BAEFESO 5

₁Ke gone nnang baetsi ba Modimo, jaaka bana ba ba rategang. ₂Lo sepele mo loratong, fela jaaka Keresete le ene a lo ratile, a intshetsa rona, a nna tshupelo le setlhabelelo Modimo, tse di isediwang go nna lonko lo lo monate. ₃Mme boaka, le maswe otlhe, le fa e le boiphetlho, go se ka ga ba ga umakwa mo go lona, jaaka go tshwanetse baitshepi; ₄le fa e le matlhapa, le fa e le puo ya dinyana, le fa e le dinyao, tse e leng dilo tse di sa tshwanelang; mme bogolo go ntshiwe malebogo. ₅Gonne mo lo a itse ka tlhomamo, fa go se seaka, le fa e le motho yo o maswe, le fa e le moiphetlhi, yo e leng moobamedi wa medimo ya disetwa, yo o ka nnang le boswa bope mo bogosing jwa ga Keresete le Modimo.

₆A motho ope a se ka a lo tsietsa ka mafoko a a lolea fela, gonne bogale jwa Modimo bo tla mo baneng ba ba kgopo ka ntlha ya tsone dilo tseo. ₇Ke gone, lo se ka lwa amogana nabo. ₈Gonne lo kile lwa ne lo le lefifi, mme jaanong lo lesedi mo Moreneng. Sepelang jaaka bana ba lesedi, ₉– gonne loungo lwa lesedi lo eme mo molemong otlhe, le mo tshiamong, le mo boammaaruring – ₁₀lo ntse lo lekela go lemoga se se kgatlhang Morena. ₁₁Lo se ka lwa nna le bolekane le ditiro tsa lefifi tse di se nang loungo, mme bogolo lo di kgalemele. ₁₂Gonne dilo tse di dirwang ke bone mo sephiring, di tlhabisa ditlhong le di bolelwa fela. ₁₃Mme dilo tsotlhe e a re fa di kgalemelwa di tle di senolwe ke lesedi; ka sengwe le sengwe se se senogileng e le lesedi. ₁₄Ke gone, a re: “Kubuga, wena yo o robetseng, o tsoge mo baswing, mme Keresete o tlaa go phatsimela.”

₁₅Ke gone, lo lebe thata ka fa lo sepelang ka teng, e seng jaaka ba ba seng botlhale, mme jaaka ba ba botlhale, ₁₆ka go swela lobaka molemo, ka metlha e, e bosula. ₁₇Ke gone se nneng boeleele, mme lo tlhaloganye go rata ga Morena, gore ke eng. ₁₈Se tagweng ke bojalwa, ka bo na le tlhapeo, lo tladiwe ke Mowa. ₁₉Lo buisanye ka dipesalema, le difela, le dipina tsa semowa, lo bina, lo opela, lo kotekeletsa Morena ka dipelo tsa lona. ₂₀Lo leboge Modimo, e bong Rara, ka metlha yotlhe, ka ga dilo tsotlhe mo ineng la Morena wa rona Jesu Keresete.

₂₁Lo ineelane mo poifong ya ga Keresete.

₂₂Basadi ba lo nyetsweng lo ineeleng mo banneng ba e leng ba lona, jaaka e ka bo e le mo go Morena, ₂₃gonne monna ke tlhogo ya mosadi jaaka Keresete le ene e le tlhogo ya phuthego, ka e bile e le ene mmoloki wa mmele ka esi. ₂₄Jaaka phuthego e ineetse mo go Keresete, a basadi le bone ba nne jalo mo banneng ba bone mo dilong tsotlhe.

₂₅Banna, ratang basadi ba lona, fela jaaka Keresete le ene a ratile phuthego, mme a intshetsa yone, ₂₆gore a e itshepise a sena go e tlhapisa ka tlhapiso ya metsi ka lefoko. ₂₇Gore a tle a ineye phuthego, e le e e galalelang, e e se nang selabe le fa e le khuano, le fa e le sepe se se ka nang jalo; fa e se gore e nne boitshepo le botlhoka bogole. ₂₈Banna le bone ba tshwanetse go rata basadi ba bone fela jalo, jaaka e ka bo e le mebele ya bone. Yo o ratang mosadi wa gagwe o a ithata. ₂₉Gonne ga go ise go ko go nne motho ope yo o kileng a ila nama ya gagwe, mme o a e otla, a e ngomaele, fela jaaka Keresete le ene a direla phuthego, ₃₀ka gobo re ditokololo tsa mmele wa gagwe. ₃₁Ke gone ka moo, monna o tlaa tlogelang rraagwe le mmaagwe, a ngaparela mosadi wa gagwe; mme bobedi jo e tlaa nna nama e le nngwe fela. ₃₂Bosaitsiweng jo, bo bogolo, mme ke bua ka ga Keresete le ka ga phuthego. ₃₃Le fa go ntse jalo le lona a mongwe le mongwe wa lona a rate mosadi wa gagwe fela jaaka a ithata, le mosadi a ipone, gore a tlotle monna wa gagwe.