Barwa-rraagwe Josefe ba boela kwa Egepeto le Benjamine
1Leuba le ne le le botlhoko mo lefatsheng. 2Ga dirala ya re ba sena go ja ba swetsa mabele a ba tsileng nao kwa Egepeto, rraabo a ba raya a re: “Yang gape, lo re rekele dijonyana.”
3Juta a bua nae a re: “Monna yole o ne a re tlhomamiseletsa ruri a re: ‘Ga lo ketla lo bona sefatlhogo sa me fa monnaa lona a sa tle le lona.’ 4Fa o ka lesa monnaa rona ra tsamaya nae, re tlaa fologa re go rekela dijo. 5Fa o sa mo lese, ga re nka re fologa; gonne monna yole o re reile a re: ‘Ga lo nka lo bona sefatlhogo sa me fa monnaa lona a sa tle le lona.’ ”
6Iseraele a re: “Ana lo ne lo ntirelelang bosula lo bolelela monna yoo fa lo sa na le mongwe monnaa lona?”
7Ba re: “Monna yoo o re boditse thata ka ga rona ka rosi, le ka ba ga rona a re: ‘A rraeno o sa tshedile? A lo sa na le mongwe monnaa lona?’ Ra mmolelela ka fa mafoko ao a ne a ntse ka gone; a re ne re ka itse fa a tlaa re raya a re: ‘Lo tle le monnaa lona’?”
8Juta a raya Iseraele rraagwe a re: “Lesa mosimane ke tsamaye nae, re tlaa tloga re tsamaya, gore re tshele, re se ka ra a swa, rona le wena, le bone banyana ba rona. 9Nna ke tlaa tlhomamisa pabalesego ya gagwe; o tlaa mo lopa mo seatleng sa me. E tlaa re fa ke sa tle nae ka mmaya fa pele ga gago, foo molato o tlaa bo o ntshwere ka bosakhutleng. 10Gonne fa re ka bo re ne re sa ka ra diega, ruri re ka bo re bile re boile lwa bobedi.”
11Rraabo Iseraele a ba raya a re: “Fa go ntse jalo, a lo ko lo dire jaana; lo tsee maungo a a tlhophegileng a lefatshe mo dilwaneng tsa lona, lo isetse monna yoo mpho, balemonyana, le dinotshenyana, le dilo tse di lonko lo monate, tsa malao le mura, le dinuta, le dithamane. 12Lo tseye madi sebedi mo seatleng sa lona; madi a lo neng lo a reboletswe mo melomong ya dikgetse tse tsa lona, lo a tshole gape mo atleng sa lona; e tlaa re gongwe e bo e ne e le go a tlodisa matlho fela. 13Le gone ene monnaa lona lo mo tseye, lo nanoge, lo ye kwa go monna yoo. 14Modimo Mothatayotlhe a lo neye kutlwelo botlhoko fa pele ga monna yoo, gore a tle a lo gololele morwa rraeno yo mongwe le Benjamine. Mme fa ke thopiwa bana ba me, ke a thopiwa.”
15Banna ba, ba tshola mpho, ba ba ba tshola madi sebedi mo seatleng sa bone, le Benjamine; ba nanoga ba fologela kwa Egepeto, ba ema fa pele ga Josefe. 16E rile Josefe a bona fa Benjamine a na nabo, a raya molebalebi wa ntlo ya gagwe a re: “Isa banna bao mo ntlong; o tlhabe, o etleetse, gonne banna bao ba tlaa ja le nna motshegare o mogolo.” 17Monna yo a dira jaaka Josefe a buile; mme monna yo a isa banna ba mo ntlong ya ga Josefe.
18Banna ba, ba boifa, ka gobo ba isiwa mo ntlong ya ga Josefe; ba re: “Re isiwa mo ntlong ka ntlha ya madi a re a reboletsweng mo dikgetseng tsa rona lwa ntlha, gore a re bonele seipato, a itse go re wela, a re ntsha batlhanka, le diesela tsa rona a di gapa.” 19Ba atamela molebalebi wa ntlo ya ga Josefe, ba bua nae fa mojakong wa ntlo. 20Ba re: “Ao morena, re kile ra tla ruri lwa ntlha go reka dijo. 21Ga dirala, e rile re fitlha felo kwa re lalang gone, ra bofolola dikgetse tsa rona, mme bona, madi a mongwe le mongwe a bo a le mo molomong wa kgetse, madi a rona a le selekanyo se se tletseng; re bile re a tshotse gape mo seatleng sa rona. 22Le madi a mangwe re tsile nao go tla go reka dijo; ga re itse yo o tsentseng madi a rona mo dikgetseng tsa rona.”
23Mme a re: “A kagiso e nne le lona, se boifeng. Modimo wa lona, le Modimo wa ga rraeno o lo neile khumo mo dikgetseng tsa lona; ke ne ka amogela madi a lona.” Mme a ntshetsa Simeone kwa go bone.
24Monna yo a isa banna bao mo ntlong ya ga Josefe, a ba naya metsi, ba itlhapisa dinao; a ba a fa diesela tsa bone dijo. 25Ba baakanya mpho ya bone ba lebelela go tla ga Josefe motshegare o mogolo; gonne ba utlwile fa ba tlaa ja dijo gone. 26E rile Josefe a tla gae, ba isa mpho e ba e tshotseng kwa go ene mo ntlong, ba mo ikobelela fa fatshe. 27A ba botsa go tshela ga bone a re: “A rraeno o sa tshedile, ke raya monnamogolo yo lo kileng lwa bua ka ga gagwe, a o sa tshedile?”
28Ba re: “Motlhanka wa gago rraa rona o tshedile sentle, o sa ntse a tshela.” Mme ba oba ditlhogo tsa bone, ba ikokobetsa.
29A tsholetsa matlho a gagwe, a bona Benjamine, monnawe, ngwana wa ga mmaagwe a re: “A yo ke ene monnaa lona yo mmotlana, yo lo mo mpoleletseng?” Mme a re: “A Modimo o nne pelontle nao morwaaka.” 30Josefe a akofa, ka gobo mateng a gagwe a hohomela monnawe; a senka fa o ka lelelang gone; a tsena mo ntlong ya gagwe e e kwa teng, a lelela gone. 31Mme a tlhapa sefatlhogo, a tswa; a ithiba, a re: “Tsholang dijo.” 32Ene ba mo tsholela a le esi, le bone ba tsholelwa ba le bosi, le bone Baegepeto ba ba jang nae, ba le bosi; gonne Baegepeto ba ne ba sa ka ke ba a ja dijo le Bahebere; gonne moo, ke moila mo go Baegepeto. 33Ba dula fa pele ga gagwe, wa ntlha ka fa go tsalweng ga gagwe, le yo mmotlana ka fa bobotlaneng jwa gagwe; banna ba, ba gakgamalelana. 34A tloga a ba tabolela dijo, tsa isiwa kwa go bone; tse di tabolelwang Benjamine tsa bo di le kana ka tsa ba bangwe ba le batlhano. Ba a nwa, ba dira mokete nae.
