Josefe le mosadi wa ga Potifare
1Josefe a isiwa kwa Egepeto. Potifare mogolwane wa ga Faro le kgosana ya maotlana, wa Moegepeto a mo reka mo seatleng sa Baišemaele ba ba mo isitseng gone. 2Jehofa a nna le Josefe, a ba a nna monna yo o tlhogonolofetseng, a nna mo ntlong ya mong wa gagwe wa Moegepeto. 3Mong wa gagwe a bona fa Jehofa a na nae, le go re, Jehofa o tlhogonolofatsa dilo tsotlhe tse o di dirang. 4Josefe a bona tsalano mo matlhong a gagwe, mme a mo direla; a mmaya molebalebi wa ntlo ya gagwe, le dilo tsotlhe tse o nang natso a di tsenya mo seatleng sa gagwe. 5Ga dirala e sale ka lobaka lo o mmeileng molebalebi ka lone wa ntlo ya gagwe, le wa dilo tsotlhe tse a nang natso, Jehofa o na a segofatsa ntlo ya Moegepeto ka ntlha ya ga Josefe; mme tshegofatso ya ga Jehofa ya nna mo go tsotlhe tse a nang natso, mo ntlong le kwa nageng. 6A lesa tsotlhe tse a nang natso mo seatleng sa ga Josefe; a sa itse sepe se a nang naso, fa e se dijo tse o di jang fela. Josefe a bo a le montle, a bopegile sentle. 7Ga dirala ya re morago ga dilo tse, mogatsa mong wa gagwe a eletsa Josefe ka matlho; mme a re: “Robala le nna.” 8Mme a gana, a raya mogatsa mong wa gagwe a re: “Bona, monngwake ga a itse sepe se se mo go nna mo ntlong, o tsentse tsotlhe tse a nang natso mo seatleng sa me; 9mo ntlong e, ga go na ope yo o mogolo mo go nna, le gone ga a a baya sepe kwa ntle ga me, fa e se wena, ka gobo o le mosadi wa gagwe; kana foo bosula jo bogolo jo ke ka bo dira jang, ke leofela Modimo?” 10Mme ya re a ntse a bua le Josefe ka malatsi go tlhomagana, a se ka a mo reetsa go rapama fa go ene le fa e le go nna nae.
11Ga dirala ya re ka lobaka loo Josefe a tsena mo ntlong go dira tiro ya gagwe; mme go ne go se na ope wa banna ba ntlo gone mo teng. 12Mosadi a mo phamola ka seaparo a re: “Robala le nna.” Josefe a tlogela seaparo sa gagwe mo seatleng sa mosadi a tshaba, a tswela kwa ntle. 13Ga dirala ya re mosadi a bona fa a tlogetse seaparo sa gagwe mo seatleng sa gagwe, a bile a tshabetse kwa ntle, 14a kua banna ba ntlo ya gagwe, a bua nabo, a re: “Bonang, o tsentse motho wa Mohebere mo go rona go re sotla; o ne a tsena kwa go nna gore a robale le nna, mme ka goa ka lentswe le legolo. 15Ga dirala ya re a utlwa ke tsholetsa lentswe la me ke goa, a tlogela seaparo sa gagwe fa go nna a tshaba, a tswela kwa ntle.”
16A baya seaparo sa gagwe fa go ene, ya ba ya tla mong wa gagwe a tla gae. 17A bua nae ka mafoko a, a re: “Motlhanka wa Mohebere yo o mo tlisitseng mo go rona o ne a tsena kwa go nna go ntshotla. 18Ga dirala e rile ke tsholetsa lentswe la me ke goa, a tlogela seaparo sa gagwe fa go nna a tshabela kwa ntle.”
19Ga dirala ya re mong wa gagwe a utlwa mafoko a mosadi wa gagwe o a buang nae a re: “Motlhanka wa gago o ntirile jaana,” bogale jwa gagwe jwa tuka. 20Mong wa ga Josefe a mo tsenya mo ntlong ya kgolegelo, felo kwa bagolegwa ba kgosi ba golegelwang gone; a nna gone mo ntlong ya kgolegelo. 21Jehofa a nna le Josefe, a mo supetsa pelonomi, a mo naya tsalano mo matlhong a modisa wa ntlo ya kgolegelo. 22Modisa wa ntlo ya kgolegelo a tsenya bagolegwa botlhe ba ba mo ntlong ya kgolegelo mo seatleng sa ga Josefe; sengwe le sengwe se se dirwang gone ya nna ene modiri wa sone. 23Modisa wa ntlo ya kgolegelo ga a ka a tlhokomela sepe se se mo thateng ya ga Josefe ka gobo Jehofa a na nae; se o se dirang Jehofa a se tlhogonolofatsa fela.
