GENESISE 19

₁Baengele ba babedi ba fitlha kwa Sotoma go le maitseboa, Lote a bo a dutse fa kgorong ya Sotoma. Ya re Lote a ba bona, a nanoga a ya go ba kgatlhantsha, a ikobela ka sefatlhogo fa fatshe. ₂A re: “Bonang jaana, barena ba me, ke a lo rapela, a lo ke lo fapogele mo ntlong ya motlhanka wa lona, lo lale, lo itlhapise dinao tsa lona, lo tlaa phakela lo tsamaya.”

Ba re: “Nnyaa re tlaa lala mo mmileng.”

₃A ba rapela thata, ke fa ba fapogela mo go ene, ba tsena mo ntlong ya gagwe; a ba direla modiro, a besa senkgwe se se sa bedisiwang, ba a ja.

₄E rile ba ise ba robale, banna ba motse, e bong banna ba Sotoma, ba dika ntlo, bannye le bagolo, batho botlhe ba tswa ntlheng tsotlhe fela. ₅Ba goa Lote, ba mo raya ba re: “Banna ba ba tsenyeng mo go wena sigong jono ba fa kae? Ba ntshetse kwano go rona, gore re tlhakanele dikobo nabo.”

₆Lote a tswela kwa go bone kwa mojakong, a tswala ntlo morago ga gagwe. ₇A re: “Ke a lo rapela bana ba ga rra, lo se ka lwa dira bosula jo bo kalo. ₈Bonang jaana ke na le bana ba basetsana ba le babedi ba ba iseng ba itse monna; ke a lo rapela, lo mme ke ba ntshetse kwa go lona, mme lo dire ka bone se se rategang mo matlhong a lona; mme banna ba, lo se ka lwa ba dira sepe, ka e le fa ba tsenye ka fa tlase ga moriti wa ditlhomeso tsa me.”

₉Ba re: “Thiboga foo.” Ba ba ba re: “Seo se sa motho se ne se tsile go jaka fela, mme jaanong o rata go re laola; jaana re tlaa go direla maswe bogolo go bone.” Ba pitlelela monna yo thata, e bong Lote, ba atamela, ba tla go thuba setswalo. ₁₀Banna ba, ba ntsha letsogo, ba gogela Lote kwa go bone mo ntlong, mme ba tswala ntlo. ₁₁Banna ba ba ka fa mojakong wa ntlo ba ba foufatsa, bannye le bagolo; jalo ba itapisa fela ka gore ba senka mojako.

₁₂Banna bao ba raya Lote ba re: “Fa o sa na le bangwe gape mono, bagwe ba gago le bomorwao, le bomorwadio, le mongwe fela yo o nang nao mo motseng, o ba ntshe felong fa; ₁₃gonne re tlaa senya felo fa, ka gobo selelo ka ga bone se diregile sekgobo fa pele ga Jehofa; jalo Jehofa o re romile gore re senye Sotoma.”

₁₄Lote a tswela kwa ntle, a ya go bua le bagwe ba gagwe ba ba neng ba tlaa tsaya bomorwadie a re: “Nanogang lo tswe felong fa, gonne Jehofa o tlaa senya motse o.” Mme mo go bagwe ba gagwe ya ne ekete ke motho yo o sotlang.

₁₅E rile bosigo bo anoga, foo baengele ba akofisa Lote ba re: “Nanoga, o tseye mosadi wa gago le bomorwadio ba babedi, ba ba fano; o ka tla wa nyelediwa mo tshiamologong ya motse.” ₁₆Mme a diega; banna bao ba mo tshwara ka seatla, le seatla sa mosadi wa gagwe, le seatla sa bomorwadie ba babedi, ka Jehofa a mo utlwela botlhoko. Ba mo ntshetsa kwa ntle, ba mmaya kwa ntle ga motse. ₁₇Ga dirala ya re ba sena go ba ntshetsa koo kwa ntle, a mo raya a re: “Tshaba o iphedise; se gadime, le gone o se ka wa emaema mo lobaleng lotlhe fela. Tshabela kwa thabeng, o tle o se ka wa nyelediwa.”

₁₈Lote a ba raya a re: “Nnyaa Jehofa wa me, a go se nne jalo! ₁₉Bona jaana, motlhanka wa gago o bonye bopelotlhomogi mo matlhong a gago, mme o totisitse kutlwelobotlhoko ya gago e o e ntshupeditseng ka go boloka botshelo jwa me; fela, ke palelwa ke go tshabela kwa dithabeng, ka e ka tla ya re gongwe bosula jwa ntshwara, mme ka swa. ₂₀Bona jaana, motse o, o gaufi go ka tshabela kwa go one, e bile o monnye. A ko o mme ke tshabele gone, a ga o monnye? Mowa wa me o tlaa tshela.”

₂₁A mo raya a re: “Bona le ka ga selo se ke go amogetse gore ga nketla ke ribegetsa motse o o buileng ka ga one. ₂₂Akofa o tshabele gone, gonne ga nkake ka dira sepe o ise o fitlhe gone.” Ke gone ka moo leina la motse le bidiwa Soare, ke go re, Monnye.

₂₃E rile Lote a fitlha mo Soare, letsatsi la bo le tlhabile. ₂₄Foo Jehofa a nesetsa Sotoma le Gomora sulefura le molelo mo go tswang kwa go Jehofa mo legodimong. ₂₅A ribegetsa metse eo, le lobala lotlhe fela, le banni botlhe ba metse le se se melang mo mmung. ₂₆Mosadi wa gagwe a gadima a le fa morago ga gagwe, mme a tswa motlhoboloko wa letswai.

₂₇Aberahame a phakelela kwa felong fa o neng a eme gone fa pele ga Jehofa. ₂₈A leba kwa Sotoma le Gomora, le kwa lefatsheng lotlhe la lobala, a leba, mme mosi wa lefatshe wa bo o tlhatloga jaaka mosi wa leiso la leubelo. ₂₉Ga dirala, ya re Modimo o senya metse ya lobala, Modimo wa gopola Aberahame, wa ntsha Lote mo gare ga thibegetso, fa o ribegetsa metse e Lote o neng a agile mo go yone.

₃₀Lote a tlhatloga mo Soare, a aga mo thabeng, le bomorwadie ba babedi nae, ka gobo a boifa go aga mo Soare; a aga mo logageng, ene le bomorwadie ba babedi. ₃₁Yo mogolo a raya yo mmotlana a re: “Rraarona o tsofetse, mme ga go na monna mo lefatsheng yo o ka tsenang mo go rona ka fa mokgweng wa lefatshe lotlhe. ₃₂Ntlo re nose rraarona bojalwa jwa mofine, re tlaa lala nae, gore re tle re boloke losika lwa ga rraarona.” ₃₃Ba nosa rraabo bojalwa jwa mofine sigong joo: yo mogolo a tsena a lala le rraagwe; mme a se ka a lemoga go robala ga gagwe, le fa e le go tsoga ga gagwe.

₃₄Ga dirala ya re ka moso, yo mogolo a raya yo mmotlana a re: “Bona, sigo jwa maabane ke letse le rre; a re mo nose bojalwa jwa mofine sigo jono le jone; wena o tsene, o lale nae, gore re tle re boloke losika lwa ga rraarona.” ₃₅Ba nosa rraabo bojalwa jwa mofine le ka jone sigo joo. Yo mmotlana a tloga a lala nae; mme a se ka a lemoga go robala ga gagwe, le fa e le go tsoga ga gagwe. ₃₆Jalo bomorwadia Lote boo babedi ba imisiwa ke rraabo. ₃₇Yo mogolo a bona ngwana wa mosimane, a mo raya leina a re: Moabe. Ke ene rra Bamoabe le gompieno. ₃₈Yo mmotlana le ene a bona ngwana wa mosimane, a mo raya leina a re, Benami. Ke ene rra bana ba ga Amone le gompieno.