Polelelopele ka ga Ture
1Ga dirala ya re ka ngwaga wa 11, ka letsatsi la ntlha la kgwedi, lefoko la ga Jehofa la tla mo go nna, la re: 2“Morwa motho, e re ka Ture o buile ka ga Jerusalema wa re: ‘Ahe, one o e neng e le kgoro ya ditšhaba o thubegile; o menogetse mo go nna; jaanong nna ke tlaa tlalelediwa, ka one o kgakgabaditswe;’ 3ke gone ka moo go bua Morena Modimo, a re: Bona, ke tlhabana nao, wena Ture, ke tlaa go tsosetsa merafe e le mentsi e tle go go tlhasela jaaka lewatle le tle le tsose makhubu a lone. 4E tlaa senya dithako tsa Ture, e tlaa rutla dikago tse di godileng tsa tlhabanelo tsa gone; ke bile ke tlaa gopa lorole mo go ene, ke mo ntsha lefika le le borethe fela. 5O tlaa nna felo ga go anega ditloa mo gare ga lewatle; gonne ke buile, go bua Morena Modimo; o tlaa tswa thopo ya merafe. 6Bomorwadie ba ba mo nageng ba tlaa bolawa ka tšhaka, mme ba tlaa itse fa ke le Jehofa.”
7Gonne Morena Modimo o bua jaana, a re: “Bonang ke tlaa lere mo Ture Nebukatenesare kgosi ya Babilone, kgosi ya dikgosi e tswa ntlheng ya botsheka e na le dipitse le dikara, le bapalama dipitse, le lesomo la batho ba le bantsi. 8O tlaa bolaya bomorwadio ka tšhaka mo nageng, mme o tlaa go agela dikago tsa tlhabanelo, a go tsosetsa dimota, a ba a go tsholeletsa thejana. 9O tlaa tlhomela dithako tsa gago dikgaraga tsa gagwe tse di thubaganyang, mme o tlaa rutla dikago tse di godileng tsa gago tsa tlhabanelo ka dilepe tsa gagwe. 10O tlaa khurumediwa ka lorole ka ntlha ya bontsi jwa dipitse tsa gagwe; dithako tsa gago di tlaa reketla ka modumo wa bapalama dipitse ba gagwe, le wa makoloi, le wa dikara, mogang o tsenang mo dikgorong tsa gago, jaaka batho ba tle ba tsene mo motseng o go ntshitsweng phatlha mo go one. 11O tlaa gatakela mebila yotlhe ya gago ka ditlhako tsa dipitse tsa gagwe; o tlaa bolaya batho ba gago ka tšhaka, dikago tsa gago tse di emeng metloutlo tsa thata ya gago di tlaa wela fa fatshe. 12Dikhumo tsa gago ba tlaa di ntsha thopo, ba tlaa gapa tlhwatlhwa ya gago; ba tlaa thuba dithako tsa gago, ba senya matlo a gago a a eletsegang; mme maje a gago, le dikgong tsa gago, le lorole lwa gago, ba tlaa baya gotlhe fela mo gare ga metse. 13Mme ke tlaa khutlisa tumo ya dipina tsa gago; modumo wa diharepe tsa gago ga o ketla o tlhola o utlwala. 14Ke tlaa go ntsha lefika le le borethe fela; o tlaa nna felo ga go anega ditloa; ga o ketla o tlhola o agiwa; gonne nna Morena ke buile.” Go bua Morena Modimo.
15Morena Modimo o bua jaana le Ture, a re: “A ditlhake ga di ketla di reketla ka phašogo ya go wa ga gago, motlhang o ba ba tlhabilweng ba sonelang, motlhang o polao e gailang mo gare ga gago? 16Foo dikgosana tsotlhe tsa lewatle di tlaa fologa mo ditulong tsa tsone tsa bogosi, di tlaa apola dikobo tsa tsone di ba di apola diaparo tsa tsone tse di mororodi; di tlaa ikapesa dithoromo; di tlaa dula fa fatshe di ntse di roroma fela, di go gakgamaletse. 17Ba tlaa go tlhabeletsa khutsafalelo, ba go raya ba re:
“ ‘Ana o sentswe jang,
wena yo o ne o nnwa
ke batsamai ba lewatle,
wena motse o o tumileng,
o o ne o le thata mo lewatleng,
wena le banni ba gago,
ba lo ne lo tle lo tsenye
therego ya lona
mo go botlhe ba ba o serang!’
18Jaanong ditlhake di tlaa roroma
mo motlheng wa go wa ga gago;
ee, ditlhake tse di mo lewatleng
di tlaa tseanngwa
ke go tloga ga gago.”
19Gonne Morena Modimo o bua jaana a re: “Mogang ke go dirang motse, o o swafetseng, o o tshwanang le metse e e sa nnweng; mogang ke tlhatlosetsang, boteng mo go wena, le metsi a magolo, a go khurumetsa; 20foo ke tlaa go folosa le ba ba fologelang kwa moleteng, ba ya bathong ba metlha ya bogologolo; ke tlaa go agisa mo mafelong a a kwa tlasetlase a lefatshe mo mafelong a a sa leng a swafala bogologolo, o na le ba ba fologelang mo moleteng, gore o tle o se nnwe; le fa e le go tlhoma kgalalelo ya gago mo lefatsheng la batshedi. 21Ke tlaa go dira theregiso, mme o bo o sa tlhole o leyo; le fa o ka batlwa, o tlaa bo o sa tlhole o ka bonwa gope,” go bua Morena Modimo.
