ESETHERE 6

₁Ya re bosigo joo kgosi ya lala e sa robala; ya laola gore ba lere lokwalo lo lo kwadilweng ditirafalo, mme tsa balwa fa pele ga kgosi. ₂Ga fitlhelwa go kwadilwe go re, Moretekai o ne a bolela ka ga Bigethane le Tereše baopafadiwa ba kgosi ba le babedi, ba bone ba ba lebelang kgoro, fa ba kile ba batla go tsenya kgosi Ahasueruse mabogo.

₃Kgosi ya re: “Ana Moretekai o diretswe tlotlo le bogolwane bofe ka ntlha ya sone seo?” Foo batlhanka ba kgosi ba ba e direlang ba re: “Ga a a direlwa sepe.”

₄Kgosi ya re: “E mang yo o ka fa lwapeng?” Jaana Hamane o ne a tsile mo lwapeng lo lo kwa ntle, lwa ntlo ya kgosi, a tla go bua le kgosi ka ga go pega Moretekai mo sefateng sa polaelo se o se mmaakanyeditseng.

₅Batlhanka ba kgosi ba mo raya ba re: “Bona, Hamane o eme ka fa lwapeng.” Kgosi ya re: “A a tsene.”

₆Jalo Hamane a tsena. Kgosi ya mo raya ya re: “Ana monna yo kgosi e ratang go mo tlotla o ka direlwa eng?” Jaana Hamane a ithaya mo pelong ya gagwe a re: “Ana kgosi e ka bo e rata go tlotla mang bogolo go nna?” ₇Hamane a raya kgosi a re: “Monna yo kgosi e ratang go mo tlotla, ₈a a lerediwe diaparo tsa segosi tse kgosi e ntseng e di apara, le pitse e kgosi e ntseng e e palama, le serwalo sa segosi se se bewang mo tlhogong ya yone; ₉a diaparo tseo le pitse eo di neelwe nngwe ya dikgosana tsa kgosi tse di tlotlegang bogolo, gore ba di apese monna yo kgosi e ratang go mo tlotla, ba mo ralatse mmila wa motse a palame pitse, ba ope mokgosi fa pele ga gagwe, ba re: ‘Go direlwa jaana monna yo kgosi e itumelang go mo tlotla.’ ”

₁₀Foo kgosi ya raya Hamane ya re: “Itlhaganele tlhe, o tseye diaparo le pitse jaaka o buile, o direle jalo Moretekai wa Mojuta yo o dutseng fa kgorong ya kgosi, go se tlhaele sepe sa tsotlhe tse o di buileng.”

₁₁Foo Hamane a tsaya diaparo le pitse, a apesa Moretekai, a mo ralatsa mmila wa motse a palame, a opa mokgosi fa pele ga gagwe, a re: “Go direlwa jalo monna yo kgosi e ratang go mo tlotla.”

₁₂Moretekai a boela gape mo kgorong ya kgosi. Hamane a itlhaganelela kwa ntlong ya gagwe a hutsafetse, tlhogo ya gagwe e khurumeditswe. ₁₃Hamane a kakanyetsa Sereše mosadi wa gagwe le ditsala tsa gagwe tsotlhe fela, sengwe le sengwe se se mo dirafaletseng. Foo matlhale a gagwe le Sereše mosadi wa gagwe ba mo raya ba re: “Fa Moretekai, yo o simolotseng go wa fa pele ga gagwe, e le wa losika lwa Bajuta, ga o ketla o mo fenya, mme ruri o tlaa wa fa pele ga gagwe.”

₁₄Ya re ba sa ntse ba bua nae, baopafadiwi ba kgosi ba tla, ba itlhaganela go isa Hamane modirong o Esethere o ne a o baakantse.