EKESODO 22

₁“Fa motho a utswa kgomo, le fa e le sehutshane, mme a e bolaya, gongwe a e rekisa; a a lefe kgomo ka dikgomo di le tlhano, le sehutshane ka dihutshane di le nne. ₂Fa legodu le ka tshwarwa le phunya kgoro, mme la itewa la a swa, go tlaa bo go se na molato o motho o ka o bolaelwang. ₃Fa letsatsi le ne le le tlhabetse, go tlaa nna molato o motho o o bolaelwang: le ne le tshwanetse go lefa; mme fa le se na sepe, foo a le rekisediwe bogodu jwa lone. ₄Fa se se utswilweng se fitlhelwa mo go ene se sa ntse se utlwa, le fa e ka nna kgomo, le fa e le esela, le fa e le sehutshane; a a duele sebedi.

₅“Fa motho a ka tsaya dilo a di jesa tshimo ya mabele, le fa e le ya mafine, fa a golola kgomo ya gagwe, mme e fula mo tshimong ya motho yo mongwe, a a lefe ka tse dintle tsa tshimo ya gagwe ya mabele le fa e le ya mafine.

₆“Fa go thunya molelo, o tshuba matlhaku, mabele a a tlhomilweng dingata gongwe mabele a a sa ntseng a eme, gongwe naga, go jewa ke molelo; ruri yo o tshubileng molelo o, a a lefe.

₇“Fa motho a ka neela mongwe ka ene madi go a boloka, le fa e le thoto, a bo a utswiwa go le mo ntlong ya monna yoo; fa legodu le ka tshwarwa a le duele sebedi. ₈Fa legodu le se ka la tshwarwa, foo mong wa ntlo a atamele kwa baatlhoding, gore go tle go bonwe boo a ga a a tsenya letsogo mo dilwaneng tsa mongwe ka ene.

₉“Gonne sengwe le sengwe sa tshenyo le fa e ka ne e le ka ga kgomo, le fa e le esela, le fa e le sehutshane, le fa e le seaparo, le fa e le ka ga sengwe fela se se latlhegileng, se mongwe o buang ka ga sone a re: ‘Ke sone se,’ kgang ya bone boo babedi e isiwe fa pele ga baatlhodi yo baatlhodi ba mmonang molato a a duele mongwe ka ene ka go le gobedi.

₁₀“Fa monna a ka neela mongwe ka ene esela, le fa e le pelesa, le fa e le sehutshane, le fa e ka ne e le leruo lefe fela, go disiwa; mme e swa gongwe e utlwisiwa botlhoko, gongwe e gapiwa, go sa bone ope: ₁₁Ikano ya ga Jehofa e nne gare ga bone boo babedi, gore go bonwe boo a ga a tsenya letsogo mo dilwaneng tsa mongwe ka ene; mme mong wa selo o tlaa amogela ikano, a se ka a lefa. ₁₂Fa se utswilwe mo go ene a a lefe mong wa sone. ₁₃Fa se gagotswe ke sebatana, a a se lere gore se nne sesupo; a se ka a lefela se se gagotsweng ke sebatana.

₁₄“Fa motho a adima sengwe mo go mongwe ka ene, mme se utlwisiwa botlhoko, gongwe se swa mong wa sone a seyo kwa go sone, ruri a lefe. ₁₅Fa mong wa sone a le kwa go sone, a a se lefe; fa e le se se thapetsweng tuelo, ke gore se ne se tsile go duelelwa.

₁₆“Fa mongwe a fepa kgarebana e e iseng e beelelwe, mme a lala nayo, ruri a a mo ntshetse bogadi gore a nne mosadi wa gagwe. ₁₇Fa rraagwe a ganela ruri go mo mo naya, a a ntshe madi ka fa bogading jwa makgarebane.

₁₈“Mosadi yo o moloi a se leselediwe go tshela.

₁₉“Le fa e le mang yo o lalang le sengwe sa ditshedi, ruri a a bolawe.

₂₀“Yo o isetsang modimo mongwe le fa e ka nna ofe tlhabelo, fa e se Jehofa a le esi, a a senyediwe ruri.

₂₁“Le moeng o se ka wa mo gobetsa, le gone o se mo patike; gonne lona lo ne lo le baeng mo lefatsheng la Egepeto. ₂₂Lo se ka lwa patika mosadi yo o motlholagadi, le fa e le ngwana yo o lesiela. ₂₃E tlaa re fa o ba patika ka gongwe, mme ba nkgoa ka gongwe, ruri ke tlaa utlwa selelo sa bone; ₂₄bogale jwa me jo bogolo bo tlaa tuka, mme ke tlaa lo bolaya ka tšhaka; basadi ba lona ba tlaa nna batlholagadi fela, le bana ba lona ba nne masiela fela.

₂₅“Batho ba me ba ba humanegileng ba o nang nabo, fa o ba adima madi, o se ka wa nna mo go bone jaaka moatisi, le gone lo se ka lwa ba lopa koketso. ₂₆Fa o tsaya seaparo sa mongwe ka wena e le sebeelo, o se mo rebolele letsatsi le ise le phirime. ₂₇Gonne ke sone sosi se o ipipang ka sone, ke seaparo sa letlalo la gagwe; o tlaa robala mo go eng? Mme go tlaa dirala gore e re a ntelela ke utlwe, gonne ke pelotlhomogi.

₂₈“O se ka wa kgala baatlhodi, le fa e le go roga molaodi wa batho ba gago.

₂₉“O se ka wa nyafala mo go iseng tshupelo ga letlotlo la maungo a gago, le ga majalwa a gago. Batsalwapele ba bana ba gago ba basimane o ba nneye. ₃₀Le gone o dire fela jalo ka dikgomo tsa gago, le ka dihutshane tsa gago; matsalwapele a a nne le bommaao ka malatsi a supa; e re ka letsatsi la bofera mebedi, o a nneye.

₃₁“Lo tlaa nna banna ba lo intshepetseng; ke gone ka moo lo sa kakeng lwa a ja nama epe e e gagotsweng ke dibatana kwa nageng; lo e latlhele dintša fela.”