Modimo o segofatsa Jakobe kwa Bethele
1Modimo wa raya Jakobe wa re: “Nanoga o tlhatlogele kwa Bethele, o age gone; o dire aletara gone, o se direle Modimo o o kileng wa go iponaletsa gone jale ka o tshaba sefatlhogo sa ga mogoloo Esau.”
2Foo Jakobe a raya ba ntlo ya gagwe le botlhe ba o nang nabo a re: “Tlosang medimo e sele e e mo go lona, lo iitshekise, lo apare diaparo di sele. 3A re nanogeng re tlhatlogeleng kwa Bethele; ke tlaa dira aletara gone, ke e direla Modimo o o nkarabileng mo letsatsing la pitlagano ya me, wa ba wa nna le mo tseleng e ke neng ke tsamaya ka yone.” 4Ba neela Jakobe medimo yotlhe e sele e e mo diatleng tsa bone, le manyena a a mo ditsebeng tsa bone; Jakobe a di fitlha ka fa tlase ga setlhare sa mooka se se leng ka fa Shekeme.
5Ba eta; mme ga bo go le therego e kgolo mo metseng e e mo tikologong ya bone, mme ba se ka ba latela bomorwa Jakobe. 6Jalo Jakobe a fitlha kwa Luse o o mo lefatsheng la Kanana, ke go re, Bethele, ene le batho botlhe ba o nang nabo. 7A aga aletara gone, a raya felo foo leina a re, Elebethe-ele; ka gobo Modimo o ne wa mo senogela gone jale ka a tshaba sefatlhogo sa ga mogolowe. 8Mme Debora, mmelegi wa ga Rebeka a swa, a fitlhwa ka fa tlase ga setlhare sa Bethele, fa tlase ga mooka, ke gone leina la one la bidiwa Alonabakutha.
9Modimo wa bonala kwa go Jakobe gape, ka a tswa Patanaarame, wa mo segofatsa. 10Modimo wa mo raya wa re: “Leina la gago ke Jakobe; leina la gago ga le ketla le tlhola le bidiwa Jakobe, mme leina la gago go tlaa twe, Iseraele:” A mo raya leina a re, Iseraele. 11Modimo wa mo raya wa re: “Ke nna Modimo Mothatayotlhe; ata, o ntsifale. Morafe o tlaa tswa mo go wena le lesomo la merafe, le dikgosi di tlaa tswa mankopeng a gago. 12Lefatshe le ke kileng ka le naya Aberahame le Isake, ke tlaa le go naya; le losika lwa gago sehularong sa gago ke tlaa lo naya lefatshe le.” 13Modimo wa tlhatloga wa tswa fa go ene fa felong fa o buileng nae gone. 14Jakobe a tlhoma segopotso felong fa o buileng nae gone, e le segopotso sa lentswe, a thela tshupelo e e nowang mo go sone, a ba a thela lookwane mo go sone. 15Jakobe a raya leina la felo fa Modimo o buileng nae gone a re, Bethele.
Loso lwa ga Ragele
16Ba eta ba tswa Bethele; mme ga bo go sa ntse go na le sebaka ba ise ba fitlhe kwa Eferatha, Ragele a simolola go belega a bona pelego e e thata. 17Ga dirala ya re a le mo pelegong e e thata mmelegisi a mo raya a re: “O se ka wa boifa ka jaana o tlaa bona ngwana yo mongwe wa mosimane.” 18Ga dirala ya re mowa wa gagwe o tswa, ka a ne a swa, a raya leina la ngwana a re, Bononi; rraagwe a mmitsa Benjamine.
19Ragele a swa, a fitlhwa mo tseleng e e yang Eferatha, ke one Bethelehema. 20Jakobe a emisa sefikantswe fa godimo ga phupu ya gagwe; ke sone segopotso sa phupu ya ga Ragele le gompieno. 21Iseraele a eta, a tsharolola mogope wa gagwe ka kwa pele ga kago e e godileng ya phemelo ya Etere.
Barwa Jakobe
22Ga dirala ya re Iseraele a sa ntse a agile mo lefatsheng leo, Rubene a ya a lala le Bileha mogadingwana wa ga rraagwe; mme Iseraele a utlwa. Jaana bomorwa Jakobe ba bo ba le 12. 23Bomorwa Lea ke ba; Rubene, wa ntlha wa ga Jakobe, Simeone, Lefi, Juta, Isakare le Sebulone. 24Bomorwa Ragele ke ba; Josefe le Benjamine. 25Bomorwa Bileha, lelata la ga Ragele ke ba: Dane le Nafetali. 26Bomorwa Silepa, lelata la ga Lea ke ba: Gate le Ašere. Ba ke bone bomorwa Jakobe ba o ba bonyeng kwa Patanaarame.
Loso lwa ga Isake
27Jakobe a fitlha kwa go Isake rraagwe, kwa Mamere, kwa motseng wa Kiriathe-areba, o e leng Heberone, kwa Aberahame le Isake ba neng ba jaka gone. 28Malatsi a ga Isake e ne e le dinyaga di le 180. 29Isake a khutla, a swa, a phuthwa a ya kwa bathong ba ga gabo a tsofetse, a tletse malatsi; mme bomorwawe, Esau le Jakobe ba mo fitlha.
