Jakobe o segofatsa Eferaime le Manase
1Ga dirala e rile morago ga dilo tse, mongwe a raya Josefe a re: “Bona, rraago o a lwala;” mme a tsaya bomorwawe ba babedi, e bong Manase, le Eferaime a ya nabo. 2Mongwe a bolelela Jakobe a re: “Bona, Josefe morwao o tla kwano go wena.” Mme Iseraele a ikakatlolola a dula mo bolaong. 3Jakobe a raya Josefe a re: “Modimo Mothatayotlhe o ne wa bonala kwa go nna ke le kwa Luse mo lefatsheng la Kanana, mme wa ntshegofatsa. 4Wa nthaya wa re: ‘Bona, ke tlaa go atisa, ke go ntsifatsa, ke tlaa dira lesomo la ditšhaba ka wena, mme lefatshe le, ke tlaa le naya losika lwa gago sehularong sa gago go nna thuo ya bosakhutleng.’
5“Jaana bomorwao ba babedi, ba o ba bonyeng mono mo lefatsheng la Egepeto ke ise ke tle kwano go wena mo Egepeto, ke ba me; Eferaime le Manase, fela jaaka Rubene le Simeone ba tlaa nna ba me. 6Lotsalo lwa gago lo o tlaa lo bonang morago ga bone, e tlaa nna lwa gago; ba tlaa bidiwa ka fa leineng la bomorwa rraabo mo bosweng jwa bone. 7Ka ga me, e rile ke tswa kwa Patana, Ragele a swela fa go nna mo lefatsheng la Kanana mo tseleng, go sa ntse go le sebaka go ya go fitlha kwa Eferatha; mme ka mo fitlha gone mo tseleng e e yang Eferatha, ke gore Bethelehema.”
8Iseraele a leba bomorwa Josefe a re: “Ke bomang ba?”
9Josefe a raya rraagwe a re: “Ke bomorwaake ba Modimo o ba nneileng mono.” Jakobe a ba a re: “Ke a go rapela, a ko o ba tlise fa go nna mme ke tlaa ba segofatsa.” 10Matlho a ga Iseraele a bo a le looto ka botsofe, a sa bone. Josefe a ba atametsa fa go ene, mme a ba atla, a ba kamatlela. 11Mme Iseraele a raya Josefe a re: “Ke ne ke sa solofela fa ke ka tlhola ke bona sefatlhogo sa gago; mme bona, Modimo o mpontshitse le lone losika lwa gago.” 12Josefe a ba ntsha fa gare ga mangole a gagwe; a ikobela ka sefatlhogo fa fatshe.
13Josefe a ba tsaya boo babedi, Eferaime ka seatla se se siameng sa gagwe, a mo lebaganya le seatla sa molema sa ga Iseraele, le Manase ka seatla sa molema sa gagwe, a mo lebaganya le seatla se se siameng sa ga Iseraele, mme a ba atametsa. 14Iseraele a ntsha seatla sa gagwe se segolo a se baya mo tlhogong ya ga Eferaime, yo e leng yo mmotlana, le seatla sa molema sa gagwe a se baya mo tlhogong ya ga Manase, a fapaanya diatla tsa gagwe ka kitso, gonne Manase e ne e le wa ntlha. 15A segofatsa Josefe a re:
“Modimo
o borraetsho Aberahame le Isake
ba neng ba sepela fa pele ga one,
Modimo o o nkotlileng
mo botshelong jotlhe jwa me
le mo nakong eno,
16Moengele yo o nthekolotseng
mo bosuleng jotlhe fela,
a a segofatse basimane ba;
mme a leina la me le rewe bone,
le leina la borraetsho
Aberahame le Isake.
A ba ntsifale ba tle ba nne bantsi
mo gare ga lefatshe.”
17E rile Josefe a bona fa rraagwe a beile seatla sa gagwe se se siameng mo tlhogong ya ga Eferaime, ga mo itumolola; mme a tsholetsa seatla sa ga rraagwe go se tlosa mo tlhogong ya ga Eferaime, a re o se isa mo tlhogong ya ga Manase. 18Josefe a raya rraagwe a re: “E seng jalo rra; gonne yo ke ene wa ntlha; baya seatla sa gago se se siameng mo tlhogong ya gagwe.”
19Mme rraagwe a gana a re: “Ke a itse morwaaka, ke a itse; le ene o tlaa nna morafe, le ene o tlaa nna mogolo; le fa go ntse jalo monnawe o tlaa nna mogolo mo go ene, le losika lwa gagwe lo tlaa nna bontsi jwa merafe.”
20Mme a ba segofatsa ka letsatsi leo a re: “Iseraele o tlaa boka ka wena, go twe:
“ ‘A Modimo o go dire
o nne jaaka Eferaime
le jaaka Manase;’ ”
mme a baya Eferaime kwa pele ga Manase.
21Iseraele a raya Josefe a re: “Bona, ke a swa; Modimo o tlaa nna le lona, o ba o lo isa gape kwa lefatsheng la borraeno. 22Gape, ke go abetse kabelo nngwe bogolo go bomorwa rraago, ke raya e ke e gapileng mo seatleng sa Baamore ka tšhaka ya me le ka bora jwa me.”
