ESEKIELE 3

₁A nthaya, a re: “Morwa motho, ja se o se fitlhelang; o je momenagano o, o itse go ya o bua le ba ntlo ya Iseraele.”

₂Jalo ka atlhamolosa molomo wa me, mme a njesa momenagano oo wa lokwalo. ₃A nthaya, a re: “Morwa motho, jesa mpa ya gago, mme o tlatse mala a gago ka momenagano o ke o go nayang.” Foo ka o ja; mme mo ganong la me wa bo o ntse jaaka dinotshe ka monate.

₄A nthaya, a re: “Morwa motho, tloga o ye kwa go ba ntlo ya Iseraele, mme o bue nabo ka mafoko a me. ₅Gonne ga o a rongwa kwa tšhabeng e e loleme losele, le fa e le ba ba puo e e thata, fa e se kwa go ba ntlo ya Iseraele fela. ₆E seng kwa ditšhabeng di le dintsi tse di loleme losele, tse di puo e e thata, ba mantswe a bone o sa kakeng wa a tlhaloganya. Ruri fa ke ka bo ke ne ke go roma kwa go bao, ba ka bo ba go reetsa. ₇Ba ntlo ya Iseraele ga ba ketla ba go reetsa; gonne ga ba ketla ba reetsa nna; ka go bo botlhe ba ntlo ya Iseraele ba phatla e e logwadi, le pelo e e lesoko. ₈Bona, ke gwaladitse sefatlhogo sa gago sa tshwana le difatlhogo tsa bone, ke gwaladitse phatla ya gago ya tshwana le diphatla tsa bone. ₉Ke thatafaditse phatla ya gago ya nna jaaka lentswetshipi le le thata bogolo go lekgethu; o se ka wa boifa, o bo o se ka wa tseanngwa ke ponalo ya bone, le fa ba le ntlo e e borukhutlhi.”

₁₀Gape a nthaya, a re: “Morwa motho, mafoko otlhe a me a ke tlaa a buang nao o a amogele ka pelo, o bo o a utlwe ka ditsebe. ₁₁Tloga o ye kwa go bone ba botshwaro, kwa baneng ba batho ba gaeno, mme o bue nabo, o ba bolelele, o re: ‘Morena Modimo o bua jaana;’ o bue fela le fa ba utlwa, le fa ba gana.”

₁₂Foo mowa wa ntsholetsa, mme ka utlwa fa morago ga me lentswe la tsubalalo e kgolo, le re: “A go bakwe kgalalelo ya ga Jehofa mo felong ga gagwe.” ₁₃Mme ka utlwa mosumo wa diphuka tsa ditshedi ka di amana, le modumo wa maoto a a dikologang fa go tsone, e bong modumo wa tsubalalo e kgolo. ₁₄Jalo mowa wa ntsholetsa, wa tsamaya ka nna; mme ka tsamaya ka bogalaka, ka mogote wa mowa wa me, mme seatla sa ga Jehofa sa bo se le mo go nna ka thata. ₁₅Foo ka fitlha mo go ba botshwaro kwa Teleabibe, ba ba agileng fa nokeng ya Kebare, le kwa ba agileng teng; mme ka dula teng malatsi a supa ke gakgametse fela.

₁₆Ga dirala e rile malatsi a supa a sena go feta, lefoko la ga Jehofa la tla mo go nna, la re: ₁₇“Morwa motho, ke go beile molebedi wa ba ntlo ya Iseraele; ke gone utlwa lefoko la molomo wa me, mme o ba neye tlhagiso e e tswang mo go nna. ₁₈Ya re fa ke raya moikepi, ke re: ‘Ruri o tlaa swa;’ mme o sa mo tlhagise, o sa bue go tlhagisa moikepi go mo faposa tseleng ya gagwe ya boikepo, go tla o boloka botshelo jwa gagwe; moikepi yoo o tlaa swela mo boikepong jwa gagwe; mme madi a gagwe ke tlaa a lopa mo seatleng sa gago. ₁₉Le fa go ntse jalo e re fa o tlhagisa moikepi, mme a sa sokologe mo boikepong jwa gagwe, le fa e le mo tseleng ya gagwe ya boikepo, o tlaa swela mo boikepong jwa gagwe; mme wena o bo o golotse mowa wa gago.

₂₀“Gape, ya re fa mosiami a fapoga mo tshiamong ya gagwe, a dira boikepo, mme ke baya sekgopi fa pele ga gagwe, o tlaa swa; e re ka o se ka wa mo tlhagisa, o tlaa swela mo boleong jwa gagwe, mme ditiro tsa gagwe tsa tshiamo tse o kileng a di dira ga di ketla di gakologelwa; mme madi a gagwe ke tlaa a lopa mo seatleng sa gago. ₂₁Le fa go ntse jalo, ya re fa o tlhagisa mosiami, gore mosiami a se ka a leofa, mme a sa leofe, ruri o tlaa tshela, ka a tlhagisegile; le wena o bo o golotse mowa wa gago.”

₂₂Seatla sa ga Jehofa se ne se le teng mo go nna; mme a nthaya, a re: “Nanoga, o tswele kwa lobaleng, mme ke tlaa bua nao teng.”

₂₃Foo ka nanoga, ka tswela kwa lobaleng; mme bonang, kgalalelo ya ga Jehofa ya ema teng, e ntse jaaka kgalalelo e ke e bonyeng fa nokeng ya Kebare; mme ka wela ka sefatlhogo fa fatshe. ₂₄Foo mowa wa tsena mo go nna, wa nkemisa ka dinao; wa bua le nna wa nthaya, wa re: “Ya o itswalele mo ntlong ya gago. ₂₅Wena morwa motho, bona, ba tlaa baya dikgole mo go wena, ba tlaa go golega ka tsone, mme ga o ketla o tswela kwa go bone. ₂₆Le loleme lwa gago ke tlaa lo ngaparisa magalapa a gago, mme o tlaa nna semumu, ga o ketla o nna mmuedi mo go bone; gonne ke ba kgotla e e borukhutlhi. ₂₇Ke tlaa re ke bua nao, ke go tumolole molomo, mme o tlaa ba raya, o re: ‘Morena Modimo o bua jaana, a re:’ Yo o utlwang, a a utlwe; yo o ganang, a a gane; gonne ke kgotla e e borukhutlhi.