ISAIA 34

₁Atamelang lona merafe lo tle go utlwa; lo reetseng lona ditšhaba; a lefatshe le utlwe le botlalo jwa lone; lobopo le dilo tsotlhe tse di tswang mo go lone. ₂Gonne Jehofa o gakaletse merafe yotlhe, o šakgaletse ntwa yotlhe ya yone; o e senyeditse ruri, o e neetse go gailwa fela. ₃Babolaiwa ba bona ba tlaa latlhelwa kwa ntle, mme sefoka sa ditoto tsa bone se tlaa phunyega, le dithaba di tlaa nyera ka madi a bone. ₄Lesomosomo lotlhe la legodimo le tlaa nyera, magodimo a tlaa tshophiwa jaaka lokwalo lo lo tshophiwang; lesomosomo lotlhe la one le tlaa tlhotlhorega jaaka lekakaba le tle le tlhotlhorege mo mofineng, le jaaka lekakaba le tlhotlhorega mo feiyeng.

₅Gonne tšhaka ya me e nole e kgotshe mo legodimong; bonang, e tlaa wela Etome godimo, le mo bathong ba neelo ya me, go ba sekisa. ₆Tšhaka ya ga Jehofa e tlhamuketse madi, e nontshitswe ka monono, ka madi a dikwanyana le a dipodi, le ka mafura a diphilo tsa diphelefu; gonne Jehofa o na le setlhabelo mo Bosera, le kgailo e kgolo mo lefatsheng la Etome. ₇Dinare di tla fologa natso, le dipholo di na le dipoo, lefatshe la bone le tlaa tagwa ke madi, le lorole lwa bone lo tlaa nongwa ka monono. ₈Gonne ke letsatsi la pusoloso ya ga Jehofa, ke ngwaga wa tefetso mo kgangnyeng ya Sione.

₉Dinokana tsa teng di tlaa fetoga boka, le lorole lwa teng sulefura, lefatshe la teng le tlaa nna boka jo bo tukang molelo. ₁₀Ga go ketla go tingwa bosigo le motshegare; mosi wa teng o tlaa kuelela ka bosakhutleng; go tlaa namalala go kgakgabetse go ya ditshikatshikeng; ope ga a ketla a go ralala ka bosakhutleng le ka bosaengkae.

₁₁Khukara e tlaa go rua le noko; le morubisi o tlaa aga teng le mohukubu, mme o tlaa go namalaletsa mogala wa mafaratlhatlha, le selekanyo se se thokgameng sa tobekano. ₁₂Ba tlaa biletsa bagolwane ba teng kwa bogosing, mme ga go ketla go dira le ope teng; le dikgosana tsotlhe tsa gagwe di tlaa bo di se sepe. ₁₃Lorwana lo tlaa tlhoga mo matlong a teng a dikgosi, mmabi le mokaikai mo dikagong tsa gone tsa phemelo; e tlaa nna bonno jwa diphokoje le lolwapa lwa bontšhe. ₁₄Dibatana tsa sekaka di tlaa kopana le diphiri, le badimo sekapodi ba tlaa bitsakanya le dilekane tsa bone. Ee, Mma-meno a-mahibidu o tlaa tla a nna teng, mongwe le mongwe a na le selekane sa gagwe. ₁₅Morubisi o tlaa dira setlhaga sa one teng, o baya mae, o thothotsa, o phuthela mo go ikgareng ga one; bomankgwedi ba tlaa kokoanela teng, mongwe le mongwe a na le selekane sa gagwe.

₁₆Tlhotlhomisang mo lokwalong lwa ga Jehofa, lo bale: ga go na epe ya tsone tse, e e tlaa tlhokafalang, epe ga e ketla e tlhoka mogatsa a yone, gonne molomo wa me o go laotse, mowa wa gagwe o di phuthile. ₁₇O di laoletse ka bola; seatla sa gagwe se le di kgaoganyeditse ka mogala; di tlaa le rua ka bosakhutleng, di tlaa aga teng mo ditshikatshikeng.