GENESISE 34

₁Dina, morwadia Lea, yo o mmonyeng le Jakobe, a tswa a ya go bona bomorwadia lefatshe. ₂Shekeme morwa Hamore wa Mohife, kgosana ya lefatshe leo, a mmona; mme a mo tsaya a lala nae, a mo senya. ₃Pelo ya gagwe ya ngaparela Dina morwadia Jakobe, a rata morweetsana yo; mafoko a gagwe a tsena mo pelong ya morweetsana. ₄Shekeme a bua le Hamore rraagwe a re: “Mpatlela morweetsana yo, a nne mosadi wa me.”

₅Jaana Jakobe a utlwa fa a leswefaditse Dina morwadie; bomorwawe ba bo ba na le dikgomo tsa gagwe kwa nageng; Jakobe a itidimalela fela ba tsamaya ba tla. ₆Hamore rra Shekeme, a tswela kwa go Jakobe a ya go bua nae. ₇E rile bomorwa Jakobe ba utlwa ba tloga ba tla gae ba tswa kwa nageng; banna bao ba hutsafala, ba nna bogale thata ka a dirile boatla mo go Iseraele ka go lala le morwadia Jakobe; e le selo se se sa tshwanelang go dirwa. ₈Hamore a bua nabo a re: “Pelo ya ga morwaake Shekeme e tlhoafaletse morwadia lona; ke a lo rapela, lo mo mo neye gore a nne mosadi wa gagwe, ₉mme lo nyalane le rona; re neeleng bomorwadia lona, le lona lo tseye bomorwadia rona. ₁₀Lo tlaa aga le rona; lefatshe le tlaa nna fa pele ga lona, agang lo bo lo bapale mo go lone lo bone dithuo mo go lone.”

₁₁Shekeme a raya rra morweetsana le bokgaitsadie a re: “A nke ke bone tsalano mo matlhong a lona, se lo tlaa se mpalelang ke tlaa se ntsha. ₁₂Le fa lo ntopa bogadi le ketleetso le fa go le kae, ke tlaa ntsha ka fa lo tlaa ntopang ka gone; se se gone fela ke gore nnayang morweetsana a nne mosadi wa me.”

₁₃Bomorwa Jakobe ba fetola Shekeme le rraagwe Hamore ka boferefere, ba bua ka a ne a leswefaditse Dina kgaitsadia bone. ₁₄Ba ba raya ba re: “Ga re ka ke ra dira selo se, go neela motho yo o sa rupang kgaitsadia rona; gonne selo seo e tlaa bo e le kgobo mo go rona. ₁₅Re tla dumalana le lona ka selo se, se le sosi fela; fa lo ka nna jaaka rona, fa banna botlhe ba lona ba ka rupisiwa. ₁₆Foo re tlaa lo neela bomorwadia rona, re ba re tsaya bomorwadia lona, re aga le lona, mme re tlaa tswa batho ba le bangwe fela. ₁₇E tlaa re fa lo gana go re utlwa, go rupa, foo re tlaa tsaya morwadia rona, mme re tsamaye.”

₁₈Mafoko a bone a kgatlha Hamore le Shekeme morwa Hamore. ₁₉Lekau ga le a ka la diega go dira selo se, gonne le ne le kgatlhilwe ke morwadia Jakobe; le ne le tlotlwa bogolo go botlhe ba ntlo ya ga rraagwe.

₂₀Hamore le Shekeme morwawe ba tla mo kgorong ya motse wa bone, ba bua le banna ba motse wa bone ba re: ₂₁“Banna ba ba kagiso le rona; ke gone a ba age mo lefatsheng le, ba bapale mo go lone; gonne, bonang lefatshe le ba lekanye. A re ba tseeleng bomorwadia bone go nna basadi ba rona le rona, re ba neeleng bomorwadia rona. ₂₂Banna bao ba ka dumalana le rona go aga le rona le go tswa batho ba le bangwe fela ka selo se, se le sosi fela, fa banna botlhe ba ba mo go rona ba ka rupa jaaka bone ba rupile. ₂₃Dikgomo tsa bone le thoto ya bone le dilo tsotlhe tsa bone, a ga di ketla di nna tsa rona? A re dumalaneng le bone fela, mme ba tlaa aga le rona.” ₂₄Botlhe ba ba tswang ka kgoro ya motse wa gagwe ba utlwa Hamore, le Shekeme morwawe; mme banna botlhe ba rupisiwa, e bong botlhe ba ba tswang ka kgoro ya motse wa gagwe.

₂₅Ga dirala ya re ka letsatsi la boraro ka ba le botlhokong, bomorwa Jakobe ba le babedi, e bong Simeone le Lefi, bokgaitsadia Dina mongwe le mongwe a tsaya tšhaka ya gagwe, ba wela motse ka pelokgale, ba bolaya banna botlhe fela. ₂₆Ba bolaya Hamore le Shekeme morwawe ka bogale jwa tšhaka, ba ntsha Dina mo ntlong ya ga Shekeme ba tswa ba tsamaya. ₂₇Bomorwa Jakobe ba tla mo go ba ba bolailweng, ba thopa motse, ka gobo ba ne ba leswefaditse kgaitsadia bone. ₂₈Ba gapa matsomane a bone, le matlhape a bone, le diesela tsa bone, le se se mo motseng, le se se kwa nageng. ₂₉Le lohumo lotlhe lwa bone, le banyana botlhe ba bone, le basadi ba bone, ba ba tshwara ba ba thopa, e bong tsotlhe tse di mo matlong.

₃₀Jakobe a raya Simeone le Lefi a re: “Lo ntshwentse, lo nnkgisitse sebodu mo banning ba lefatshe le mo go Bakanana, le mo go Baperise. Nna ka ke le mmotlana mo palong, ba tlaa nkokoanela ba mpolaya; ke tlaa nyelediwa, nna le ba ntlo ya me.”

₃₁Ba re: “A o ne a ka direla kgaitsadia rona jaaka seaka?”