Sefela sa ga Moše
1Foo Moše le bana ba Iseraele ba opelela Jehofa sefela se, ba re:
“Ke tlaa opelela Jehofa
gonne o fentse
ka mo go gakgamatsang.
O latlhetse pitse le mopagami
wa yone mo lewatleng.
2Jehofa ke thata ya me le sefela,
o bile o diregile poloka ya me;
one ke Modimo wa me,
ke tlaa o baka;
Modimo wa ga rre,
ke tlaa o godisa.
3Jehofa ke monna wa ntwa;
Jehofa ke leina la gagwe.
4O thabueditse dikara tsa ga Faro
mo lewatleng le ntwa ya gagwe;
beng ba mephato ba gagwe
ba ba tlhophegileng
ba nwetse mo Lewatleng
le Lehibidu;
5Madiba a a boteng
a ba khurumeditse;
ba thabuegetse mo ditsibeng
jaaka lentswe.
6Jehofa, letsogo la gago le le siameng
le tlotlometse mo thateng,
Jehofa, letsogo la gago le legolo
le tle le rabanye mmaba.
7Mo bogolong jwa borena jwa gago
o ribegetsa ba ba go tsogelang;
o tle o ntshetse
bogale jwa gago kwa ntle,
bo ba laile jaaka dirite.
8Metsi a nna a tlhatlaganngwa
ke pudulo ya dinko tsa gago,
merwalela ya ema e tsepaletse
e le mekoakoa fela;
madiba a a boteng
a gatsela mo pelong ya lewatle.
9Mmaba a re:
‘Ke tlaa ba konatelela
ke ba tshwara,
ke tlaa aba thopo:
thato ya me e tlaa kgora
mo go bone;
ke tlaa somola tšhaka ya me,
seatla sa me se tlaa ba senya.’
10Wa budula ka phefo ya gago
lewatle la ba khurumetsa;
ba nwela jaaka lotwe
mo metsing a a thata e kgolo.
11Jehofa, e mang yo o tshwanang nao
mo medimong?
E mang yo o tshwanang nao,
o le kgalalelo mo boitshepong,
o le poitshego mo dipakong,
o dira dikgakgamatso?
12O otlolotse letsogo la gago le legolo
lefatshe la ba kometsa.
13Ka boutlwelo botlhoko jwa gago
o gogile tšhaba e o e rekolotseng;
o e gogetse kwa bonnong jwa gago
jo bo itshepileng
ka thata ya gago.
14Ditšhaba di utlwile di a roroma;
metlotsedi e tshwere
banni ba Filisitia.
15Foo dikgosana tsa Etome
tsa tseanngwa,
banna ba ba thata ba Moabe
thoromo e ba tshwere;
banni botlhe ba Kanana
ba kaologile.
16Therego ya ba wela le tlakaselo;
ka bogolo jwa letsogo la gago
ba tuuletse fela jaaka lentswe;
go tsamaye tšhaba ya gago Jehofa,
e kgabaganye,
go tsamaye tšhaba e o e rekileng
e kgabaganye.
17O tlaa ba fitlhisa o ba tlhoma
mo thabeng ya boswa jwa gago,
e bong mo felong
fa o go itiretseng
go tla o a ga gone Jehofa,
felo ga boitshepo fa diatla tsa gago
di go tlhomamisitseng,
wena Jehofa.
18Jehofa o tlaa busa
ka bosakhutleng le ka bosaengkae.”
Sefela sa ga Miriame
19Ya re dipitse tsa ga Faro di tsena mo lewatleng le dikara tsa gagwe, di na le bapagami ba dipitse ba gagwe, Jehofa a busetsa metsi a lewatle mo go bone; bana ba Iseraele ba tsamaya lefatshe le le omeletseng fela mo gare ga lewatle. 20Miriame moperofeti wa sesadi, kgaitsadia Arone, a tsaya moropana, le basadi botlhe ba mo sala morago ka meropana le ka dipina.
21Miriame a ba fetola a re:
“Opelelang Jehofa
gonne o fentse
ka mo go gakgamatsang;
o konopetse pitse
le mopagami wa yone
mo lewatleng.”
Metsi a a botlhoko
22Jalo Moše a gogela Iseraele kwa pele, ba tswa Lewatleng le Lehibidu, ba tswela kwa nageng ya Shure; ba tsamaya malatsi a le mararo mo nageng, ba sa bone metsi. 23E rile ba tla mo Mara, ba retelelwa ke go nwa metsi a Mara ka a ne a le botlhoko; leina la gone la bidiwa Mara ka ntlha ya gone moo. 24Batho ba ngongoregela Moše ba re: “Re tlaa nwa eng?” 25A tlhaeleletsa kwa go Jehofa; Jehofa a mo supetsa setlhare, e rile a se latlhela mo metsing, metsi a nna monate fela. A ba tlhomela molao le tao gone foo, a ba leka, 26a re: “Fa o reetsa lentswe la ga Jehofa Modimo wa gago ka tlhoafalo, o ba o dira se se siameng mo matlhong a gagwe, o sekegela ditaolo tsa gagwe tsebe, ga nketla ke go baya bolwetse bope jwa malwetse a ke a beetseng Baegepeto; gonne ke nna Jehofa yo ke go fodisang.”
27Ba fitlha mo Elime kwa go neng go le metswedi e le 12 ya metsi, le ditlhare tsa makolane di le 70 gone; ba thibelela gone fa metsing.
