EKESODO 3

₁Moše a bo a disitse letsomane la ga Jethero mogwagadie, moperesiti wa Midiane; a disetsa letsomane kwa tengteng ga naga, a fitlha kwa thabeng ya Modimo kwa Horebe. ₂Moengele wa ga Jehofa a bonala kwa go ene a le mo kgabong ya molelo o o tukang mo gare ga setlhare; a leba, mme bona, setlhare sa bo se tuka molelo, mme sa bo se sa še. ₃Moše a re: “Ke tlaa fapoga ke ya go leba pono e kgolo e, ka fa setlhare se se sa šeng ka gone.”

₄E rile Jehofa a bona fa a fapoga a ya go bona, Modimo wa mo tlhaeletsa o le mo gare ga setlhare wa re: “Moše! Moše!” Ene a re: “Ke fano.”

₅Wa re: “O se ka wa atamela kwano; rola ditlhako tsa gago mo dinaong tsa gago gonne felo foo fa o emeng gone ke mmu o o boitshepo.” ₆Wa fela wa re: “Ke nna Modimo wa ga rraago, Modimo wa ga Aberahame, Modimo wa ga Isake, le Modimo wa ga Jakobe.” Moše a ipipa sefatlhogo, gonne a boifa go leba Modimo.

₇Jehofa a re: “Ruri ke bonye patikego ya batho ba me ba ba kwa Egepeto, ke bile ke utlwile thomeletso ya bone ka ntlha ya bagobagobetsi ba bone; ka gobo ke a a itse mahutsana a bone; ₈mme ke fologetse go ba golola mo seatleng sa Baegepeto, le go ba tlhatlosa mo lefatsheng leo, go ba isa kwa lefatsheng le le molemo, le le atlhameng, kwa lefatsheng le le elang maši le dinotshe; kwa felong ga Bakanana, le Bahite, le Baamore, le Baperise, le Bahife, le Bajebuse. ₉Thomeletso ya bana ba Iseraele e fitlhile mo go nna; gape ke bile ke bonye patiko e Baegepeto ba ba patikang ka yone. ₁₀Ntlo, ke tlaa go roma kwa go Faro gore o tle o ntshe batho ba me, bana ba Iseraele, mo Egepeto.”

₁₁Moše a raya Modimo a re: “Ana nna ke mang, fa e bo ne ne ke ka ya kwa go Faro, le go ya go ntsha bana ba Iseraele mo Egepeto?”

₁₂Wa re: “Ke tlaa nna nao ka mmaanete; se e tlaa nna sesupo mo go wena sa fa ke go romile; e tlaa re o sena go ntsha batho mo Egepeto, lo tlaa direla Modimo mo thabeng e.”

₁₃Moše a raya Modimo a re: “Bona, e tlaa re ke fitlha mo baneng ba Iseraele ke ba raya ke re: ‘Modimo wa borraeno o nthomile kwano go lona,’ mme ba nthaya ba re: ‘Leina la one ke mang?’ Ke ba reye ke reng?”

₁₄Modimo wa raya Moše wa re: “KE NTSE YO KE NTSENG;” wa re: “O tlaa bua le bana ba Iseraele jaana o re: ‘KE NTSE o nthomile kwano go lona.’ ” ₁₅Modimo wa fela wa bua le Moše wa re: “O tlaa raya bana ba Iseraele o re: ‘JEHOFA, Modimo wa borraeno, Modimo wa ga Aberahame, Modimo wa ga Isake, le Modimo wa ga Jakobe, o nthomile kwano go lona.’ Le ke lone leina la me ka bosakhutleng; ke lone segopotso sa me go ya mo tshikatshikeng tsotlhe. ₁₆Ya o phuthe bagolwane ba Iseraele mmogo o ba reye o re: ‘Jehofa Modimo wa borraeno, Modimo wa ga Aberahame, wa ga Isake, le wa ga Jakobe, o mponaletse wa re: “Ruri ke lo lekotse, ke bile ke bonye se lo se dirwang mo Egepeto; ₁₇Ke rile, ke tlaa lo tlhatlosa mo patikong ya Egepeto, ke lo isa kwa lefatsheng la Bakanana, le Bahite, le Baamore, le Baperise, le Bahife le Bajebuse, kwa lefatsheng le le elang maši le dinotshe.” ’

₁₈“Ba tlaa reetsa lentswe la gago; mme o tlaa ya, wena le bagolwane ba Iseraele, lo ya kgosing ya Egepeto lo e reye lo re: ‘Jehofa, Modimo, wa Bahebere o kopanye le rona; re a go rapela ra re: A o ko o mme re tsamaye loeto lwa malatsi a le mararo mo nageng, gore re isetse Jehofa Modimo wa rona tlhabelo.’ ₁₉Ke a itse fa kgosi ya Egepeto e se ketla e lo leseletsa go tsamaya, nnyaa, le fa e le ka letsogo le le thata. ₂₀Ke tlaa otlolola letsogo la me ke betsa Egepeto ka dikgakgamatso tsa me tsotlhe fela tse ke tlaa di dirang mo gare ga bone; morago ga mo e tlaa lo leseletsa go tsamaya.

₂₁“Tšhaba e, ke tlaa e naya go bona letlhogonolo mo matlhong a Baegepeto. Go tlaa diragala gore e tlaa re lo tsamaya lo bo lo sa tsamaye lo iphotlhere fela; ₂₂mosadi mongwe le mongwe o tlaa lopa yo o bapileng nae, a ba a lopa yo o tlhotsetlhotseng mo ntlong ya gagwe mekgabo ya selefera, le mekgabo ya gouta, le diaparo; mme lo tlaa di apesa bomorwaa lona le bomorwadia lona, lo tlaa amoga Baegepeto.”