Jerusalema o a otlhaiwa
1Foo a goa mo tsebeng tsa me ka lentswe le legolo, a re: “Atametsang ba ba disitseng motse, mongwe le mongwe a tle a tshotse sebolao sa gagwe se se senyang.” 2Bonang, banna ba le barataro ba tla ba tswa ntlheng ya kgoro ya godimo, e e lebileng ntlheng ya botsheka, mongwe le mongwe a tshotse sebolao sa gagwe; le monna a le mongwe fela mo gare ga bone bao a apere leloba; a na le kurwana ya enke ya mokwadi ka fa lothekeng lwa gagwe. Mme ba tsena, ba ya ba ema fa sebesong sa kgotlho.
3Kgalalelo ya Modimo wa Iseraele ya bo e ne e tlogile mo tšherubeng e e neng e ntse e le mo go yone, e ile kwa serepoding sa ntlo; mme a biletsa kwa monneng yo o apereng leloba, a na le kurwana ya enke ya mokwadi ka fa lotlhekeng lwa gagwe. 4Mme Jehofa a mo raya, a re: “Ralala motse fa gare, fa gare ga Jerusalema, mme o beye lotshwao mo diphatleng tsa banna ba ba fegelwang, le ba ba sonelelang dilo tsotlhe tse di makgapha tse di dirwang mo gare ga one.”
5A raya ba bangwe mo kutlong ya me, a re: “Ralalang motse lo mo setse morago, mme lo kgemethe; a leitlho la lona le se rekegele, le fa e le go tlhomoga pelo. 6Bolaelang ruri monna mogolo, lekau le morweetsana, le banyana ba bannye le basadi; mme lo se ka lwa atamela motho ope yo lotshwao lo mo go ene; lo simolole fa felong ga me ga boitshepo.” Foo ba simolola ka banna bagolo ba ba fa pele ga ntlo.
7A ba raya a re: “Itshepololeng ntlo, lo tlatse malwapa ka babolawi: Tswang!” Mme ba tswa ba ya ba kgemetha mo motseng.
8Ga dirala ya re ba sa ntse ba kgemetha, mme nna ke tlogetswe, ka wela fa fatshe ka sefatlhogo sa me, ka goa, ka re: “Ija we, Morena Modimo! A o senya masalela otlhe a Iseraele ka go goromeletsa tšararego ya gago mo Jerusalema?”
9Foo a nthaya a re: “Boikepo jwa ba ntlo ya Iseraele le Juta bo bogolo thata, lefatshe le tletse madi a batho, le motse o tletse tshokamiso ya katlholo; gonne ba re: ‘Jehofa o latlhile lefatshe, e bile Jehofa ga a bone.’ 10Ka ga me le gone leitlho la me ga le ketla le rekegela, le gone ga nketla ke tlhomoga pelo. Ke tlaa lere mokgwa wa bone mo tlhogong ya bone.”
11Mme bonang, monna yo o apereng leloba a na le kurwana ya enke ka fa lothekeng lwa gagwe, a kakanya tiro e, a re: “Ke dirile fela jaaka o ntaotse.”
