BAHEBERE 12

₁Ke gone, e re ka re dikanyeditswe ke boidiidi jo bo kalokalo jwa basupi, a le rona re latlheng bokete bongwe le bongwe, le boleo jo bo bofefo go re rareetsa, mme a re sianeng ka bopelotelele tshiano e re e beilweng pele, ₂re ntse re lebile kwa go Jesu, mosimolodi le mowetsi wa tumelo ya rona, yo e rileng ka boitumelo jo o bo beetsweng pele a itshokela mokgoro, a nyatsa ditlhong, mme a dula ka fa ntlheng ya letsogo le legolo la setulo sa Modimo sa bogosi.

₃A lo ke lo akanyeng ene yo o itshoketseng kganelo e e kalokalo ya baleofi ba ba ikganetsang, gore lo tle lo se ka lwa lapa, lwa ngodiega mo meweng ya lona. ₄Go ganela ga lona ga go ise go ko go fitlhe mo go tshologeng madi, lo ganela le boleo. ₅Lo bile lo lebetse tao e e buang le lona jaaka bana, e re:

₇Kwatlhao ke yone e lo e itshokelang. Aitse Modimo o lo direla jaaka bana; gonne ngwana ke ofe yo rraagwe o sa mo otlhayeng? ₈Mme fa lo sa bone kwatlhao e botlhe ba e bonang, lo bo lo le bana ba dikgora, e seng bana sebele. ₉Gape, re ne re na le borraetsho ba nama ba ba re otlhaileng, mme ra ba sisimoga. Bogolo thata a ga re ketla re nna kutlo mo go ene Rara wa mewa, ra tshela? ₁₀Gonne le gale bone ba re otlhaile ka malatsinyana, ka fa ba ratileng ka teng; mme ene o re gapela kwa molemong, e bong gore re abelwe boitshepo jwa gagwe. ₁₁Mo bakeng lono, e kete kwatlhao yotlhe e ntse jaaka e kete ga e na boitumediso, fa e se tlhokofatso fela; le fa go ntse jalo, e a re kwa morago ba ba e rutintshitsweng, e ba ungwele loungo lwa kagiso, e bong loungo lwa tshiamo.

₁₂Ke gone, tsholetsang mabogo a a lepeletseng, le mangole a a reketlang, ₁₃lo direle dinao tsa lona ditsela tse di siameng, gore se se tlhotsang se se ka sa lokologa, bogolo se tle se sidilege.

₁₄Latelang kagiso le batho botlhe, le boitshepiso jo go seng motho ope yo o tlaa bonang Morena kwa ntle ga jone. ₁₅Lo ntse lo iketse sedi, e se re kgotsa go bo go le motho mongwe yo o tlhaelang tshegofatso ya Modimo; e se re kgotsa modi mongwe o o galakang wa mela, wa lo tshwenya, mme batho ba le bantsi ba leswefadiwa ka gone; ₁₆gore e se re kgotsa go bo go le mogokafadi, le fa e le motho yo o tlhapatsang, jaaka Esau, yo o lesitseng botsalwapele jwa gagwe jwa rekwa ka sejonyana se se kgorwang gangwe fela. ₁₇Gonne lo a itse le gone, jaaka e rile kwa morago ka a eletsa go ja letlhogonolo boswa, a ganwa, le fa a le batlile ka tlhoafalo le ka dikeledi – gonne a se ka a bona ka fa o ka go dirololang ka teng.

₁₈Gonne ga lo a tla mo thabeng e e nang le go angwa, e e tukang molelo, le fa e le mo bontshong, le fa e le mo lefifing, le fa e le mo ledimong la phefo, ₁₉le fa e le mo tumong ya lonaka, le mo kodung ya mafoko; e le kodu e ba ba e utlwileng ba rapetseng, gore go se ka ga tlhola go buiwa lefoko lepe nabo. ₂₀Gonne ba ne ba retelelwa ke go itshokela se se laotsweng, sa go re: “Fa se e leng setshedi fela se ka ama thaba, a se kgobotlediwe ka maje.” ₂₁Panola ya gone ya bo e boitshega thata, Moše a ba a tla a re: “Ke boifa thata, ke bile ke a roroma.”

₂₂Mme lona lo tsile mo thabeng ya Sione, le mo motseng wa Modimo o o tshedileng mo Jerusalema wa selegodimo, le mo masomosomong a a se nang palo a baengele, ₂₃mo pitsong e kgolo ya botlhe fela, le mo phuthegong ya batsalwapele ba ba kwadilweng kwa legodimong, le mo Modimong Moatlhodi wa botlhe, le mo meweng ya basiami ba ba dirilweng boitekanelo. ₂₄Le mo go Jesu motsereganyi wa kgolagano e ntšha, le mo mading a kgatsho a a itseng go bua go gaisa a ga Abele.

₂₅Lo bo lo bone gore lo se ka lwa gana yo o buang. Gonne fa bao ba se ka ba falola jale, ka ba gana yo o tlhagisang a le mo lefatsheng, bogolo thata rona ga re ketla re falola, ba re fularelang ene yo o tlhagisang a le kwa legodimong; ₂₆yo lentswe la gagwe le reketlisitseng lefatshe jale; gompieno o boletse a re: “Ke sa ntse ke tlaa roromisa gangwe fela, e seng lefatshe fela, mme le lone legodimo.” ₂₇Mme lefoko le, la go re: “Gangwe fela,” le kaya go tlosiwa ga dilo tse di reketlang, jaaka ga dilo tse di bopilweng, gore dilo tse di se kang tsa reketla di sale.

₂₈Ke gone, e re ka re amogela bogosi jo bo sa ka keng jwa reketlisiwa, a re nneng le tshegofatso e re ka dirang tiro e e kgatlhang Modimo ka yone, ka tshisimogo le poifo; ₂₉gonne Modimo wa rona ke molelo o o lailang.