BAGALATIA 6

₁Bagaetsho, le fa motho a tshwerwe mo tlolong nngwe, lona ba lo leng ba semowa, sokololang yo o ntseng jalo ka mowa wa bonolo; o ntse o ipona, e se re kgotsa le wena wa raelwa. ₂Rwadisanyang merwalo, lo dirafatse molao wa ga Keresete jalo. ₃Gonne fa motho a ithaya a re, o sengwe, le mororo a se sepe, o a itsietsa. ₄Mme a motho mongwe le mongwe a sekaseke e e leng tiro ya gagwe, foo o tlaa bona go ipelafatsa ka ga gagwe ka esi, e seng ka ga wa ga gabo. ₅Gonne motho mongwe le mongwe o tlaa ithwalela morwalo wa gagwe.

₆Yo o rutwang mo lefokong a a abele yo o rutang dilo tsotlhe tse di molemo.

₇Lo se tsietsege; Modimo ga o sotlwe; gonne se motho o se jalang, ke sone se o tlaa se robang. ₈Gonne yo o jalelang nama ya gagwe, o tlaa roba sebodu se se tswang mo nameng; mme yo o jalelang Mowa, o tlaa roba botshelo jo bo sa khutleng jo bo tswang mo Moweng. ₉A re se lapeng mo go direng molemo; gonne re tlaa roba mo motlheng o e leng one, fa re sa ngodiege; ₁₀jalo, fa re bona lobaka, a re ke re direng se se molemo mo bathong botlhe, mme bogolo mo go ba e leng ba ntlo ya tumelo.

₁₁Bonang ditlhaka di dikgolo jang tse ke lo kwaletseng ka tsone ka seatla sa me. ₁₂Botlhe ba ba ratang go lebega sentle mo nameng, ba lo patelela gore lo rupisiwe; e be e le gore ba se ka ba bogisediwa mokgoro wa ga Keresete. ₁₃Gonne le e leng bone ba ba rupang, ga ba tshegetse molao; mme ba rata lona lwa rupisiwa, gore ba ipelafatse ka nama ya lona. ₁₄A go nne kgakala le nna go ipelafatsa, fa e se ka mokgoro wa Morena wa rona Jesu Keresete, o lefatshe le mpapoletsweng ka one, le nna ke bapoletswe lefatshe. ₁₅Gonne go le bogwera ga se sepe, go le bokgola ga se sepe, fa e se sebopiwa se seša fela. ₁₆Botlhe ba ba tlaa sepelang ka fa molaong o, a kagiso e nne mo go bone, le boutlwelobotlhoko, le mo go Iseraele wa Modimo.

₁₇Go tloga fano a go se tlhole go le motho ope yo o ntshwenyang; gonne ke tshwailwe methisa ya ga Jesu mo mmeleng wa me.

₁₈Bagaetsho, a tshegofatso ya Morena wa rona Jesu Keresete e nne le mowa wa lona. Amen.