GENESISE 17

₁E rile Aberame a le dinyaga di le 99, Jehofa a bonala kwa go Aberame a mo raya a re: “Ke nna Modimo Mothatayotlhe; sepela fa pele ga me, o se na selabe sa molato. ₂Ke tlaa dira kgolagano ya me fa gare ga me le wena, ke tlaa ba ke go ntsifatsa mo gogolo thata.” ₃Aberame a wela fa fatshe ka sefatlhogo. Modimo wa bua nae wa re: ₄“Ka ga me, bona, kgolagano ya me e na nao; o tlaa nna rra-bontsi jwa merafe. ₅Le gone leina la gago ga le ketla le tlhola le bidiwa Aberame, mme leina la gago le tlaa nna Aberahame; gonne ke go dirile raa-bontsi jwa merafe. ₆Mme ke tlaa go atisa mo gogolo thata, ke tlaa dira merafe ka wena, le dikgosi di tlaa tswa mo go wena.

₇“Ke tlaa tlhomamisa kgolagano ya me gare ga me le wena, le losika lwa gago sefularong sa gago, go ya le ditshika tsotlhe tsa bone, gore e nne kgolagano e e sa khutleng, ya go re, ke tlaa nna Modimo mo go wena le mo losikeng lwa gago sefularong sa gago. ₈Lefatshe la majako a gago, lefatshe lotlhe la Kanana, ke tlaa le naya wena le losika lwa gago sefularong sa gago, go nna boswa jo bo sa khutleng; ke tlaa nna Modimo wa bone.”

₉Modimo wa raya Aberahame wa re: “Ka ga gago, boloka kgolagano ya me, wena, le losika lwa gago sefularong sa gago, go ya le ditshika tsotlhe tsa bone. ₁₀Kgolagano ya me ke e, e lo tlaa e bolokang, fa gare ga me le wena le losika lwa gago, sefularong sa gago; banna botlhe le basimane botlhe mo go lona ba rupisiwe. ₁₁Lo tlaa rupisiwa nama ya letlalo la bonna jwa lona; mme e tlaa bo e le sesupo sa kgolagano fa gare ga me le lona. ₁₂A go rupisiwe mosimane mongwe le mongwe wa lona a le malatsi a a ferang mebedi, mo ditshikeng tsotlhe tsa lona, ene yo o tsaletsweng mo ntlong, gongwe yo o rekilweng ka madi mo moennyeng, yo e seng wa losika lwa gago. ₁₃Yo o tsaletsweng mo ntlong ya gago, le ene yo o rekilweng ka madi a gago, ba na le go rupisiwa fela. Kgolagano ya me e tlaa nna mo nameng ya lona, go nna kgolagano e e sa khutleng. ₁₄Mme banna le basimane ba ba sa rupisiwang, ba nama ya letlalo la bonna jwa bone e sa rupisiwang, mongwe le mongwe wa bone o tlaa kgaolwa mo bathong ba ga gabo; o tlodile kgolagano ya me.”

₁₅Modimo wa raya Aberahame wa re: “Ka ga Sarai, mosadi wa gago, o se ka wa bitsa leina la gagwe Sarai, leina la gagwe e nne Sara. ₁₆Ke tlaa mo segofatsa; gape, ke tlaa go naya ngwana wa mosimane ka ene. Ee, ke tlaa mo segofatsa, o tlaa nna mmamerafe: Dikgosi tsa ditšhaba di tlaa tswa mo go ene.”

₁₇Foo Aberahame a wela fa fatshe ka sefatlhogo, a tshega, a ithaya mo pelong a re: “A ngwana o ka bonwa ke yo o dingwaga di lekgolo? Le Sara yo o dingwaga di 90, a o ka bona ngwana?” ₁₈Aberahame a raya Modimo a re: “A bo Išemaele a ka ka a tshela a le fa pele ga gago.”

₁₉Modimo wa re: “Nnyaa, Sara mosadi wa gago o tlaa bona ngwana wa mosimane nao, o tlaa mo raya leina o re, Isake. Ke tlaa tlhomamisa kgolagano ya me nae, le losika lwa gagwe sefularong sa gagwe go nna kgolagano e e sa khutleng. ₂₀Ka ga Išemaele, ke go utlwile. Bona, ke mo segofaditse, ke tlaa mo atisa, ke tlaa mo ntsifatsa mo go golo thata. O tlaa tsala dikgosana di le 12, ke tlaa mo dira morafe o mogolo. ₂₁Kgolagano ya me ke tlaa e tlhomamisa le Isake yo Sara o tlaa mmonang nao, ka lobaka lono lo lo tlhomameng lwa isago.” ₂₂Modimo wa khutla go bua nae; wa tlhatloga wa tswa fa go Aberahame.

₂₃Aberahame a tsaya Išemaele morwawe, le botlhe ba ba tsaletsweng mo tlong ya gagwe, le botlhe ba ba rekilweng ka madi a gagwe, banna le basimane botlhe mo bathong ba ntlo ya ga Aberahame, a rupisa nama ya letlalo la bonna jwa bone ka letsatsi leo fela, jaaka Modimo o buile nae. ₂₄Aberahame a bo a le dingwaga di 99 fa a rupisiwa nama ya letlalo la bonna jwa gagwe. ₂₅Išemaele morwawe a bo a le dingwaga di le 13 fa a rupisiwa nama ya letlalo la bonna jwa gagwe. ₂₆Ka letsatsi leo fela Aberahame a rupisiwa, le Išemaele morwawe. ₂₇Le banna botlhe ba ntlo ya gagwe, ba ba tsaletsweng mo ntlong; le ba ba rekilweng ka madi mo moennyeng, ba rupisiwa nae.