GENESISE 25

₁Aberahame a tsaya mosadi yo mongwe, leina la gagwe go twe, Ketura. ₂A bona nae Simerane, le Jokešane, le Metane le Midiane, le Išebake, la Shua. ₃Jokešane a tshola Sheba, le Detane. Bomorwa Detane e ne e le Ašurime, le Letušime, le Leumime. ₄Le bomorwa Midiane; e ne e le Efa, le Efere, le Hanoke, le Abita, le Eletaa. Botlhe bao e ne e le bana ba ga Ketura.

₅Aberahame a naya Isake tsotlhe tse o neng a na natso. ₆Bomorwa bagadingwana ba Aberahame o ne a na nabo, Aberahame a ba abela dineo, a ba tsamaisa ba tswa mo go Isake morwawe, ene a sa ntse a tshedile, mme ba ya ntlheng ya botlhabatsatsi, lefatsheng le le kwa botlhabatsatsi.

₇A, ke one malatsi a dinyaga tsa botshelo jwa ga Aberahame a sa ntse a tshedile, e bong dinyaga di le 175. ₈Aberahame a khutla, a swa a tsofetse sentle thata, e le monna mogolo, a tsamaile dingwaga; a phuthelwa kwa bathong ba ga gabo. ₉Bomorwawe Isake le Išemaele ba mo fitlha mo logageng lwa Makapela, mo sebateng sa naga se se potileng Mamere ka kwano, sa ga Eferone morwa Sohare wa Mohite; ₁₀e bong sebata sa naga se Aberahame o se rekileng mo baneng ba ga Hethe. Aberahame a fitlhwa gone le Sara mosadi wa gagwe. ₁₁Mme ga dirala ya re morago ga loso lwa ga Aberahame Modimo wa segofatsa Isake morwawe. Mme Isake a aga fa Beere-lahai-roi.

₁₂Jaana, tse ke tsone ditshika tsa ga Išemaele, morwa Aberahame, yo Hagare wa Moegepeto, lelata la ga Sara, o mmonyeng le Aberahame. ₁₃A, ke one maina a bomorwa Išemaele ka maina a bone, ka fa ditshikeng tsa bone; wa ntlha wa ga Išemaele ke Nebaiothe le Ketare, le Atebeele, le Mibesame, ₁₄le Mišema, le Duma, le Masa, ₁₅Hatate, le Tema, Jeture, Nafiše le Ketema. ₁₆Bao ke bomorwa Išemaele mme ao ke maina a bone, ka metsana ya bone, le ka mathibelelo a bone. Ke dikgosana di le 12 ka fa merafeng ya bone. ₁₇Tse, ke tsone dinyaga tsa botshelo jwa ga Išemaele, dinyaga di le 137. Mme a khutla, a swa: a phuthelwa kwa bathong ba ga gabo. ₁₈Ba aga ba simolola kwa Hafila ba ya go fitlha kwa Sure o o potileng Egepeto ka kwano, fa go iwa kwa Asiria. A nna a lebaganye le bana botlhe ba ga rraagwe.

₁₉Tse, ke tsone ditshika tsa ga Isake, morwa Aberahame; Aberahame a tshola Isake. ₂₀Isake a ba a le dinyaga di 40 fa a tsaya Rebeka, morwadia Bethuele wa Mosiria, wa kwa Patanaarame, kgaitsadia Labane wa Mosiria go nna mosadi wa gagwe. ₂₁Isake a rapelela mosadi wa gagwe thata mo go Jehofa ka a le moopa. Jehofa a rapelesega, Rebeka mosadi wa gagwe a nna moimana. ₂₂Bana ba farakana mo teng ga gagwe; a re: “Fa go nna jaana ke a bo ke tshelelang?” A ya go botsa Jehofa.

₂₃Jehofa a mo raya, a re:

₂₄E rile malatsi a gagwe a go belega a sena go fitlha, bonang, ga bo go le bana ba mafatlha mo sebopelong sa gagwe. ₂₅Wa ntlha a tswa a le mohibidu gotlhe fela jaaka seaparo se se bobowa; ba mo raya leina ba re: Esau. ₂₆Morago ga mo ga tswa monnawe; seatla sa gagwe sa bo se tshwere serethe sa ga Esau; leina la gagwe la bidiwa Jakobe. Isake a bo a le dinyaga di 60 fa mogatse a ba bona.

₂₇Basimane ba thuthuga, Esau a nna motsomi yo o tlhoko, e le monna wa naga. Jakobe a bo a le monna yo o bori, a nna mo megopeng. ₂₈Jaana Isake a rata Esau; ka a ne a tle a je nama ya diphologolo tsa gagwe, Rebeka a rata Jakobe.

₂₉Jakobe a apaya dikgobe; Esau a tsena a tswa nageng, a bo a lapile. ₃₀Esau a raya Jakobe a re: “Ke a go rapela, o mphe bohibidu joo; gonne ke lapile.” Ke gone ka moo leina la gagwe le biditsweng Etome, ke go re, Bohibidu.

₃₁Jakobe a re: “Mma ke reke gompieno botsalwapele jwa gago.”

₃₂Esau a re: “Bona, ke mo losong fela, botsalwapele bo tlaa nthusang?”

₃₃Jakobe a re: “Inkanele pele.” Mme a mo ikanela, a rekisa botsalwapele jwa gagwe mo go Jakobe. ₃₄Jakobe a fa Esau senkgwe le dikgobe tsa dinawa. A ja a nwa; a nanoga a tsamaya. Jalo Esau a nyatsa botsalwapele jwa gagwe.