Badisa ba Iseraele
1Lefoko la ga Jehofa la tla mo go nna, la re: 2“Morwa motho, perofesa o nyatse badisa ba Iseraele, perofesa, o ba reye, e bong badisa, o re: Morena Modimo o bua jaana, a re: A bo go latlhega badisa ba Iseraele ba ba ijesang fela! Badisa a ga ba a tshwanela go fudisa dinku? 3Lo ja mafura, lo ikapesa ka bobowa, lo tlhaba tse di nonneng; mme ga lo fudise dinku. 4Tse di bobolang ga lo a di thatafatsa, ga lo a fodisa tse di lwalang, ga lo a fapa tse di robegileng, le gone ga lo a busa tse di lelekilweng, ga lo a batla tse di timetseng; mme lo di laotse ka kgolo le patiko. 5Di ne di faletse ka go bo modisa a seyo. Tsa nna dijo tsa dibatana tsotlhe tsa naga, mme di ne di faletse. 6Dinku tsa me tsa timelela mo dithabeng tsotlhe, le mo lekhubung lengwe le lengwe. Ee, dinku tsa me di ne di gasametse mo lefatsheng lotlhe; mme go se na ope yo o di senkang le fa e le go di latela.
7“Ke gone, lona badisa utlwang lefoko la ga Jehofa, a re: 8Jaaka ke tshedile, go bua Morena Modimo: Ruri, e re ka dinku tsa me e ne e le dilo tsa go bolawa fela, dinku tsa me tsa nna dijo tsa dibatana tsotlhe tsa naga, ka go bo modisa a na a seyo, le gone badisa ba me ba se ka ba batla dinku tsa me, mme badisa ba ijesa fela, ba se ka ba fudisa dinku tsa me; 9ke gona, lona badisa utlwang lefoko la ga Jehofa; 10Morena Modimo o bua jaana, a re: Bonang, ke tlhabana le badisa; ke tlaa lopa dinku tsa me mo seatleng sa bone, mme ke tlaa ba khutlisa mo go tlholeng ba fudisa dinku; le gone badisa ga ba ketla ba tlhola ba ijesa fela; ke tlaa golola dinku tsa me mo ganong la bone, gore di se nne dijo tsa bone.
Modisa yo o molemo
11“Gonne Morena Modimo o bua jaana, a re: Bonang, nna ka nosi, e bong nna, ke tlaa senka dinku tsa me, ke tlaa di latela. 12Jaaka modisa a tle a senke letsomane la gagwe mo motlheng o dinku di a bong di faletse ka one, le nna ke tlaa senka dinku tsa me jalo; ke tlaa di golola mo mafelong otlhe kwa di falaletseng teng mo motlheng wa maru le lefifi. 13Ke tlaa di ntsha mo ditšhabeng, ke tlaa di phutha kwa mafatsheng, ke tlaa di lere mo lefatsheng le e leng la tsone; ke tlaa di fudisa mo dithabeng tsa Iseraele, fa meeding ya metsi, le mo mafelong otlhe a lefatshe a a ntsweng. 14Ke tlaa di fudisa bofulo jo bo monate, mme lesaka la tsone le tlaa nna mo dithabeng tsa bogodimo jwa Iseraele. Di tlaa robala mo sakeng le le molemo, di tlaa fula mo bofulong jo bo loreme mo dithabeng tsa Iseraele. 15Nna ka nosi ke tlaa fudisa dinku tsa me, ke di bothisa, go bua Morena Modimo.
16“Ke tlaa batla tse di timetseng, ke tlaa ba ke lere tse di lelekilweng, ke tlaa fapa tse di robegileng, ke thatafatsa tse di botlhoko; mme ke tlaa senya tse di nonneng le tse di thata; ke tlaa di fudisa mo tshiamisong.
17“Ka ga lona, letsomane la me, Morena Modimo o bua jaana, a re: Bonang, ke sekaseka gare ga dihuthsane le dihutshane, mo diphelefung jaaka mo diphokong. 18A ke sengwe se sennyennyane mo go lona, go re, lo fudile mo mafulong a a molemo, fa e bo ne ne fano mo go setseng ga mafulo a lona lo go gataka ka dinao? Le go re lo nole metsi a a itshekileng, fa e bo ne ne fano a a setseng lo a kgobera ka dinao? 19Ka ga dinku tsa me, di fula mo lo go gatakileng ka dinao, di nwa metsi a lo a kgoberileng ka dinao.
20“Ke gone ka moo Morena Modimo o buang nabo jaana, a re: Bonang, nna e bong nna, ke tlaa sekaseka gare ga dihutshane tse di nonneng le dihutshane tse di mokodue. 21Ereka lo kgorometsa ka lotlhakore le ka lerudi, lo šegola tse di lwalang tsotlhe ka dinaka tsa lona, go tsamaya lo di falaletsa kwa ntle; 22ke gone ka moo ke tlaa bolokang letsomane la me, mme ga le ketla le tlhola le nna kgapo; ke tlaa sekaseka gare ga dihutshane le dihutshane. 23Ke tlaa di tlhomela modisa a le mongwe fela, mme o tlaa di fudisa, e bong motlhanka wa me Dafite; o tlaa di fudisa, mme o tlaa nna modisa wa tsone. 24Nna Jehofa ke tlaa nna Modimo wa bone, motlhanka wa me Dafite o tlaa nna kgosana mo go bone; nna Jehofa ke buile. 25Ke tlaa dira kgolagano ya kagiso nabo, ke tlaa khutlisa dibatana tse di bosula mo lefatsheng; ba tlaa nna ka thagamo mo nageng, ba robala fela mo dikgweng.
26“Ke tlaa ba dira tshegofatso, bone le mafelo a a mo tikologong ya lekhubu la me; ke tlaa nesa pula mo motlheng wa yone; go tlaa nna meokodi ya tshegofatso. 27Le setlhare sa naga se tlaa ungwa; le lefatshe le tlaa ntsha totafalo ya lone, mme ba tlaa nna ka thagamo mo lefatsheng la bone. Ba tlaa itse fa ke le Jehofa, ke sena go roba mephakalego ya dijokwe tsa bone, mme ke ba golotse mo seatleng sa ba ba itirelang ka bone. 28Ga ba ketla ba tlhola ba le kgapo ya baditšhaba, le sebatana sa lefatshe ga se ketla se ba ja; mme ba tlaa aga ka thagamo, ope ga a ketla a ba boifisa. 29Ke tlaa ba tsosetsa sekgwana se se tlaa tumang, ga ba ketla ba tlhola ba nyelediwa ke leuba mo lefatsheng, le fa e le go tlhola ba belega botlhabisa ditlhong jwa baditšhaba gope. 30Ba tlaa itse fa nna Morena Modimo wa bone ke na le bone, le go re bone ba ntlo ya Iseraele ke batho ba me, go bua Morena Modimo.
31“Lona dinku tsa me, dinku tsa bofulo jwa me, lo batho, le nna ke Modimo wa lona.” Go bua Morena Modimo.
