EKESODO 38

₁Sebeso sa tshupelo e e fisiwang a se dira ka mokala, boleele jwa sone e le boleele jwa dimetara di le 2,2, boatlhamo jwa sone, dimetara di le 2,2, se le dintlha di le nne tse di lekalekanyeng fela; bogodimo jwa sone e le dimetara di le 1,3. ₂Dinaka tsa sone a di dira ka fa dintlheng tsa sone tse nne; dinaka tsa sone e le logong lo le longwe fela naso, di semega mo go sone; a se manega kgotlho. ₃A dira dilwana tsotlhe tsa sebeso, diolela melora, digopa melora, megotšana, dikgogetsa nama, le ditsaya molelo; dilwana tsotlhe tsa sone a di dira ka kgotlho. ₄A direla sebeso leiso le le setlatla la kgotlho, le logilwe selotloa, la huhumela maemo a a mo tikologong ya sebeso fa bogareng jwa ditlhakore tsa sebeso. ₅A thelela dintlha tse nne tsa leiso la kgotlho melepo e le mene, gore e nne masomelo a disikaro. ₆Disikaro a di dira ka mokala, a di manega kgotlho. ₇A tsenya disikaro mo melepong e e ka fa ditlhakoreng tsa sebeso, go tla se sikarwa ka tsone; mme a se dira kgapa ka dimati.

₈A dira mogopo o o tlhapelang ka kgotlho, le setlhomo sa one ka kgotlho, e le kgotlho ya diiponi tsa basadi ba ba direlang, ba ba nnetseng tirelo fa mojakong wa mogope wa bophuthegelo.

₉A dira lolwapa; matsela a a lepeletseng a lotlhakore lwa ka fa ntlheng ya borwa, e le a letsela la leloba le le boleta, le le otlhilweng bosesane, a le boleele jwa dimetara di le 44. ₁₀Maotwana a lone a le 20, le ditlhako tsa one di le 20, e le a kgotlho; dikgoge tsa maotwana le dipalelo tsa one e le selefera. ₁₁Matsela a ntlha ya botsheka a le boleele jwa dimetara di le 44, maotwana a one a le 20 le ditlhako tsa one di le 20, e le tsa kgotlho; dikgoge tsa maotwana le dipalelo tsa one e le tsa selefera. ₁₂Matsela a a lepeletseng a ntlha ya bophirimatsatsi, a ne a le boleele dimetara di le 22, maotwana one a le some, le ditlhako tsa one di le some; dikgoge tsa maotwana le dipalelo tsa one e le tsa selefera. ₁₃A lotlhakore lwa ka fa botlhabatsatsi a ne a le boleele jwa dimetara di le 22. ₁₄Matsela a a lepeletseng a ntlha e nngwe ya kgoro a le boleele jwa dimetara di le 6,6 maotwana one a le mararo le ditlhako tsa one di le tharo; ₁₅le ka ntlha e nngwe go ne go ntse jalo; mo ntlheng e nngwe le e nngwe ga kgoro ya lolwapa go ne go le matsela a a lepeletseng a le boleele jwa 6,6; maotwana a one a le mararo le ditlhako tsa one di le tharo. ₁₆Matsela otlhe a a lepeletseng mo tikologong ya lolwapa e le a leloba le le boleta le le otlhilweng bosesane. ₁₇Ditlhako tsa maotwana e le tsa kgotlho; dikgoge tsa maotwana le dipalelo tsa one e le selefera; mme ditlhogwana tsa tsone di manegilwe selefera, le dipalelo tsa maotwana otlhe a lolwapa e le tsa selefera. ₁₈Sebipo sa kgoro ya lolwapa e ne e le tiro ya motsantsabetsi, ya bobududu, le bohibidu jo bo mokgona, le bohibidu jo bo letlhlololo, le leloba le le boleta le le otlhilweng bosesane; boleele e le dimetara di le 9, bogodimo mo boatlhamong e le dimetara di le 2, le lekana le matsela a mangwe a a lepeletseng a lolwapa. ₁₉Maotwana a one a ne a le mane, le ditlhako tsa one di le nne, e le tsa kgotlho; dikgoge tsa one e le selefera le ditlhogwana tsa one di manegilwe selefera, le dipalelo tsa one e le selefera. ₂₀Dimapo tsotlhe tsa motlaagana le tsa tikologo ya lolwapa, e ne e le tsa kgotlho.

₂₁Dilo tsa motlaagana fa di sobokantswe ke tse; e bong motlaagana wa tshupo, jaaka di badilwe, ka fa Moše o laotseng ka gone, a di laolela tirelo ya Balefi, ka seatla sa ga Ithamare morwa Arone moperesiti. ₂₂Besalele morwa Uri morwa Hure wa lotso lwa Juta, a dira tsotlhe tse Jehofa o di laoletseng Moše. ₂₃Oholiabe morwa Ahisamake wa lotso lwa Dane, o ne a na nae, e le mogabi, le motsetseneki, le motsantsabetsi wa bobududu, le bohibidu jo bo mokgona, le bohibidu jo bo letlhololo, le leloba le le boleta. ₂₄Gouta yotlhe e go dirilweng tiro yotlhe ya felo ga boitshepo ka yone, e bong gouta ya tshupelo ya batho, e ne e le dikilokerame di le 1 000, ka fa selekanyong sa felo ga boitshepo. ₂₅Selefera sa ba phuthego ba ba badilweng e ne e le dikilokerame di le 3 430 ka fa selekanyong sa felo ga boitshepo; ₂₆selekanyo se, e ne e le se se kanang ka se se ntshiwang ke botlhe ba ba badilweng, mongwe le mongwe a duela ka fa selekanyong sa felo ga boitshepo. E ne e le batho ba le 603 550 ba ba ngwaga di 20 le go ya kwa godimo. ₂₇Selefera se se dikilokerame di le 3 400, e le sa go bopa ditlhako tsa felo ga boitshepo le ditlhako tsa sesiro, ditlhako di le lekgolo, dikilokerame di le 34 tsa setlhako se le sengwe fela. ₂₈Ka dikilokerame di le 30 a dira dikgoge tsa maotwana, mme a manega ditlhogwana tsa one ka sone, a ba a a thathelela. ₂₉Kgotlho ya tshupelo ya batho e ne e le dikilokerame di le 2 425. ₃₀A dira ka one ditlhako tsa setswalo sa mogope wa bophuthegelo, le sebeso sa kgotlho, le leiso le le setlatla la sone la kgotlho, le dilwana tsotlhe tsa sebeso, ₃₁le ditlhako tsa lolwapa mo tikologong ya lone, le ditlhako tsa setswalo sa lolwapa, le dimapo tsotlhe tsa motlaagana, le dimapo tsotlhe tsa lolwapa mo tikologong ya lone.