ESEKIELE 46

₁“Morena Modimo o bua jaana a, re: Kgoro ya lolwapa lwa ka fa teng, e e lebileng ntlheng ya botlhabatsatsi, a e tswalwe ka malatsi a marataro a tiro; mme e re ka letsatsi la sabata e bulwe, le ka letsatsi la go rogwa ga kgwedi a e bulwe. ₂A kgosana e tsene ka tsela ya maribela a kgoro ya ka fa ntle; mme e eme fa mophakwaneng wa kgoro, mme baperesiti ba baakanye tshupelelo ya yone ya boleo, le ditshupelo tsa yone tsa kagiso, mme a e obame fa serepuding sa kgoro; foo e tlaa tswela kwa ntle, mme go se tswalwe kgoro go tsamaya go nna maitsebowa. ₃A batho ba lefatshe ba obamele fa mojakong wa kgoro eo fa pele ga Jehofa ka bosabata le ka metlha ya go rogwa ga dikgwedi.

₄“Tshupelo e e fisiwang, e kgosana e tlaa e isetsang Jehofa ka letsatsi la sabata, e nne dikwanyana di le thataro tse di se nang bogole le phelefu e e se nang bogole. ₅Le tshupelo ya boupe e nne emere ya phelefu, mme tshupelo ya boupe ya dikwanyana e nne ka fa motho o nonofileng go ntsha ka teng, le sego sa lookwane sa emere nngwe le nngwe. ₆Ka letsatsi la go rogwa ga kgwedi tshupelo e nne kgongwana e e se nang bogole; le dikwanyana di le thataro, le phelefu; e nne tse di se nang bogole. ₇A e baakanye tshupelo ya boupe, kgomo emere, le phelefu emere, le dikwanyana ka fa motho o nonofileng ka teng, le selekanyo sa emere se ntshediwe sego sa lookwane. ₈E re kgosana e tsena, a e tsene ka tsela ya maribela a kgoro, e be e tswe ka yone.

₉“E tlaa re fa batho ba lefatshe ba tla fa pele ga Jehofa mo medirong e e laotsweng, yo o tsenang ka kgoro ya botsheka a ya go obama, a tswe ka kgoro ya borwa; mme yo o tsenang ka kgoro ya borwa a a tswe ka kgoro ya botsheka; a se ka a boa ka kgoro e o tsenyeng ka yone, mme o tlaa tswa fela a siametse pele fela. ₁₀E tlaa re ba tsena, kgosana e tsene, e le mo gare ga bone; le fa ba tswa ba tswe ba le mmogo. ₁₁Mo medirong, le mo medirong e e masisi, tshupelo ya boupe e le kgomo e ntshediwe emere, le phelefu emere, le ga dikwanyana ka fa motho o nonofileng go ntsha ka teng, le emere e ntshediwe sego sa lookwane.

₁₂“E tlaa re fa kgosana e baakanya tshupelo ya pelo fela, e le tshupelo e e fisiwang, kgotsa ditshupelo tsa kagiso e le tshupelo ya pelo fela e e direlwang Jehofa, mongwe a e bulele kgoro e e lebileng kwa botlhabatsatsi, mme e baakanye tshupelo ya yone e e fisiwang, le ditshupelo tsa yone tsa kagiso, jaaka e tle e dire ka letsatsi la sabata; foo a e tswe; mme e tlaa re e sena go tswa a mongwe a tswale kgoro.

₁₃“O baakanyetse Jehofa kwanyana ya ngwaga wa ntlha e e se nang bogole, e le tshupelo e e fisiwang ya malatsi otlhe; o e baakanye ka moso le moso. ₁₄O baakanye tshupelo ya boupe nayo ka moso le moso, e bong kgaogano ya serataro ya emere, le kgaogano ya seraro ya sego ya lookwane, go kolobetsa setou; e le tshupelo ya boupe ya ga Jehofa ya metlha yotlhe ka tao e e sa khutleng. ₁₅A ba baakanye kwanyana jaana, le tshupelo ya boupe, le lookwane, ka moso le moso, e le tshupelo e e fisiwang ya metlha yotlhe.”

₁₆Morena Modimo o bua jaana, a re: “Fa kgosana e naya bomorwa yone bangwe neo, ke boswa jwa gagwe, a e nne jwa bomorwawe; ke boswa jwa bone go bo rua. ₁₇Fa e naya mongwe wa batlhanka ba yone neo, sengwe sa boswa jwa yone, e tlaa nna ya gagwe go ya go fitlha mo ngwageng wa kgololego; foo a e boele mo kgosaneng; mme ka ga boswa jwa yone, e tlaa nna jwa bomorwa yone fela. ₁₈Gape kgosana e se ka ya tsaya ga thuo ya batho, go ba kgarametsa mo bosweng jwa bone; a e neye bomorwaa yone go rua jo e leng boswa jwa yone, gore batho ba me ba se ka ba falalediwa mongwe le mongwe boswa jwa gagwe.”

₁₉Foo a nkisa ka botseno jo bo ka fa lotlhakoreng ga kgoro, mo matlwaneng a a boitshepo a baperesiti, a a lebileng ntlheng ya botsheka; mme bonang, go ne go le felo gongwe ka kwa morago ntlheng ya bophirimatsatsi. ₂₀Mme a nthaya a re: “Felo fa ke gone fa baperesiti ba tlaa apeelang teng tshupelelo ya molato, le tshupelelo ya boleo, fa ba tlaa besang teng tshupelo ya boupe; gore ba se ka ba di ntshetsa kwa lolwapeng lwa ka fa ntle, ba ya go itshepisa batho teng.”

₂₁Foo a nkisa kwa lolwapeng lwa ka fa ntle, a ntsamaisa ka fa dikgokgotšhong tsoo nne tsa lolwapa, mme bonang, mo kgokgotšhong nngwe le nngwe ya lolwapa go ne go le lolwapana. ₂₂Mo dikgokgotšhong tsoo nne tsa lolwapa go ne go le malwapana a a ageletsweng, a le boleele jwa mabogo a le 40, le boatlhamo bo le mabogo a le 30; tse nne tseo mo dikgokgotšhong di ne di le selekanyo se le sengwe fela. ₂₃Go no go le dikago tse di tlhomaganyeng mo tikologong mo go yone, mo tikologong ya one oo mane, go dirilwe go na le mafelo a a apeelang fa tlase ga matshwaragano mo tikologong. ₂₄Foo a nthaya a re: “A, ke one matlo a a apeelang, kwa badiredi ba ntlo ba tlaa apeelang setlhabelo sa batho teng.”