ISAIA 7

₁Ga dirala ya re mo metlheng ya ga Ahase morwa Jothame, morwa Usia kgosi ya Juta, Resine kgosi ya Siria, le Peka morwa Remalia, kgosi ya Iseraele, ba tlhatlogela kwa Jerusalema go tlhabana le one; mme ba retelelwa ke go o fenya.

₂Mme ga bolelelwa ba ntlo ya ga Dafite, ga twe: “Siria o ikamile Eferaime. Mme pelo ya gagwe ya ebela, le pelo ya batho ba gagwe, jaaka ditlhare tsa sekgwa di ebedisiwa ke phefo.”

₃Foo Jehofa a raya Isaia, a re: “Tswa o ye go kgatlhantsha Ahase, wena le Shearejašube morwao, lo ye kwa bokhutlong jwa mosele wa lekadiba le le kwa godimo, mo tseleng e tona ya naga ya mosugi wa matlalo; ₄mme o mo reye o re: ‘O itise, mme o iketle; o se ka wa boifa, le gone pelo ya gago e se idibale, ka ntlha ya dikotana tse pedi tse tsa dirumola tse di kuang mosi, ka ntlha ya bogale jo bo tukang jwa ga Resine, le Siria, le jwa morwa Remalia. ₅Ereka Siria a gakolotse bosula ka ga gago, Eferaime le ene, le morwa Remalia, ba re: ₆A re bololeleng lefatshe la Juta, re le feretlhe, a re itirele phatlha mo go lone, re tlhome kgosi fa gare ga lone, e bong morwa Tabeele.’ ”

₇“Morena Modimo o bua jaana, a re: ‘Ga go ketla go ema, le gone ga go ketla go dirafala. ₈Gonne tlhogo ya Siria ke Damaseko, le tlhogo ya Damaseko ke Resine, e tlaa re dinyaga di le 65 di e se di fete, Eferaime o tlaa thubaganngwa, gore a se tlhole a nna tšhaba. ₉Tlhogo ya Eferaime ke Samaria, le tlhogo ya Samaria ke morwa Remalia. Fa lo gana go dumela, ruri ga lo ketla lo tlhomamisiwa.’ ”

₁₀Jehofa a ba a bua le Ahase gape, a re: ₁₁“Itopele sesupo mo go Morena Modimo wa gago; o ka lopa le fa e le sa mo botengnyeng, kgotsa sa kwa bogodimong kwa godimo.”

₁₂Mme Ahase a re: “Ga nketla ke lopa, le gone ga nketla ke leka Jehofa.”

₁₃Mme a re: “Utlwang jaana, lona ba ntlo ya ga Dafite; a ke selo se sennye mo go lona fa e bo ne ne fano lo lapisa batho, fa lo bile lo lapisa le one Modimo wa me? ₁₄Ke gone ka moo Morena ka esi o tlaa lo nayang sesupo; bonang kgarebane e tlaa ithwala, e tlaa belega ngwana wa mosimane, e tlaa mo raya leina, e re: Imanuele. ₁₅O tlaa ja madila le dinotshe, motlhang o itseng go gana bosula, le go ipatlela se se molemo. ₁₆Gonne e tlaa re ngwana a ise a itse go gana bosula, le go ipatlela se se molemo, lefatshe le dikgosi tse pedi tsa lone o di tlhoileng, le tlaa tlhobogwa.

₁₇“Jehofa o tlaa tlisa mo go wena, le mo bathong ba gaeno, le mo ntlong ya ga rraago, metlha e e seng e ke e tle, e sa le ka letsatsi le Eferaime o duleng mo go Juta ka lone; e bong kgosi ya Asiria.”

₁₈Mme go tlaa dirala mo motlheng oo, go re, Jehofa o tlaa tsua ka molodi tsetse e e kwa khutlong, e e kwa tengnyanateng ga dinoka tsa Egepeto, le yone ntshi ya notshe e e mo lefatsheng la Asiria. ₁₉Di tlaa tla di ririana tsotlhe fela mo mekgatšheng e e swafetseng, le mo dipharong tsa mafika, le mo ditlhareng tsotlhe tse di mitlwa, le mo mafulong otlhe.

₂₀Mo motlheng oo Morena o tlaa beola ka logare lo lo thapilweng ka tuelo, e le lo lo kwa mafatsheng a a kwa moseja ga Noka, e bong ka kgosi ya Asiria, lo tlaa beola tlhogo le bobowa jwa dinao; mme lo tlaa ja le tsone ditedu.

₂₁Go tlaa dirala mo motlheng oo, go re, motho o tlaa otla kgomo ya moroba, le dinku di le pedi. ₂₂Mme go tlaa dirala go re, ka ntlha ya letlotlo la maši a di tlaa a sisang, o tlaa ja madila; gonne mongwe le mongwe yo o tlogetsweng mo gare ga lefatshe o tlaa ja madila le dinotshe.

₂₃Go tlaa dirala mo motlheng oo go re, mo felong gongwe le gongwe, kwa go kileng ga nna mafine a le sekete a a rekilweng ka diselefera di le sekete, e tlaa bo e le ga lokhi le lorwana. ₂₄Motho o tlaa tsena gone a tshotse metswi le bora; gonne lefatshe le tlaa bo le le lokhi le lorwana fela. ₂₅Dithotana tsotlhe tse di kileng tsa nna tsa lengwa ka mogoma, ga o ketla o tsena gone ka go tshaba lokhi le lorwana, mme e tlaa bo e le ga pololelo ya dikgomo le ga dinku go go gata.