa rona ke loleme, lo e leng lone lo leswefatsang mmele otlhe, lo tshube tikologo yotlhe ya tlholego ya rona, mme lona lo bo lo tshubilwe ka molelo wa molete. ₇Gonne ditshedi tsa methale yotlhe ya diphologolo le dinonyane, le ya dilo tse di gagabang, le dilo tse di mo teng ga lewatle, di tle di tantshiwe gape, di kile tsa nna tsa tantshiwa ke batho. ₈Mme loleme lone, ga go na motho ope yo o ka lo tantshang; ke bosula jo bo tlhabatlhabang, lo tletse more o o bolayang. ₉Re baka Morena le Rara ka lone, re be re hutse ka lone batho, ba ba bopilweng mo tshwanong ya Modimo. ₁₀Go baka le go hutsaka go tle go tswe mo molomong o le mongwe fela. Bagaetsho, dilo tse ga di a tshwanela go nna jalo. ₁₁A motswedi o tle o tswele metsi a a monate le a a botlhoko mo leitlhong le le lengwe fela? ₁₂Bagaetsho, a mofeige o ka ungwa ditlhware, kgotsa mofine difeige? Le gone metsi a a letswai ga a ka ke a tswa a a monate fela.

₁₃Ke mang yo o botlhale, yo o nang le tlhaloganyo mo go lona? A a ke a supe ditiro tsa gagwe ka bonolo jwa botlhale, ka go tshela ga gagwe mo go molemo. ₁₄Mme fa lo na le lefufa le le galakang, le kgang mo pelong tsa lona, lo se ka lwa ipelafatsa, lo se ka lwa aketsa boammaaruri. ₁₅Botlhale jo, ga se jo bo fologang kwa godimo, ke jwa selefatshe, jwa senama, jwa mewa e e maswe. ₁₆Gonne kwa go leng lefufa le kgang, go bile go na le tobekano, le tiro nngwe le nngwe e e maswe teng. ₁₇Mme botlhale jo bo tswang kwa godimo bo simologa bo le boitsheko, foo bo nne kagiso, bo bonolo, bo rapelesege ka bofefo, bo tletse boutlwelobotlhoko le maungo a a molemo, bo se na kakabalo, bo se na boitimokanyo. ₁₈Loungo lwa tshiamo lo jalwa mo kagisong, lo jalelwa ba ba ratang kagiso.