ESEKIELE 44

₁Foo a mpusa ka tsela ya kgoro ya ka fa ntle ya felo ga boitshepo e e lebileng ntlheng ya botlhabatsatsi; mme ga bo go tswadilwe. ₂Mme Jehofa a nthaya a re: “Kgoro e, e tlaa nna fela e tswetswe, ga e ketla e bulwa gope, le gone ga go ketla go tsena motho ope ka yone, gonne Jehofa Modimo wa Iseraele, o tsenye ka yone; ke gone e tlaa nnang fela e tswetswe. ₃Ka ga kgosana, e tlaa dula teng e le kgosana go ja senkgwe fa pele ga Jehofa; e tlaa tsena ka tsela ya maribela a kgoro, e tlaa fela e tswa ka yone.”

₄Foo a nkisa ka tsela ya kgoro ya botsheka fa pele ga ntlo; mme ka leba, mme bonang, kgalalelo ya ga Jehofa ya tlala ka ntlo ya ga Jehofa; mme ka wela ka sefatlhogo sa me fa fatshe. ₅Jehofa a nthaya a re: “Morwa motho, tlhokomela thata, o lebe ka matlho, o utlwe ka ditsebe tsotlhe tse ke di go bolelelang ka ga ditao tsotlhe tsa ntlo ya ga Jehofa, le melao yotlhe ya yone; o tlhokomele thata botseno jwa ntlo, le matso otlhe a felo ga boitshepo.

₆“O tlaa bua jaana le ba ba dirukhutlhi, e bong ba ntlo yotlhe ya Iseraele, o re: Morena Modimo o bua jaana, a re: Lona, ba ntlo ya Iseraele a go lo lekane, mo go tse di makgapha tsa lona tsotlhe fela. ₇Ka e le fa lo lerile baeng mo teng, ba sa rupa mo pelong, ba sa rupa mo nameng, gore ba nne mo felong ga me ga boitshepo, go go tlhapatsa, e bong ntlo ya me, mogang lo isang senkgwe sa me, mahura le madi, mme ba sentse kgolagano ya me, go oketsa tse di makgapha tsotlhe tsa lona. ₈Lona ga lo a tshegetsa tebelo ya dilo tsa me tse di boitshepo; lo ipeetse batshegetsi ba tebelo ya me mo felong ga me ga boitshepo.

₉“Morena Modimo o bua jaana a re: Ga go na motho ope wa seeng a sa rupa mo pelong a sa rupa mo nameng, yo o ka tsenang mo felong ga me ga boitshepo, wa bape ba seeng ba ba mo baneng ba Iseraele.”

₁₀Balefi ba ba ileng kgakala le nna jale ka Iseraele a timela, ba ba timetseng ba tswa mo go nna, ba latela medimo ya bone ya disetwa; ba tlaa belega boikepo jwa bone. ₁₁Le fa go ntse jalo ba tlaa nna badiredi mo felong ga me ga boitshepo, ka go nna le tebelo fa dikgorong tsa ntlo, le ka go direla mo ntlong; ba tlaa tlhaba tshupelo e e fisiwang, le setlhabelelo sa batho, ba tlaa ema fa pele ga bone go direla bone. ₁₂E re ka ba ba diretse fa pele ga medimo ya bone ya disetwa, mme ba nna sekgopiso sa boikepo mo go ba ntlo ya Iseraele; ke gone ka moo ke ba tsholeleditseng seatla sa me go tlhabana nabo, go bua Morena Modimo, mme ba tlaa belega boikepo jwa bone. ₁₃Ga ba ketla ba atamela kwa go nna, go tla ba ntirela tiro ya boperesiti, le fa e le go atamela dilo dipe tsa me tse di boitshepo, e bong dilo tse di boitshepo jo bo itshepileng; mme ba tlaa belega botlhabisa ditlhong jwa bone, le tse di makgapha tsa bone tse ba di dirileng. ₁₄Le fa go ntse jalo ke tlaa ba baya batshegetsi ba tebelo ya ntlo ya me mo tirelong yotlhe ya yone, le mo go tsotlhe tse di tlaa dirwang teng.

₁₅“Baperesiti ba Balefi, bomorwa Satoke ba ba tshegeditseng tebelo ya felo ga me ga boitshepo, jale ka bana ba Iseraele ba timela ba ntlogela, bao ba tlaa atamela ba tla go ntirela; ba tlaa ema fa pele ga me go nkisetsa tshupelo ya mafura le madi.” Go bua Morena Modimo. ₁₆“Ba tlaa tsena mo felong ga me ga boitshepo, ba tlaa atamela fa lomating lwa me lwa bojelo go ntirela, mme ba tlaa tshegetsa tebelo ya me. ₁₇Go tlaa dirala go re fa ba tsena ka dikgoro tsa lolwapa lwa ka fa teng, ba apare diaparo tsa leloba; mme a go se tle bobowa jwa nku mo go bone, fa ba sa ntse ba direla mo teng ga dikgoro mo lolwapeng lwa ka fa teng, le mo ntlong. ₁₈A ba rwale ditlhoro tsa leloba mo ditlhogong, ba tswale diputlela tsa leloba mo lothekeng; mme ba se ka ba itlama ka sepe se se tlaa ba huhutsang. ₁₉Fa ba tswela kwa lolwapeng lwa ka fa ntle, e bong kwa lolwapeng lwa ka fa ntle kwa bathong, a ba apole diaparo tse ba direlang ka tsone, mme ba di beye mo matlwaneng a a boitshepo, mme ba apare diaparo di sele, gore ba se ka ba itshepisa batho ka diaparo tsa bone.

₂₀“Le gone a ba se ipeole ditlhogo, le fa e le go leseletsa moriri go nna moleele; a ba ikute fela mo ditlhogong. ₂₁Moperesiti ope a se ka a nwa bojalwa jwa mofine, mogang ba tsenang mo lolwapeng lwa ka fa teng. ₂₂Le gone a ba se nyale mosadi wa motlholagadi, le fa e le mosadi yo o tlhadilweng; mme ba nyale makgarebane a losika lwa ntlo ya Iseraele, kgotsa mosadi wa motlholagadi yo e leng motlholagadi wa moperesiti mongwe.

₂₃“Ba tlaa ruta batho ba me go farologanya dilo tse di itshepileng le tse e leng dilo fela, ba ba ba lemotsha se se itshekologileng le se se itshekileng. ₂₄E tle e re go le kgang, ba eme go atlhola; ba e atlhole ka fa dikatlholong tsa me; ba tshegetse melao ya me le ditao tsa me mo medirong yotlhe ya me e e laotsweng; mme ba itshepise bosabata ba me.

₂₅“A ba se atamele motho yo o suleng go itshekolola; mme fa e le ka ga rraabo kgotsa mmaabo, kgotsa ngwana wa bone wa mosimane le fa e le wa mosetsana, kgotsa ngwanaa rraabo, wa mosimane le fa e le wa mosetsana yo o se nang monna ba ka iitshekolola. ₂₆E tlaa re a sena go itshekisiwa, a ipalele malatsi a supa. ₂₇E tlaa re ka tsatsi le o tsenang ka lone mo felong ga boitshepo, mo lolwapeng lwa ka fa teng, a ya go direla mo felong ga boitshepo, a ise tshupelelo ya gagwe ya boleo, go bua Morena Modimo.

₂₈“Ba tlaa nna le boswa; ke nna boswa jwa bone, mme lo se ka lwa ba naya thuo epe mo Iseraele; ke nna thuo ya bone. ₂₉Ba tlaa ja tshupelo ya boupe, le tshupelelo ya boleo le tshupelelo ya molato; sengwe le sengwe se se tshwailweng mo Iseraele e tlaa nna sa bone. ₃₀Tsa ntlha tsa mabutswapele otlhe, le tshupelo nngwe le nngwe ya tsholetso ya sengwe le sengwe ya ditshupelo tsotlhe tsa lona tsa tsholetso, a e nne tsa baperesiti; lo tlaa ba lo naya moperesiti sa ntlha sa bodubo jwa lona, go medisa tshegofatso mo ntlong ya gago. ₃₁Baperesiti a ba se je sepe se se suleng fela, kgotsa se se gagotsweng, le fa e ka ne e le nonyane, le fa e le kgomo.