ESEKIELE 16

₁Gape lefoko la ga Jehofa la tla mo go nna, la re: ₂“Morwa motho, o itsise Jerusalema tse di makgapha tsa one. ₃O re: Morena Modimo o bua jaana a raya Jerusalema, a re:

“Botsalo jwa gago le tlholego ya gago ke ga lefatshe la Mokanana; rraago e ne e le Moamora, mmaago e ne e le Mohite. ₄Ka ga tlholego ya gago, e rile ka tsatsi le o tsetsweng ka lone, khubu ya gago ga e a ka ya kgaolwa, le gone ga o a ka wa tlhapisiwa ka metsi go tla o ntlafadiwa; ga o a ka wa tshasiwa ka letswai gope, le fa e le go bofelelwa gope. ₅Go ne go se leitlho lepe le le go lebang ka bopelonomi go go direla sengwe sa tse, go go tlhomogela pelo; mme wa latlhelwa mo paeng fela, gonne mmele wa gago o ne o tlhoesegile mo tsatsing le o tsetsweng ka lone.

₆“E rile ke go feta, ke go bona o bidikama mo mading a gago, ka go raya ka re: ‘Le fa o le mo mading a gago, o tshele;’ ee, ka go raya ka re: ‘Le fa o le mo mading a gago, o tshele.’ ₇Ke go ntsifaditse jaaka dithunya tsa naga, mme wa gola, wa nna mogolo, wa fitlha mo mokgabong o montle thata; mabele a gago a ne a dule, moriri wa gago o ne o godile; le fa go ntse jalo o ne o sa ikatega o le loforotlho fela.

₈“Jaana e rile ke go feta, mme ke go leba, bonang, lobaka lwa gago e ne e le lobaka lwa lorato; mme ka go apesa khiba ya me, ka bipa bosaikategang jwa gago. Ee, ka go ikanela, ka dira kgolagano nao.” Go bua Morena Modimo: “Mme wa nna wa me.

₉“Foo ka go tlhapisa ka metsi; ee, ka go tlhapisa thata ka tlosa madi a gago, ka go tlotsa lookwane. ₁₀Le gone ka go apesa marorodi, ka go rwesa ditlhako tsa matlalo a manyedi, ka go tlama ka leloba le le boleta, ka go khurumetsa ka sei. ₁₁Ka ba ka go kgabisa ka mekgabo, ka go rwesa mefitshana mo mabogong, le mpolokwane mo thamong ya gago. ₁₂Ka go tsenya mokgabo wa nko mo nkong, le manyena mo ditsebeng tsa gago, le serwalo se sentle mo tlhogong ya gago. ₁₃Wa kgabisiwa jalo ka gouta le selefera; diaparo tsa gago e ne e le leloba le le boleta le sei, le marorodi; o ne wa ja setou, dinotshe le lookwane; o ne o le montle thata, wa segofala, wa ba wa tla wa fitlha mo popegong ya segosi. ₁₄Tumedi ya gago ya tumela kwa merafeng ka bontle jwa gago; gonne bo ne bo itekanetse, ka ntlha ya borena jwa me jo ke ne ke bo beile mo go wena. Go bua Morena Modimo.

₁₅“O ne wa ikanya bontle jwa gago, wa dira boaka ka ntlha ya tumedi ya gago, wa thela maakafalo a gago mo go mongwe le mongwe yo o fetang; ya nna a gagwe. ₁₆Wa tsaya diaparo tsa gago, wa itirela mafelo a a tlotlometseng a a kgabisitsweng ka mebala mengwe le mengwe, wa dira boaka mo go one. Dilo tse di ntseng jalo ga di ketla di tla, le gone ga go ketla go nna jalo. ₁₇Le gone wa tsaya dilwana tsa gago tse dintle tsa gouta ya me, le tsa selefera sa me, tse ke ne ke di go neile, wa itirela ditshwantsho tsa senna, mme wa dira boaka natso. ₁₈Wa tsaya diaparo tsa gago tsa marorodi, wa di apesa, wa baya lookwane lwa me lwa maswalo a me fa pele ga tsone. ₁₉Le dijo tsa me tse ke ne ke di go neile, setou, le lookwane le dinotshe tse ke go otlileng ka tsone, wa di baya fela fa pele ga tsone go nna lonko lo lo otlileng ka tsone, wa di baya fela fa pele ga tsone go nna lonko lo lo monate, mme ga nna jalo. Go bua Morena Modimo.

₂₀“Gape o bile o tshotse bomorwao le bomorwadio ba o ba bonyeng le nna, bao o ba bolaetse ditshwantsho tseo go tla ba jewa. A boaka jwa gago e ne e le sengwe se sebotlana, fa e bo ne ne o bolaile bana ba me, ₂₁wa ba neelela fela, ka o ba ralaleditse ditshwantsho molelo? ₂₂Mo go tse di makgapha tsotlhe tsa gago, le mo boakeng jotlhe jwa gago, ga o ise o ke o gakologelwe metlha ya borweetsana jwa gago, jale ka o ne o sa ikatega o le loforotlho, o bidikama mo mading a gago.”

₂₃“Go diretse morago ga boikepo jotlhe jwa gago, (a bo o latlhegile, o latlhegile! Go bua Morena Modimo.) ₂₄Ga re, o ikagetse ntlwana e e goletsegileng, o itiretse felo fa go godileng mo mmileng mongwe le mongwe. ₂₅O agile felo ga gago fa go goletsegileng fa dipaeng tsa ditsela, mme bontle jwa gago o bo kgaphafaditse, o ikakanegetse mongwe le mongwe yo o fetang, o totisitse boaka jwa gago. ₂₆O bile o dirile boaka le Baegepeto, bang ka wena, ba ba nama e kgolo; o totisitse boaka jwa gago go ntlhotlheletsa bogaleng.

₂₇“Ke gone bona, ke go otlololetse seatla, ke ngotlile dijo tsa gago tsa gale, ke go neetse mo go rateng ga bone ba ba go ilang, e bong bomorwadia Bafilisitia, ba ba tlhajwang ke ditlhong ka mokgwa wa gago wa botlhodi.

₂₈“O bile o dirile boaka le Baasiria, ka o ne o se na bokgonego; ee, o dirile boaka nabo, le fa go ntse jalo o se ka wa kgonega. ₂₉Gape o totisitse boaka jwa gago mo lefatsheng la Kanana, go ya kwa Kalatea; le fa go ntse jalo wa se ka wa kgonega ka moo.

₃₀“Ana pelo ya gago e motlhofo jang,” go bua Morena Modimo, “ka e le fa o dira tsotlhe tse, e le tiro ya mosadi wa seaka yo o boitaolo bogolo; ₃₁ka o aga ntlwana ya gago e e goletsegileng dibaeng tsa ditsela tsotlhe, o dira felo ga gago fa go goletsegileng mo mebileng yotlhe; o ntse o sa nna jaaka seaka, ka go bo o nyatsa tuelo. ₃₂A mosadi yo o dirang boaka a na le monna wa gagwe! Yo o tsholang baeng mo boemong jwa monna wa gagwe! ₃₃Batho ba tle ba neye basadi botlhe ba diaka dineo; wena o naya dinyatsi tsotlhe tsa gago dineo; o ba oka ka dineo, gore ba tle mo go wena ka ntlha tsotlhe, ka boaka jwa gago. ₃₄Wena o farologanye le basadi ba bangwe mo go akafaleng ga gago, ka o se ke o latelwa ke ope a ya go dira boaka nao; mme e re ka o ntsha tuelo, mme o se ke o newa tuelo, ka re, o farologanye le basadi ba bangwe.”

₃₅“Ke gone, wena seaka, utlwa lefoko la Jehofa:

₃₆“Morena Modimo o bua jaana a re: Ka ntlha ya go bo bomaswe jwa gago bo tshologile, le bosaikategang jwa gago bo senotswe ka boaka jwa gago le dinyatsi tsa gago; le ka ntlha ya medimo ya disetwa ya tsotlhe tsa gago tse di makgapha, le ka ntlha ya madi a bana ba gago ba o di ba neileng; ₃₇ke gone bona, ke tlaa phutha dinyatsi tsotlhe tsa gago, tse o jeleng monate natso, le botlhe ba o ba ratileng, ba na le botlhe ba o ba idileng; ke tlaa ba go phuthela fela ka ntlha tsotlhe, mme ke tlaa ba senolela bosaikategang jwa gago, gore ba tle ba bone bosaikategang jotlhe jwa gago. ₃₈Ke tlaa go sekisa jaaka go tle go sikisiwe basadi ba ba senyang nyalo le ba ba tshololang madi; ke tlaa lere mo go wena madi a tšararego le lefufa. ₃₉Le gone ke tlaa go tsenya mo seatleng sa bone, mme ba tlaa diga ntlwana ya gago e e goletsegileng, ba tlaa rutla mafelo a gago a a godileng; ba tlaa go apola diaparo, ba tlaa tsaya dilwana tsa gago tse dintle, ba go tlogela o sa ikatega o le loforotlho fela.

₄₀“Gape ba tlaa lere lesomo mo go wena, ba go kgobotletsa ka maje, ba go phololetsa ka marumo a bone. ₄₁Ba tlaa fisa matlo a gago ka molelo, ba tlaa go direla ditshekiso mo ponong ya basadi ba le bantsi; mme ke tlaa go khutlisa mo go tlholeng o dira boaka, le gone ga o ketla o tlhola o ntsha dituelo. ₄₂Jalo ke tlaa kgorisa tšararego ya me mo go wena, lefufa la me le tlaa ntlogela, ke tlaa iketla, mme ga nketla ke tlhola ke nna bogale. ₄₃E re ka o se ka wa gakologelwa metlha ya borweetsana jwa gago, mme o ntshwentse mo dilong tsotlhe tse; ka re, bona, le nna ke tlaa lere mokgwa wa gago mo tlhogong ya gago, go bua Morena Modimo, ga o ketla o dira botlhodi joo mo go godimo ga makgapha otlhe a gago.”

₄₄Bona, mongwe le mongwe yo o tlhabang diane, o tlaa tlhaba seane se ka ga gago, a re: Jaaka mma motho a ntse, morwadie le ene o ntse jalo. ₄₅O morwadia mmaeno, yo o sulafaletsweng ke monna wa gagwe le bana ba gagwe; o mongwe ka bana ba ga mmaago, ba ba sulafaletsweng ke banna ba bone; mmaeno e ne e le Mohite, rraeno e le Moamore.

₄₆“E bile mogoloo ke Samaria, yo o agileng ka fa ntlheng ya la molema ga gago, ene le bomorwadie; mme monnao, yo o agileng ka fa ntlheng ya le legolo ga gago, ke Sotoma le bomorwadie. ₄₇Le fa go ntse jalo ga o a tsamaya mo ditseleng tsa bone, le fa e le go dira ka fa go tse di makgapha tsa bone; mme go ntse jaaka ekete moo e ne e le selo se sennyennyane fela, wa bola bogolo go bone mo ditseleng tsotlhe tsa gago.

₄₈“Jaaka ke tshedile,” go bua Morena Modimo, “Sotoma monnao ene le bomorwadie, ga a ise a ke a dire jaaka o dirile wena le bomorwadio. ₄₉Bona, boikepo jwa ga Sotoma monnao e ne e le jone jo; o ne a na le boikgodiso, le letlotlo la dijo, le boiketlo jo bo letlhogonolo, ene le bomorwadie; le gone ga a ka a thatafatsa seatla sa bahumanegi le batlhoki. ₅₀Ba ne ba ipegela godimo, ba dira tse di makgapha fa pele ga me; ke gone ka moo ka ba tlosa ka fa ke bonyeng go le molemo ka gone.

₅₁“Le ene Samaria ga a ise a ke a dire le fa e le bontlhanngwe jwa maleo a gago; mme wena o ntsifaditse tse di makgapha tsa gago bogolo go bone, mme o siamisitse bana ba ga mmaago ka tse di makgapha tsa gago tsotlhe, tse o di dirileng. ₅₂Le wena, belega tse e leng botlhabisa ditlhong jwa gago, ka o atlholetse bana ba ga mmaago; ka maleo a gago a o a dirileng a makgapha bogolo go a bone, ba siame bogolo go wena. Ee, o sosobagane o belege botlhabisa ditlhong jwa gago, ka o siamisitse bana ba ga mmaago.”

₅₃“Ke tlaa busa botshwaro jwa bone, botshwaro jwa ga Sotoma le bomorwadie, le botshwaro jwa ga Samaria le bomorwadie, le botshwaro jwa batshwarwi ba gago mo gare ga bone; ₅₄gore o tle o belege tsa botlhabisa ditlhong tsa gago, le gore o tlhajwe ke ditlhong ka ntlha ya tsotlhe tse o di dirileng ka o le kgomotso ya bone. ₅₅Bana ba ga mmaago, Sotoma le bomorwadie, ba tlaa boela mo boemong jwa bone jwa pele, le Samaria le bomorwadie ba tlaa boela boemong jwa bone jwa pele, le wena le bomorwadio lo tlaa boela mo boemong jwa lone lwa pele. ₅₆Gonne monnao Sotoma o ne a se ka a umakwa ke molomo wa gago mo motlheng wa boikgodiso jwa gago; ₅₇pele boikepo jwa gago bo ise bo senolwe, jaaka mo motlheng wa kgobo ya bomorwadia Siria, le ya botlhe ba ba mo tikologong ya gagwe, bomorwadia Bafilisitia, ba ba go kgokgontshang ka ntlha tsotlhe. ₅₈O belege bomaswe jwa gago le tse di makgapha tsa gago.” Go bua Jehofa.

₅₉Gonne Morena Modimo o bua jaana, a re: “Ke tlaa go direla fela jaaka o dirile, wena yo o nyaditseng ikano ka go senya kgolagano. ₆₀Le fa go ntse jalo ke tlaa gakologelwa kgolagano ya me nao ya jale mo metlheng ya borweetsana jwa gago, mme ke tlaa go tlhomamisetsa kgolagano e e sa khutleng. ₆₁Foo o tlaa gakologelwa mekgwa ya gago, o tlhajwe ke ditlhong, mogang o amogelang bana ba ga mmaago, bomogoloo le bomonnao; ke tlaa ba go naya go nna bomorwadio, mme e seng ka kgolagano ya gago. ₆₂Ke tlaa tlhomamisa kgolagano ya me nao; mme o tlaa itse fa ke le Jehofa, ₆₃gore o gakologelwe, mme o sosobagane, e seng go tlhola o tswa molomo gope, ka ntlha ya ditlhong tsa gago; mogang ke go itshwaretseng gotlhe mo o go dirileng.” Go bua Morena Modimo.