BAGALATIA 3

₁A Bagalatia ba ba dieleele ke lona! Ana lo loilwe e mang, lona ba Jesu Keresete o beilweng ka ponatshego fa pele ga matlho a lona a bapotswe? ₂Selo se fela ke ratang go se utlwa mo go lona se le sosi ke se, go re: A lo amogetse Mowa ka ditiro tsa molao, kgotsa ka kutlo ya tumelo? ₃A lo boeleele jo bo kalo? E re ka lo simolotse ka Mowa, a ke go re jaanong lo dirwa boitekanelo ka mokgwa wa nama? ₄A lo bogetse dilo tse di kalokalo lefela? Ke raya le gale fa e le lefela. ₅Ke gone yo o lo nayang Mowa, a ba a dira dikgakgamatso mo go lona, a o dira jalo ka ntlha ya ditiro tsa molao, kgotsa ka ntlha ya kutlo ya tumelo?

₆Fela jaaka Aberahame a dumela Modimo, mme a go balelwa e le tshiamo. ₇Ke gone, itseng fa ba e leng ba tumelo e le bone bana ba ga Aberahame. ₈Dikwalo e re ka di bonye gale fa Modimo o tlaa siamisa Baditšhaba ka tumelo, tsa rerela Aberahame Mafoko a a Molemo gale, tsa re: “Merafe yotlhe e tlaa segofadiwa mo go wena.” ₉Jalo ba e leng ba tumelo ba segofadiwa le Aberahame modumedi.

₁₀Gonne botlhe ba e leng ba ditiro tsa molao ba hutsegile; gonne go kwadilwe ga twe: “Go hutsegile mongwe le mongwe yo o sa nneleng ruri mo dilong tsotlhe tse di kwadilweng mo lokwalong lwa molao, go di dira.” ₁₁Jaana go a bonala fa go se na motho ope yo o siamisiwang fa pele ga Modimo ka ditiro tsa molao; gonne ga twe: “Mosiami o tlaa tshela ka tumelo,” ₁₂mme molao ga se wa tumelo; mme go tulwe: “Yo o di dirang o tlaa tshela mo go tsone.”

₁₃Keresete o re rekolotse mo phutsong ya molao, ka a diregile phutsego mo boemong jwa rona; gonne go kwadilwe ga twe: “Go hutsegile mongwe le mongwe yo o pegilweng mo setlhareng.” ₁₄Ke gore lesego la ga Aberahame le tlele Baditšhaba mo go Keresete Jesu; gore re amogele polelo ya tsholofetso ya Mowa ka tumelo.

₁₅Bagaetsho, ke bua ka fa mokgweng wa batho, ka re: Le fa e ka bo e le kgolagano ya motho fela, le fa go ntse jalo, e re e sena go tlhomamisiwa, ga go ope yo o dirang gore e nne lefela, le fa e le go e oketsa. ₁₆Jaana dipolelo tsa tsholofetso di builwe le Aberahame le losika lwa gagwe. Ga o re: “Ditshika,” jaaka e kete di ka bo di le dintsi; e tswa lo le longwe fela, jaaka go tulwe: “Le losika lwa gago,” lo e leng Keresete. ₁₇Ke bua jaana, ka re, kgolagano e e tlhomamisitsweng gale ke Modimo, molao o o tsileng dinyaga di le 430 morago ga yone, ga o e tlhomolole gore polelo ya tsholofetso e nne lefela. ₁₈Gonne fa boswa bo le ka molao, ga bo tlhole bo le ka lefoko la tsholofetso; le fa go ntse jalo Modimo o bo neile Aberahame ka polelo ya tsholofetso.

₁₉Foo molao e be e le eng? Ga okediwa ka one ka ntlha ya ditlolo, go tle go tsamaye go tle losika lo lo neetsweng polelo ya tsholofetso; mme wa tlhongwa ke baengele ka seatla sa motseriganyi. ₂₀Jaana motseriganyi ga se wa a le mongwe fela; mme Modimo one o mongwe fela.

₂₁Mme a ke go re molao o tlhabana le dipolelo tsa tsholofetso tsa Modimo? A go se tualo, gonne fa go ne go ka bo go tlhomilwe molao mongwe o o ka tshedisang, ruri tshiamo, e ka bo ne ne e eme mo molaong. ₂₂Lokwalo lo tswaletse dilo tsotlhe mo boleong, gore polelo ya tsholofetso, e e emeng ka tumelo mo go Jesu Keresete, e newe bone ba ba dumelang.

₂₃E rile tumelo e ise e tle, ra bo re disiwa fa tlase ga molao, re tswaleletswe tumelo e e neng e tlaa nama e senolwa. ₂₄Jalo molao e ne e ntse e le mogoga banyana mo go rona, go re gogela kwa go Keresete, gore re siamisiwe ka tumelo. ₂₅Jaanong ka tumelo e tsile, ga re tlhole re le mo go mogoga banyana.

₂₆Gonne lo bana ba Modimo lotlhe, mo go Keresete Jesu, ka tumelo. ₂₇Gonne lotlhe ba lo kolobeditsweng mo go Keresete, lo apere Keresete. ₂₈Ga go ka ke ga nna Mojuta le Mogerika, ga go ka ke ga nna motlhanka le mogololwa, ga go ka ke ga nna monna le mosadi; gonne lotlhe lo motho a le mongwe fela mo go Keresete Jesu. ₂₉Mme fa lo le ba ga Keresete, foo lo losika lwa ga Aberahame, lo baruaboswa ka fa polelong ya tsholofetso.