Josefe o ikitsise barwa-rraagwe
1Foo Josefe a palelwa ke go itshwara fa pele ga botlhe ba ba emeng fa go ene, mme a kua a re: “Ntshang banna botlhe ba tswe fa go nna.” Mme ga se ka ga ema ope nae fa Josefe a ikitsise bomorwa rraagwe. 2A tsholetsa lentswe la gagwe ka selelo; mme Baegepeto ba utlwa, le ntlo ya ga Faro ya utlwa. 3Josefe a raya bomorwa rraagwe a re: “Ke nna Josefe; a rre o sa ntse a tshedile?” Bomorwa rraagwe ba retelelwa ke go mo fetola; gonne ba huduilwe ke go mmona. 4Josefe a raya bomorwa rraagwe a re: “Ke a lo rapela, a ko lo nkatamele.” Ba atamela. Mme a re: “Ke Josefe, monnaa lona, yo lo mo rekisitseng a tlisiwa Egepeto. 5Jaana lo se ka lwa hutsafala le fa e le go ikgalefela ka gobo lo ne lwa nthekisa ka tla kwano; gonne Modimo o nthomile fa pele ga lona go boloka botshelo. 6Gonne leuba le dikile le ntse dinyaga tse pedi tse mo lefatsheng; go sa na le dinyaga di le tlhano tse go se ketlang go nna le letsema le fa e le thobo mo go tsone. 7Modimo o nthomile pele ga lona go lo bolokela masalela mo lefatsheng, le go lo tshetsa ka kgololo e kgolo. 8Jalo e ne e se lona ba lo ntlisitseng kwano, e ne e le Modimo; mme o ntirile go nna rraagwe Faro, le morena wa ntlo yotlhe ya gagwe, le molaodi wa lefatshe lotlhe la Egepeto.
9“Itlhaganeleng, lo tlhatlogele kwa go rre, lo mo reye lo re: ‘Morwao Josefe o bua jaana a re: Modimo o ntirile morena wa lefatshe la Egepeto lotlhe fela, hudugela kwano go nna, o se ka wa diega. 10O tlaa aga mo lefatsheng la Gošene; o tlaa nna gaufi le nna, wena, le bana ba gago, le bana ba bana ba gago, le matsomane a gago, le matlhape a gago, le tsotlhe tse o nang natso. 11Ke tlaa go otlela gone; gonne go sa ntse go na le dinyaga di le tlhano tsa leuba; e se re gongwe wa humanega, wena, le ba ntlo ya gago le tsotlhe tse o nang natso.’
12“Mme, bonang, matlho a lona a a bona, le matlho a ga nnake Benjamine, fa e le molomo wa me o o buang le lona. 13Lo bolelele rre ka ga kgalalelo yotlhe ya me mo Egepeto, le ka ga tsotlhe tse lo di bonyeng; mme rre lo akofe lo mo lere kwano.”
14A wela mo thamong ya ga Benjamine monnawe, a lela a le mo thamong ya gagwe. 15A atla bomorwa rraagwe botlhe, a lelela mo go bone; morago ga mo, bomorwa rraagwe ba bua nae.
16Tumo ya gone ya utlwala mo ntlong ya ga Faro, ga twe: “Bomorwa rraagwe Josefe ba tsile;” mme ga kgatlha Faro thata le batlhanka ba gagwe. 17Foo Faro a raya Josefe a re: “Raya bomorwa rraago o re: ‘Dirang se: Belesang dipelesa tsa lona, lo tsamaye, lo ye kwa lefatsheng la Kanana. 18Lo tseye rraeno le ba matlo a lona, lo tle kwano go nna; ke tlaa lo naya molemo wa lefatshe la Egepeto, lo tlaa ja mafura a lefatshe.’ 19Jaanong o laotswe, lona dirang jaana; lo tseele banyana ba lona le basadi ba lona dikoloi mo lefatsheng la Egepeto, lo lere rraeno lo tle. 20Le gone se tlhokomeleng thoto ya lona gonne molemo wa lefatshe la Egepeto ke wa lona.”
21Bomorwa Iseraele ba dira jalo; Josefe a ba neela dikoloi, ka fa taolong ya ga Faro, a ba a ba naya mefago. 22Botlhe fela, a naya mongwe le mongwe diaparo tsa go fapaanya, Benjamine ene a mo naya dipapetla tsa selefera di le makgolo mararo le diaparo di le tlhano tsa go fapaanya. 23Tsa ga rraagwe a di ba neelela jaana; e bong diesela di le some di belesitswe dilo tse di monate tsa Egepeto, le diesela tse dinamagadi di le some di belesitswe mabele le senkgwe le dijo tse rraagwe o tlaa di jelang mo tseleng. 24Jalo a naya bomorwa rraagwe tsela, ba tsamaya; a ba raya a re: “Lo bone gore lo se omane mo tseleng.”
25Ba tswa mo Egepeto, ba tla mo lefatsheng la Kanana kwa go Jakobe rraabo. 26Ba mmolelela ba re: “Josefe o sa tshedile e bile o molaodi wa lefatshe lotlhe la Egepeto.” Pelo ya gagwe ya idibala, gonne a sa ba dumele.
27Ba mmolelela mafoko otlhe a ga Josefe a o a buileng nabo; o rile a bona dikoloi tse Josefe o di rometseng go mo tsaya ka tsone, mowa wa ga Jakobe rraabo wa idibologa. 28Iseraele a re: “Go lekanye; Josefe morwaake o sa tshedile; ke tlaa ya ke mmona ke ise ke swe.”
