GENESISE 46

₁Iseraele a ineela mo loetong le tsotlhe tse o nang natso, mme a fitlha kwa Beerešeba, a isetsa Modimo wa ga Isake rraagwe ditlhabelo gone. ₂Modimo wa bua le Iseraele ka diponatshegelo tsa bosigo wa re: “Jakobe, Jakobe!” a re: “Ke fano.”

₃Wa re: “Ke nna Modimo, Modimo wa ga rraago; o se ka wa boifa go hudugela kwa Egepeto; gonne ke tlaa dira morafe o mogolo ka wena gone. ₄Ke tlaa ya nao kwa Egepeto; le gone ruri ke tlaa ba ke go tlhatlosa gape; Josefe o tlaa baya seatla sa gagwe mo matlhong a gago.”

₅Jakobe a nanoga mo Beerešeba; mme bomorwa Iseraele ba tsaya Jakobe rraabo, le banyana ba bone, le basadi ba bone ka dikoloi tse Faro o neng a di rometse go ba tsaya ka tsone. ₆Ba tsaya dikgomo tsa bone, le dilwana tsa bone tse ba di bapetseng mo lefatsheng la Kanana, ba tla mo Egepeto, Jakobe le losika lotlhe lwa gagwe nae. ₇Bomorwawe le barwa bomorwawe nae, bomorwadie le bomorwadia bomorwawe, le losika lotlhe lwa gagwe a ya nalo kwa Egepeto.

₈Mme ake one maina a bana ba ga Iseraele ba ba fitlhileng mo Egepeto (Jakobe le bomorwawe): Rubene, motsalwapele wa ga Jakobe. ₉Bomorwa Rubene: Hanoke, le Palu, le Heserone le Karemi. ₁₀Bomorwa Simeone: Jemuele, le Jamine, le Ohate, le Jakine, Sohare, le Shaule, morwa mosadi mongwe wa Mokanana. ₁₁Bomorwa Lefi: Gerešone, le Kohathe, le Merari. ₁₂Bomorwa Juta: Ere, le Onane, Shela, le Perese, le Sera: boEre le Onane ba ne ba swetse mo lefatsheng la Kanana, mme bomorwa Perese e ne e le Heserone le Hamule. ₁₃Bomorwa Isakare: Tola, le Pua, le Jobe, le Shimerone. ₁₄Bomorwa Sebulone: Serete, le Elone, le Jahaleele. ₁₅Bao ke bomorwa Lea, ba o ne a ba bona le Jakobe kwa Patane-arame, ba na le morwadie Dina; batho botlhe ba e neng e le bomorwawe le bomorwadie ba ne ba le 33.

₁₆Bomorwa Gate: Sifione, le Hagi, Shuni, le Esebone, Eri, le Arote, le Areli. ₁₇Bomorwa Ašere: Imena, le Išefa, le Išifi, le Beria, le Sera kgaitsadia bone; le bomorwa Beria; Hebere, le Malekiele. ₁₈Bao ke bomorwa Silepa yo Labane o neng a mo naya Lea morwadie, bao o ne a ba bona le Jakobe, e bong batho ba le 16.

₁₉Bomorwa Ragele mogatsa Jakobe: Josefe le Benjamine. ₂₀Josefe a tshola Manase le Eferaime mo lefatsheng la Egepeto, Asenathe morwadia Potifera moperesiti wa One, o ne a ba bona nae. ₂₁Bomorwa Benjamine: Bela, le Bekere, le Ašabele, le Gera, Naamane, le Ehi, le Roše, le Mupime, le Hupime le Arete. ₂₂Bao ke bomorwa Ragele, ba ba tsetsweng ke Jakobe, mme fa ba le mmogo e ne e le batho ba le 14.

₂₃Bomorwa Dane: Hušime. ₂₄Le bomorwa Nafetali: Jahaseele, le Guni, le Jesere le Shileme. ₂₅Bao ke bomorwa Bileha; yo Labane o neng a mo naya morwadie Ragele, mme bao a ba bona le Jakobe; e ne e le batho ba supa ba le mmogo.

₂₆Batho botlhe ba ba tsileng le Jakobe mo Egepeto, ba ba duleng mo mankopeng a gagwe, kwa ntle ga basadi ba bomorwa Jakobe, ba le mmogo e ne e le batho ba 66. ₂₇Bomorwa Josefe ba o ba bonyeng mo Egepeto e ne e le batho ba le babedi; batho botlhe ba ntlo ya ga Jakobe ba ba tsileng mo Egepeto e ne e le 70.

₂₈Mme a eteletsa Juta kwa pele ga gagwe go ya kwa go Josefe gore a tle a mo supetse tsela e e yang kwa Gošene; mme ba fitlha mo lefatsheng la Gošene. ₂₉Josefe a baakanya kara ya gagwe a tlhatloga a ya go kgatlhantsha Iseraele rraagwe kwa Gošene. Mme a ya kwa go ene a wela mo thamong ya gagwe, a lela ka lobaka lo loleele a le fa thamong ya gagwe. ₃₀Iseraele a raya Josefe a re: “Jaanong a nke ke swe ka ke bonye sefatlhogo sa gago fa o sa ntse o tshedile.”

₃₁Josefe a raya bomorwa rraagwe le ba ntlo ya ga rraagwe a re: “Ke tlaa tlhatloga ke ya go begela Faro ke mo raya ke re: ‘Bomorwa rre le ba ntlo ya ga rre, ba ba ntseng ba le kwa lefatsheng la Kanana ba nkgorogetse. ₃₂Banna bao ke badisa, gonne tiro ya bone e ntse e le dikgomo; ba tsile le matsomane a bone, le matlhape a bone, le tsotlhe tse ba nang natso.’ ₃₃Go tlaa dirala gore motlhang Faro o lo bitsang a re: ‘Tiro ya lona ke eng?’ ₃₄Lo re: ‘Batlhanka ba gago, tiro ya bone e ntse e le dikgomo fela, e sa le ka bokau jwa rona le gompieno, rona le borraetsho;’ gore lo tle lo age mo lefatsheng la Gošene; gonne modisa mongwe le mongwe ke moila mo go Baegepeto.”