Isake o aga kwa Gerare
1Ga nna leuba mo lefatsheng, morago ga leuba la ntlha le le kileng la nna mo metlheng ya ga Aberahame. Isake a ya kwa go Abimeleke, kgosi ya Bafilisitia kwa Gerare. 2Jehofa a bonala kwa go ene a re: “Se fologele kwa Egepeto; aga mo lefatsheng le ke tlaa le go bolelelang. 3O nne o jake mo lefatsheng le, ke tlaa nna nao, ke go segofatsa; gonne mafatshe otlhe a, ke tlaa a naya wena le losika lwa gago. Ke tlaa tlhomamisa maikano a ke a ikanetseng Aberahame rraago. 4Ke tlaa ntsifatsa losika lwa gago jaaka dinaledi tsa legodimo, ke ba ke naya losika lwa gago mafatshe a otlhe fela. Merafe yotlhe ya lefatshe e tlaa segofala mo losikeng lwa gago, 5ka gobo Aberahame a ne a utlwa lentswe la me a boloka kaelo ya me, ditaolo tsa me, ditayo tsa me, le melao ya me.”
6Isake a aga mo Gerare. 7Banna ba felo foo ba mmotsa ka ga mosadi wa gagwe, mme a re: “Ke kgaitsadiake,” ka a boifa go re: “Ke mosadi wa me” gonne a re: “E tlaa re gongwe banna ba felo fa ba mpolaye ka ntlha ya ga Rebeka,” ka a ne a le montle go lejwa. 8Mme ga dirala ya re a sena go nna gone ka lobaka lo loleele, Abimeleke kgosi ya Bafilisitia a okomela ka fensetere, a leba, a bona Isake a tshameka le Rebeka mosadi wa gagwe. 9Abimeleke a bitsa Isake a re: “Bona, ruri ke mosadi wa gago! O ne o bua jang o re: ‘Ke kgaitsadiake’?” Isake a mo raya a re: “E ne e le ka gobo ke re: ‘E ka re gongwe ka swa ka ntlha ya gagwe.’ ”
10Abimeleke a re: “Seo se o se re diretseng ke eng? Motho mongwe o ka bo a letse le mosadi wa gago a sa gopola sepe, o ka bo e le fano o re tshwarisitse molato.” 11Abimeleke a laya batho botlhe a re: “Yo o amang monna yo le fa e le mosadi wa gagwe, ruri o tlaa bolawa.”
12Isake a lema mo lefatsheng leo, kgetsi ya peo ya mmusetsa dikgetsi di le lekgolo mo thobong ya ngwaga oo, mme Jehofa a mo segofatsa. 13Monna yo, a nna mogolo, a nna a humela pele a ba a tla a nna mogolo thata. 14A na le dithuo tsa matsomane le dithuo tsa matlhape, le batho ba lolwapa ba le bantsi, mme Bafilisitia ba mo fufegela. 15Mme jaana didiba tsotlhe tse batlhanka ba ga rraagwe ba kileng ba di epa mo metlheng ya ga Aberahame rraagwe, Bafilisitia ba di katela ka mmu.
16Abimeleke a raya Isake a re: “Tswa mo go rona, gonne o nonofile bogolo go rona.” 17Isake a huduga gone a thibelela mo mokgatšheng wa Gerare, a aga gone. 18Isake a katolola didiba tsa metsi tse ba di epileng mo metlheng ya ga Aberahame rraagwe; gonne Bafilisitia ba ne ba di katetse morago ga loso lwa ga Aberahame; a di raya maina ka fa maineng a rraagwe o a di reileng.
19Batlhanka ba ga Isake ba epa sediba mo mokgatšheng, ba phunya motswedi wa metsi a a elang gone. 20Badisa ba Gerare ba lwa le badisa ba ga Isake ba re: “Metsi ke a rona.” A raya leina la sediba a re: “Eseke,” ke go re: Kgang, gonne ba ganetsanya nae.
21Ba epa sediba se sengwe; le sone ba se lwela; a se raya leina a re: “Sitena,” ke go re Bobaba. 22A huduga gone a epa sediba se sengwe; sone ba se ka ba se lwela; a se raya leina a re: “Rehobothe,” ke gore Bonno, a re: “Ka gonne jaanong, Jehofa o re diretse bonno, re tlaa ata mo lefatsheng.”
23A tlhatloga gone a ya Beerešeba. 24Jehofa a bonala kwa go ene sigong joo, a re: “Ke nna Modimo wa ga Aberahame rraago; se boife, gonne ke na nao, ke tlaa go segofatsa, ke ntsifatsa losika lwa gago ka ntlha ya ga Aberahame motlhanka wa me.” 25A aga aletara gone, a bitsa leina la ga Jehofa, a ba a tlhoma mogope wa gagwe gone; le gone batlhanka ba ga Isake ba epa sediba gone.
Tumalano ya ga Isake le Abimeleke
26Foo Abimeleke a ya kwa go ene a tswa Gerare, a na le Ahusathe tsala ya gagwe, le Pikole molaodi wa ntwa ya gagwe. 27Isake a ba raya a re: “Lo tletseng kwano go nna e tswa lo nkila, lo ntelekile mo go lona?”
28Ba re: “Re bonye sentle fela fa Jehofa a nna nao; mme ra re, a jaana go nne maikano fa gare ga rona, e bong fa gare ga rona le wena; re dire kgolagano nao; 29ya gore, ga o ketla o re utlwisa botlhoko, jaaka le rona re senke re go ama; le jaaka re senke re go direla sepe fa e se molemo fela, ra go tsamaisa ka kagiso; jaanong o mosegofadiwa wa ga Jehofa.” 30A ba direla moletlo, ba a ja, ba a nwa. 31Ya re ka moso ba tsoga go sa le gale, ba ikanalana; Isake a ba naya tsela ba, tsamaya ka kagiso.
32Mme ga dirala ya re ka letsatsi leo, batlhanka ba ga Isake ba tla, ba mmolelela ka ga sediba se ba se epileng, ba mo raya ba re: “Re bonye metsi.” 33A se raya leina a re: “Sheba”. Ke gone ka moo le gompieno leina la motse oo go tweng Beerešeba.
Esau o nyalela merafe e sele
34E rile Esau a le dinyaga di le 40 a tsaya mosadi go twe Judithe, morwadia Beeri wa Mohite, le Basemathe morwadia Elone wa Mohite. 35Basadi ba, ba utlwisa pelo ya ga Isake le ya ga Rebeka botlhoko jo bo galakang.
