Aberame o kgaogana le Lote
1Aberame a tlhatloga mo Egepeto, ene le mosadi wa gagwe, le tsotlhe tse a nang natso, a na le Lote, a ya ntlheng ya Borwa. 2Aberame a bo a humile dikgomo thata, le selefera, le gouta. 3A nna a tsamaya ka go fuduga fa, a ya go aga fale, a tswa Borwa a ba a fitlha le kwa Bethele, kwa felong fa tente ya gagwe e kileng ya nna gone mo tshimologong fa gare ga Bethele le Ai; 4kwa felong ga sebeso se o kileng a se dira gone pele. Aberame a bitsa leina la ga Jehofa gone.
5Lote yo o neng a tsamaya le Aberame, a bo a na le matsomane, le matlhape, le ditente. 6Lefatshe la bo le sa ba lekana go ka nna mmogo, gonne dithoto tsa bone di ne di le dikgolo, ba retelelwa ke go aga mmogo. 7Ga nna kgang fa gare ga badisa ba dikgomo tsa ga Aberame le badisa ba dikgomo tsa ga Lote. Le gone Bakanana le Baperise ba ne ba agile mo lefatsheng leo ka lobaka loo.
8Aberame a raya Lote a re: “Ke a go rapela, a go se nne kgang fa gare ga me le wena, le fa gare ga badisa ba me le ba gago, gonne re bana ba monna a le mongwe fela. 9A lefatshe lotlhe ga le fa pele ga gago? Ke a go rapela, o kgaogane le nna. E tlaa re fa o ya ka fa letsogong la molema, nna ke ye ka fa go le legolo; gongwe fa o ya ka fa letsogong le legolo, nna ke ye ka fa go la molema.”
10Lote a tsholetsa matlho a gagwe, a bona lobala lotlhe lwa Joretane fa lo na le metsi sentle ntlheng tsotlhe. E ne e le pele ga Jehofa a senya Sotoma le Gomora, lo ne lo ntse jaaka tshimo ya Jehofa, le jaaka lefatshe la Egepeto, fa go iwa kwa Soare. 11Jalo Lote a itlhophela lobala lotlhe lwa Joretane. Lote a hudugela ntlheng ya botlhabatsatsi; ba kgaogana jalo. 12Aberame a aga mo lefatsheng la Kanana, Lote ene a aga mo metseng ya lobala, a nna a hudusa mogope wa gagwe go ya go fitlha kwa Sotoma. 13Jaana banna ba Sotoma e ne e le baikepi le baleofi mo gogolo thata fa pele ga Jehofa.
Aberame o hudugela Heberone
14Jehofa a raya Aberame, morago Lote a sena go kgaogana nae, a re: “Tsholetsa matlho a gago, fa o leng gone, o lebe ntlheng ya Botsheka, le kwa Borwa, le kwa Botlhabatsatsi, le kwa Bophirimatsatsi; 15gonne lefatshe lotlhe le o le bonang, ke tlaa le naya wena, le losika lwa gago ka bosakhutleng. 16Ke tlaa dira losika lwa gago lo nna jaaka lorole lwa lefatshe, ke gore, fa motho a ka bala lorole lwa lefatshe, foo losika lwa gago le lone lo tlaa balwa. 17Nanoga, o ralale lefatshe ka boleele jwa lone, le ka boatlhamo jwa lone, gonne ke tlaa le go naya.” 18Aberame a hudusa mogope wa gagwe, a tla a aga fa maokeng a ga Mamere a a mo Heberone, a agela Jehofa sebeso gone.
