ISAIA 37

₁Ga dirala ya re Hesekia a a utlwa, a ikgagola diaparo, a ipipa ka letsela la kgetse, mme a ya mo ntlong ya ga Jehofa. ₂A roma Eliakime yo o neng o laola ntlo ya kgosi, le Shebena mokwaledi, le bagolwane ba baperesiti, ba ipipile ka letsela la kgetse, ba ya kwa go moperofeti Isaia, morwa Amose. ₃Mme ba mo raya ba re: “Go bua jaana Hesekia, a re: ‘Letsatsi leno ke letsatsi la tlalelo, la kgalemo, le la go supiwa ka monwana; gonne bana ba a tsholwa, mme ga go na nonofo ya go belega. ₄E ka tla ya nna, go re, gongwe Jehofa Modimo wa gago a utlwe mafoko a ga Rabešake yo kgosi ya Asiria, mong wa gagwe, o mo romileng, gore a tle go kgoba Modimo o o tshedileng, le gone gongwe a kgalemele mafoko a Jehofa Modimo wa gago o a utlwileng; ke gone tsholetsa morapelo wa gago kaga masalela a a setseng.’ ”

₅Jalo batlhanka ba kgosi Hesekia ba fitlha kwa go Isaia. ₆Mme Isaia a ba raya a re: “Lo tlaa raya mong wa lona jaana, lo re: ‘Jehofa o bua jaana, a re: Se boife mafoko a o a utlwileng, a ka fa batlhanka ba kgosi ya Asiria ba ntlhapaditseng ka teng. ₇Bona, ke tlaa tsenya mowanyana mo go ene, mme o tlaa utlwa modumo a boela kwa lefatsheng la ga gabo; ke tlaa mo osa ka tšhaka mo lefatsheng la ga gabo.’ ”

₈Jalo Rabešake a bowa, mme a fitlhela kgosi ya Asiria e tlhabana le Libena; gonne a utlwile fa e tlogile kwa Lakiše. ₉Mme a utlwa ka ga Tirehaka kgosi ya Ethiopia, fa go tulwe o go bololetse go tlhabana nao. Mme o rile a go utlwa a roma batho kwa go Hesekia, a re: ₁₀“Lo tlaa bua jaana le Hesekia kgosi ya Juta, lo re: ‘A Modimo wa gago, o o ikantseng mo go one o se go tsietse, ka go re, Jerusalema ga o ketla o neelwa kgosi ya Asiria mo seatleng. ₁₁Bona, o utlwile se dikgosi tsa Asiria di se diretseng mafatshe otlhe ka go a senyetsa ruri; mme wena a o tlaa falodisiwa? ₁₂A medimo ya merafe e e falodisitse, e borraetsho ba e sentseng, e bong Gosane, le Harane, le Resefe le bana ba ga Etene, ba ba kileng ba nna mo Telesare? ₁₃E kae kgosi ya Hamathe, le kgosi ya Arepata, le kgosi ya motse wa Sefarefaime, ya Hena, le ya Ifa?’ ”

₁₄Hesekia a amogela lokwalo mo seatleng sa barongwa, a lo bala; mme Hesekia a tlhatlogela kwa ntlong ya ga Jehofa, a lo menololela fa pele ga Jehofa. ₁₅Hesekia a ba a rapela Jehofa, a re: ₁₆“Jehofa wa masomosomo, Modimo wa Iseraele, o o dutseng mo godimo ga ditšheruba ke wena Modimo, ee, wena wesi fela, wa magosi otlhe a lefatshe; o dirile legodimo le lefatshe. ₁₇Sekega tsebe ya gago, Jehofa, o utlwe, budulola matlho a gago, Jehofa, o bone, mme o utlwe mafoko otlhe a ga Senakeribe, yo o romileng gore go kgojwe Modimo o o tshedileng. ₁₈Ruri, Jehofa, dikgosi tsa Asiria di kgakgabaditse merafe yotlhe, le mafatshe a yone. ₁₉Di latlhetse medimo ya yone mo molelong; ka go bo e ne e se medimo ya sepe, fa e se tiro ya diatla tsa batho fela, dikgong le maje; ke gone ka mo di e sentseng. ₂₀Ke gone, jaana, Jehofa Modimo wa rona, re falodise mo seatleng sa gagwe, gore magosi otlhe a lefatshe a itse fa o le Jehofa, ee, wena wesi fela.”

₂₁Foo, Isaia morwa Amose, a roma kwa go Hesekia, a re: “Go bua jaana Jehofa, Modimo wa Iseraele, a re: E re ka o nthapetse ka ga Senakaribe kgosi ya Asiria, ₂₂lefoko le Jehofa o le buileng ka ga gagwe ke le: ‘Sione, ngwana wa kgarebana o go nyaditse, o go tshegile ka tshotlo; morwadia Jerusalema o go thukhutheditse tlhogo. ₂₃O kgobile wa ba wa tlhapatsa mang? Lentswe la gago o le tsholeleditse mang, wa pegela mang matlho a gago godimo? Ke Moitshepi wa Iseraele fela. ₂₄O kgobile Morena ka batlhanka ba gago, o rile: Ka bontsi jwa dikara tsa me tsa tlhabano ke tsile kwa ditlhoreng tsa dithaba, le kwa tengteng ga Lebanone; ke tlaa rema masetara a a godileng a gone, le ditlhare tse dintlentle tsa mafira a gone; ke tlaa tsenela kwa tlhoreng ya gagwe e e kwa tengteng kgakala, sekgwa sa leota la gagwe le le ungwang. ₂₅Ke epile, ke nole metsi, mme ke tlaa kgadisa dinoka tsotlhe tsa Egepeto ka pato ya dinao tsa me.

₂₆“ ‘A ga o ise o utlwe fa go dirile nna selo se, bogologolo, ka se baakanya mo metlheng ya bogologolo tala? Jaanong ke se dirafaditse, gore e nne wena yo o kgakgabatsang metse e e thekeleditsweng, gore e tle e nne diphikwephikwe fela? ₂₇Ke gone ka moo banni ba yone e ne e le ba nonofo e potlana fela, ba rarega, ba tsielwa fela; ba nna jaaka bojang jwa naga, le jaaka morogo o motalana, jaaka bojang jo bo tlhogang mo godimo ga matlo, le jaaka tshimo e e emeng mabele a ise a gole.

₂₈“ ‘Mme ke a go itse, go dula ga gago, le go tswa ga gago, le go tsena ga gago, le go ntšhakgalela ga gago. ₂₉Ka ntlha ya go ntšhakgalela ga gago, le ka ntlha ya go bo boikgantsho jwa gago bo tlhatlogetse mo ditsebeng tsa me, ke gone ka mo ke tlaa tsenyang kobe ya me mo nkong ya gago, le mogala wa me mo ganong la gago, ke tlaa go busetsa kwa morago ka tsela e o tsileng ka yone.’

₃₀“Mme se, e tlaa nna sesupo mo go wena: monongwaga lo tlaa ja makwakwa fela, le mo ngwageng wa bobedi se se tswang mo go one oo; e tlaa re mo ngwageng wa boraro lo jale, lo robe, mme lo tlhome masimo a mafine, lo je loungo lwa one. ₃₁Mme masalela a a falotseng a ntlo ya Juta a tlaa ba a melela metswe kwa tlase, a tlaa ungwela kwa godimo. ₃₂Gonne mo Jerusalema go tlaa tswa masalela, le mo thabeng ya Sione go tlaa tswa ba ba tlaa falolang; tlhoafalo ya ga Jehofa wa masomosomo e tlaa diratsa selo se.

₃₃“Ke gone ka moo Jehofa o bua jaana ka ga kgosi ya Asiria, a re: Ga e ketla e fitlha mo motseng o, le fa e le go hulela motswi gone, le gone ga e ketla e tla ka thebe fa pele ga one, le fa e le go o epela kadisi. ₃₄Ka tsela e e tsileng ka yone e tlaa boa ka yone fela, ga e ketla e fitlha kwano motseng ono, go bua Jehofa. ₃₅Gonne ke tlaa femela motse o, go o boloka, ka ntlha ya me le ka ntlha ya motlhanka wa me Dafite.”

₃₆Mme moengele wa ga Jehofa a tswa, a ya a gaila batho ba le 185 000 mo bothibelelong jwa Baasiria; mme e rile batho ba tsoga go le ka maphakela, bonang ba bo ba le ditoto fela. ₃₇Jalo Senakeribe kgosi ya Asiria a tloga, a tsamaya a boa, a aga kwa Ninefe. ₃₈Ga dirala e rile a obame mo ntlong ya ga Niseroke, modimo wa gagwe, Aterameleke le Sharesere bomorwawe, ba mmolaya ka tšhaka; ba falolela kwa lefatsheng la Ararate. Mme Esare-hatone morwawe, a busa mo boemong jwa gagwe.