Jakobe a goroga kwa ga Labane
1Jakobe a tswelela mo loetong lwa gagwe, a fitlha mo lefatsheng la bana ba botlhabatsatsi. 2A leba, mme bonang, ga bo go le sediba mo nageng; mme bonang ga bo go bothile matsomane a le mararo a dinku fa go sone; gonne ba ne ba tle ba gelelele matsomane mo sedibeng seo. Letlapa le le mo molomong wa sediba la bo le le legolo. 3Matsomane otlhe a ne a tle a phuthegele foo, mme ba pitike letlapa ba le tlose mo molomong wa sediba ba gelelele dinku, mme ba itse go ba ba baya letlapa mo bonnong jwa lone mo molomong wa sediba.
4Jakobe a ba raya a re: “Bagaetsho, lo ba kae?” Ba re: “Re ba Harane.”
5A ba raya a re: “A lo itse Labane morwa Nahore?” Ba re: “Re a mo itse.”
6A ba raya a re: “A o tshedile sentle?” Ba re: “O tshedile sentle; bona, Ragele morwadie o etla, o tla le dinku.”
7A re: “Bona, go sa le motshegare ga e ise e nne lobaka lwa go phutha dikgomo; gelelelang dinku lo tsamaye lo ye go di fudisa.”
8Ba re: “Ga re ka ke ra dira jalo matsomane a ise a phuthege, ba pitike letlapa mo molomong wa sediba; e be e le gone re gelelelang dinku.”
9A re a sa ntse a bua nabo Ragele a tla a na le dinku tsoo rraagwe; gonne e ne e le ene yo o di disang. 10Ya re Jakobe a bona Ragele morwadia Labane, kgaitsadia mmaagwe, le dinku tsoo Labane kgaitsadia mmaagwe, Jakobe a atamela a pitika letlapa a le tlosa mo molomong wa sediba, a gelelela letsomane la ga Labane kgaitsadia mmaagwe. 11Jakobe a atla Ragele; a tsholetsa lentswe la gagwe a lela. 12Jakobe a bolelela Ragele fa a le oo rra rraagwe, fa a bile a le morwa Rebeka; morweetsana a siana a ya a bolelela rraagwe. 13Ya re Labane a utlwa mafoko a ga Jakobe ngwana wa ga kgaitsadie a siana a ya go mo kgatlhantsha, a mo tlamparela, a mo atla, a mo tlisa kwa ntlong ya gagwe, a bolelela Labane dilo tse tsotlhe fela. 14Labane a mo raya a re: “Ntla, o lesapo la me le nama ya me.” A tlhola nae lobaka lwa kgwedi.
Jakobe o direla Labane go nyala Ragele le Lea
15Labane a raya Jakobe a re: “E re ka o le ngwana wa ga rre a ke gore o tshwanetse go ntirela fela o sa bone sepe ka foo? Mpolelela tlhe, go re maduo a gago a tlaa nna eng?” 16Labane o ne a na le bana ba basetsane ba le babedi. Leina la yo mogolo go twe Lea, leina la yo mmotlana go twe Ragele. 17Lea a bo a le matlho a bokowa; Ragele a le montle, a bopegile sentle.
18Jakobe a rata Ragele; a re: “Ke tlaa go direla dinyaga di supa ka ntlha ya ga Ragele morwadio yo mmotlana.”
19Labane a re: “Go molemo fa ke ka mo naya wena bogolo go go mo naya monna o sele; nna le nna.” 20Jakobe a direla Ragele dinyaga di supa; tsa nna mo go ene jaaka ekete ke malatsinyana fela, ka ntlha ya lorato lo a mo ratileng ka lone.
21Jakobe a raya Labane a re: “Nnaya mosadi wa me, gonne malatsi a me a fetile, gore ke tsene kwa go ene.” 22Labane a phutha batho botlhe ba felo foo, a dira modiro. 23Mme ga dirala ya re go le ka maitseboa a tsaya Lea morwadie, a mo isa kwa go ene, Jakobe a tsena kwa go ene. 24Labane a ntsha Silepa lelata la gagwe a mo naya Lea go nna lelata la gagwe. 25Ga dirala ya re ka moso, bonang, ya bo e le Lea; Jakobe a raya Labane a re: “Ke eng se o se ntiretseng? A ga ke a go direlela Ragele? Ke ka ntlha yang o ntsieditse jaana?”
26Labane a re: “Ga go ke go dirwa jalo mono ga rona go ntsha yo mmotlana pele ga yo mogolo. 27Swetsa beke ya yo, re tlaa go naya yo mongwe le ene, ka ntlha ya tiro e o tlaa ntirelang ka yone ka dinyaga tse dingwe di supa.”
28Jakobe a dira jalo, a swetsa beke ya gagwe; Labane a mo naya Ragele morwadie go nna mosadi wa gagwe. 29Labane a ntsha Bileha lelata la gagwe a mo naya Ragele go nna lelata la gagwe. 30Jakobe a tsena le kwa go ene Ragele, a bo a bile a rata Ragele bogolo go Lea, a dira nae dinyaga tse dingwe di supa.
Bana ba ga Jakobe
31Jehofa a bona fa Lea a ilwa, mme a bula sebopelo sa gagwe; Ragele a bo a le moopa. 32Lea a nna moimana, a bona ngwana wa mosimane, a mo raya leina a re, Rubene; ka a re: “Ka gobo Jehofa o lebile patikego ya me; ka jaana monna wa me a tlaa nthata.” 33A nna moimana gape a bona ngwana wa mosimane; a re: “E re ka Jehofa a utlwile fa ke ilwa, ke gone ka moo o nneileng ngwana wa mosimane,” yo le ene a mo raya leina a re, Simeone. 34A nna moimana gape, a bona ngwana wa mosimane; a re: “Jaana gompieno monna wa me o tlaa kopanngwa le nna, gonne ke bonye bana ba basimane ba le bararo nae:” Ka moo leina la gagwe la rewa ga twe, Lefi. 35A nna moimana gape, a bona ngwana wa mosimane, mme a re: “Gompieno ke tlaa baka Jehofa;” ka gone moo a mo raya leina a re, Juta; mme a khutla go bona bana.
