1Josefe a wela mo sefatlhogong sa ga rraagwe a lelela mo go ene, a mo atla. 2Josefe a laola batlhanka ba gagwe ba e leng dingaka gore ba omise rraagwe ka bongaka; dingaka tsa omisa Iseraele ka bongaka. 3Ga feta malatsi a le 40 ka ga gone; gonne malatsi a go omisa motho ka bongaka a tle a fete a le kalo. Baegepeto ba mo lelela ka malatsi a le 70.
4E rile malatsi a go mo lelela a fetile, Josefe a bua le ba ntlo ya ga Faro a re: “A e re ka jaana ke bonye tsalano mo matlhong a lona, ke a lo rapela, lo tle lo bue mo ditsebeng tsa ga Faro lo re, ga twe: 5Rre o inkanisitse a re: ‘Bona, ke a swa; mme phupu e ke e ikepetseng kwa lefatsheng la Kanana ke gone kwa o tlaa mphitlhang gone.’ Mme jaana ke a go rapela, mma ke tlhatloge ke ye go fitlha rre, ke tlaa ba ke boa.”
6Faro a re: “Tlhatloga o ye go fitlha rraago ka fa o go ikanisitseng ka gone.”
7Josefe a tlhatloga a ya go fitlha rraagwe; mme ga tlhatloga nae batlhanka botlhe ba ga Faro, bagolwane ba ntlo ya gagwe, le bagolwane botlhe ba lefatshe la Egepeto, 8le botlhe ba ntlo ya ga Josefe, le bomorwa rraagwe, le ntlo ya ga rraagwe; fa e se banyana ba bone, le matsomane a bone, le matlhape a bone, ba di tlogela mo lefatsheng la Gošene. 9Ga tlhatloga nae dikara le bapagama dipitse; ya nna lesomo le legolo thata.
10Ba fitlha fa sebuping sa ga Atate se se kwa moseja ga Joretane, ba lelela gone ka selelo se segolo se se botlhoko; mme a direla rraagwe selelo ka malatsi a supa. 11E rile banni ba lefatshe, e bong Bakanana, ba bona selelo mo sebuping sa ga Atate ba re: “Se ke selelo se se botlhoko mo go Baegepeto.” Ke gone ka mo leina la gone le reilweng ga twe, Abele-miseraime; o o kwa moseja ga Joretane.
12Bomorwawe ba mo direla jaaka a ba laotse. 13Gonne bomorwawe ba ne ba mmelegela kwa lefatsheng la Bakanana, ba mo fitlha mo logageng lwa sebata sa naga ya Makapela lo Aberahame o lo rekileng le sebata sa naga go nna boswa jwa phitlhelo, a lo reka mo go Eferone wa Mohite bolebana le Mamere. 14E rile ba sena go fitlha rraagwe, Josefe a boela kwa Egepeto, ene le bomorwa rraagwe, le botlhe ba ba tlhatlogileng nae ba ile go fitlha rraagwe.
Josefe o tlhomamisetsa barwa-rraagwe poloka
15E rile bomorwa rraagwe ba bona fa rraabo a sule, ba re: “Motlhamongwe Josefe o tlaa re ila, a itefetsa ka botlalo bosula jotlhe jo re kileng ra bo mo direla.” 16Ba isa taetso kwa go Josefe ba re: “E rile rraago a ise a swe a laola a re: 17‘Lo tlaa raya Josefe jaana lo re: “Ke a go rapela, a ko o itshwarele tlolo ya bomorwa rraago le boleo jwa bone, ka gobo ba kile ba go direla bosula.” ’ Mme jaana re a go rapela a ko o itshwarele tlolo ya batlhanka ba Modimo wa ga rraago.” Mme e rile ba bua nae Josefe a lela.
18Bomorwa rraagwe ba ya ba wela fa pele ga sefatlhogo sa gagwe ba re: “Bona, re batlhanka ba gago.” 19Josefe a ba raya a re: “Se boifeng; ka re, a ke mo boemong jwa Modimo? 20Ka ga lona lo ne lo ntaoletse bosula; mme Modimo o no o laotse gore go nne molemo, go diratsa go nna jaaka go ntse gompieno, go tshedisa batho ba le bantsi. 21Ke gone jaana se boifeng: ke tlaa lo otla le bana ba lona.” A ba gomotsa; mme mafoko a gagwe a ba tsena mo pelong.
Loso lwa ga Josefe
22Josefe a aga mo Egepeto, ene, le ntlo ya ga rraagwe. Mme a tshela dinyaga di le 110. 23Josefe a bona bana ba ga Eferaime ba losika lwa boraro; le bana ba ga Makire morwa Manase, ba tsalelwa mo mangoleng a gagwe. 24Josefe a raya ba ga gabo a re: “Ke a swa; Modimo o tlaa lo lekola ruri, mme o tlaa lo tlhatlosa mo lefatsheng leno, o lo isa kwa lefatsheng le o le ikaneletseng Aberahame le Isake le Jakobe.” 25Josefe a ikanisa bana ba Iseraele a re: “Modimo o tlaa lo lekola ruri mme lo tlaa rwala marapo a me lo a tlhatlosa mono.” 26Jalo Josefe a swa a le dinyaga di le 110; mme ba mo omisa ka bongaka; a tsenngwa mo letloleng mo Egepeto.
