ISAIA 27

₁Mo letsatsing leo Jehofa o tlaa betsa seinyoki se segolo sa noga e e sefadima, le seinyoki sa noga se se ikgarang, ka tšhaka ya gagwe e e botlhoko, e tona, e e thata; mme o tlaa bolaya kgogela e e mo nokeng.

₂Mo letsatsing leo: A tshimo ya bojalwa jwa mofine! E opeleleng. ₃Nna Jehofa ke a e lebela; ke tlaa e nosa ka dipakanyana tsotlhe; ke tlaa e lebela bosigo le motshegare, gore ope a se ka a e senya. ₄Go šakgala ga goyo mo go nna. A bo lokhi le lorwana di ka ka tsa tlhabana le nna ka ntwa! Ke ne ke tlaa di tshologela ke di fisa mmogo. ₅Gongwe a a tshware thata ya me, gore a tle a agisanye le nna; ee, a a agisanye le nna.

₆Mo malatsing a a tlang Jakobe o tlaa anama motswe; Iseraele o tlaa thunya a kukunya; mme ba tlaa tlatsa lefatshe ka loungo.

₇A o mo iteile jaaka a iteile bale ba ba kileng ba mo itaya? Kgotsa a o bolailwe ka fa polaong ya bone ba ba kileng ba bolawa ke ene? ₈Ka selekanyo, e a re o mo leleka, wa bo o ganela nae; o mo tlositse ka tsubutlo ya gagwe e e thata, mo motlheng wa phefo ya botlhabatsatsi. ₉Ke gone ka moo boikepo jwa ga Jakobe bo tlaa tlhatswegang, mme moo gotlhe ke lone loungo lwa go tlosa boleo jwa gagwe; motlhang o dirang maje otlhe a sebeso go nna jaaka manyaaphiri a a thubagantsweng, gore Medimako le ditshwantsho tsa letsatsi di se ka tsa tlhola di tsoga.

₁₀Gonne motse o o thekeleditsweng o osi fela; ke bonno jo bo tlhadilweng, jo bo tlhobogilweng jaaka naga fela; namane e tlaa fula gone, e ba e botha gone, e tlaa poma e ja dikalana tsa bone. ₁₁E tlaa re fa dikala tsa gone di omeletse di tlaa rojwa; basadi ba tlaa tla ba di tshuba ka molelo; gonne ke tšhaba e e se nang tlhaloganyo, ke gone ka moo yo o ba dirileng ga a ketla a ba tlhomogela pelo, le yo o ba bopileng ga a ketla a ba supetsa botsalano bope.

₁₂Go tlaa dirala mo letsatsing leo, go re, Jehofa o tlaa goba loungo lwa gagwe, go simolola kwa morwaleleng wa Noka e kgolo go ya nokaneng ya Egepeto, mme lona lo tlaa olwa ka monokela, lona bana ba Iseraele.

₁₃Go tlaa dirala mo letsatsing leo, go re, go tlaa lediwa lonaka lo logolo; mme go tlaa tla ba ba kileng ba batla go nyelela mo lefatsheng la Asiria, le ba e kileng ya ne e le balelekwi mo lefatsheng la Egepeto; ba tlaa obamela Jehofa mo thabeng e e boitshepo kwa Jerusalema.