BAHEBERE 10

₁Gonne molao, ka o ne o na le moriti fela wa dilo tse di molemo, tse di ne di tla, e seng setshwano sa dilo sebele, baperesiti ga ba ka ke ba dira gope, gore ba ba atamelang ba nne boitekanelo, ka tse e leng ditlhabelo tse ba tleng ba di ise ka gale ka ngwaga le ngwaga. ₂Fa go ne go sa nna jalo, a di ne di ka bo di sa khutlelwa go tlhola di isiwa? Ka gobo baobami, fa ba ka bo ba kile ba ntlafadiwa gangwe fela, ba ko ba sa tlhole ba ikutlwa dibe. ₃Mme mo ditlhabelong tseo go bo go ntse go dirwa kgopodiso ya dibe ka ngwaga le ngwaga. ₄Gonne go retetse ruri fa madi a dipoo le a dipodi a ka tlosa dibe.

₅Ke gone e rileng a tla mo lefatsheng, a bua a re:

₈Jaaka e le fa o buile wa re: “Ditlhabelo le ditshupelo, le ditshupelo tsa phiso di le boleka, le ditshupelo tsa boleo, o di ganne, wa se ka wa kgatlhega mo go tsone,” le mororo e le tse di isiwang ka fa molaong. ₉Foo o tlogile a re: “Bona, ke tsile go dira go rata ga gagwe.” Mo ga pele wa go tlosa, gore a tle a tlhomamise mo ga bobedi. ₁₀Mme re itshepisitswe ke go rata mo ga Modimo, ka mmele wa ga Jesu Keresete go ntshediwa setlhabelo ruri gangwe fela.

₁₁Le gale moperesiti mongwe le mongwe o tle a eme ka letsatsi lengwe le lengwe a direle, a ise ditlhabelo gantsi tse di tshwanang fela, e le tse di sa ka keng tsa tlosa dibe gope. ₁₂Mme ene, o rile a sena go isetsa ruri setlhabelo sa dibe se le sengwe fela, a dula ka fa letsogong le legolo la Modimo, ₁₃go nna a lebelela go tsamaya baba ba gagwe ba dirwa sebeo sa dinao tsa gagwe. ₁₄Gonne, ba ba itshepisitsweng o ba dirile boitekanelo ka bosakhutleng, ka tshupelo e le nngwe fela.

₁₅Le Mowa o o Boitshepo o a re supetsa; gonne o rile o sena go bua go re: ₁₆“Kgolagano e ke tlaa e dirang nabo morago ga metlha eo ke e,” go bua Jehofa. “Ke tlaa baya melao ya me mo dipelong tsa bone, le mo mogopolong wa bone ke tlaa e kwala.” Foo a re: ₁₇“Le dibe tsa bone, le ditshiamololo tsa bone, ga nketla ke tlhola ke di gakologelwa gope.”

₁₈Jaana kwa boitshwarelo jwa tsone tse bo leng teng, ga go tlhole go na le tshupelelo ya boleo teng.

₁₉Ke gone, bagaetsho, e re ka re na le tshosologo ya go tsena mo Felong ga Boitshepo ka madi a ga Jesu, ₂₀ka tsela e o e re diretseng, tsela e ntšha le e e tshedileng, e e tsenang ka sesiro, ke go re, nama ya gagwe, ₂₁e re ka re na le moperesiti yo mogolo, yo o laolang ntlo ya Modimo, ₂₂a re atameleng ka pelo ya mmaanete mo botlalong jwa tumelo, pelo tsa rona di kgatshitswe, di tlositswe segakolodi se se bosula, le mebele ya rona e tlhapisitswe ka metsi a mantle. ₂₃A re tshegetseng boipolelo jwa tsholofelo ya rona ka thata, gore bo se reketle; gonne ene yo o boletseng tsholofetso, o boikanngo; ₂₄a re gopolaneng, re tlhotlheletsanyeng mo loratong le mo ditirong tse di molemo; ₂₅re se ka ra bakela go phuthega ga rona, jaaka mokgwa wa bangwe, mme re laelane; bogolo thata ka lo bona motlha o atamela.

₂₆Gonne fa re leofa ka bomo re sena go amogela kitso ya boammaaruri, ga go tlhole go na le setlhabelo sepe sa dibe. ₂₇Fa e se tebelelo e e boitshegang ya tshekiso, le ya bogale jwa molelo o o tlaa lailang baganetsi. ₂₈Motho yo o nyaditseng molao wa ga Moše o swa fela a sa tlhomogelwe pelo, ka lefoko la basupi ba le babedi kgotsa ba le bararo. ₂₉Fa lo gopola, ene yo o gatakileng Morwa Modimo ka dinao, a ba a kaya madi a kgolagano, a o itshepisitsweng ka one, a re, ke selo fela se se sa itshepang, a rumola Mowa wa tshegofatso, ana ene o tlaa kaiwa a tshwanetswe ke petso e e botlhoko bo kae? ₃₀Gonne re a mo itse yo o rileng: “Pusoloso ke ya me, ke tlaa lefetsa.” Gape ga twe: “Jehofa o tlaa atlholela batho ba gagwe.” ₃₁Ke se se boitshegang go wela mo diatleng tsa Modimo o o tshedileng.

₃₂Lo ikgakolole metlha ya jale, e e rileng lo sena go bonesiwa, lwa bona ntwa e kgolo ya ditlhokofatso mo go yone, ₃₃ka ntlha e nngwe e le ka go ntshiwa segakgamalelo ka dikgobo le ka dipitlagano; ka ntlha e nngwe e le ka go di tlhakanela le ba ba direlwang jalo. ₃₄Gonne, ba ba mo dikgoleng lo ba tlhomogetse pelo, lwa itshokela go thopiwa ga dilo tsa lona ka boitumelo, lo ntse lo itse fa lona ka losi lo na le boswa jo bo molemo bogolo, le jo bo tlhomameng. ₃₅Ke gone, se latlheng tshosologo ya lona, e e nang le tefo e kgolo ya tuelo. ₃₆Gonne lo tshwanetse go dirana le bopelotelele, gore e tle e re lo sena go dira go rata ga Modimo, lo bo lo amogele polelo ya tsholofetso. ₃₇“Gonne go sa ntse go le lobakanyana, mme yo o tlang o tlaa tla, ga a ketla a diega; ₃₈mosiami wa me o tlaa tshela ka tumelo; mme fa a ikgogona, mowa wa me o tlaa bo o se na kgatlhego mo go ene.” ₃₉Mme ga re ba bone ba ba ikgogonelang kwa tatlhegong; mme re ba bone ba ba nang le tumelo e e isang polokong ya mowa.