1“E re fa go tsoga moperofeti mo gare ga gago, le fa e le molori wa ditoro, mme a go naya sesupo kgotsa segakgamatsi, 2mme sesupo kgotsa segakgamatsi seo se dirala, se o buileng nao ka ga sone, a re: ‘A re saleng medimo e sele morago, e o iseng o e itse, a re e direleng’; 3o se ka wa reetsa mafoko a moperofeti yoo, kgotsa molori yoo wa ditoro; gonne Jehofa Modimo wa lona o a lo leka, go itse boo lo rata Jehofa Modimo wa lona ka pelo yotlhe ya lona le ka mowa otlhe wa lona. 4Lo sepele morago ga Jehofa Modimo wa lona, lo boife ene, lo tshegetse ditaolo tsa gagwe, lo ineele go utlwa lentswe la gagwe, lo mo direle, lo mo ngaparele. 5Moperofeti yoo kgotsa molori yoo wa ditoro a bolawe, gonne o buile tsuololelo ka ga Jehofa Modimo wa lona, yo o lo ntshitseng mo lefatsheng la Egepeto, a go rekolola mo ntlong ya botlhanka; gore a go fapose mo tseleng e Jehofa Modimo wa gago o e go laoletseng gore o sepele mo go yone. Jalo o tlaa bo o tlosa bosula mo gare ga gago.
6“Fa morwa rraago, morwa mmaago, kgotsa morwao, kgotsa morwadio, kgotsa mosadi yo o nnang mo sehubeng sa gago, kgotsa tsala ya gago e e ntseng jaaka mowa wa gago, fa a go fepa mo sephiring, a re: ‘A re ye go direla medimo e sele,’ e o iseng o e itse, wena le fa e le borraeno; 7e le ya medimo ya ditšhaba tse di gaufi nao, kgotsa tse di kgakala nao, go tswa sekhutlong sengwe sa lefatshe, go ya sekhutlong se sengwe sa lefatshe, 8o se ka wa mo dumelela le fa e le go mo reetsa; le gone leitlho la gago le se mo utlwele botlhoko, le gone o se mo rekegele, le fa e le go mo loba. 9O mmolaele ruri; letsogo la gago e nne lona la ntlha mo go ene go mmolaya, morago ga moo mabogo a batho botlhe. 10O mo kgobotletse ka maje a swe; gonne o batlile go go kgaoganya le Jehofa Modimo wa gago yo o go ntshitseng mo lefatsheng la Egepeto, mo ntlong ya botlhanka. 11Baiseraele botlhe ba tlaa utlwa ba boifa, ga ba ketla ba tlhola ba dira boikepo jo bo ntseng jalo mo gare ga gago.
12“E re fa o ka utlwa go bolelwa ka ga mongwe wa metse ya ga eno, e Jehofa Modimo wa gago o e go nayang go aga mo go yone, go twe: 13Banna bangwe ba ba diapu ba dule mo gare ga gago, ba okile banni ba motse ka go re: ‘A re yeng go direla medimo e sele,’ e le e lo iseng lo e itse, 14foo o botse, o senke, o botse ka tlhoafalo; mme fa o fitlhela e le boammaaruri, selo seo se le tlhomamo, gore se se makgapha se se ntseng jalo se dirwa mo gare ga gago, 15ruri o kgemethe banni ba motse oo ka bogale jwa tšhaka, o o senyetse ruri, le tsotlhe tse di mo go one, le dikgomo tsa one, ka bogale jwa tšhaka. 16Thopo yotlhe ya one o e phuthele mo mebileng ya one, o fise motse ka molelo, le thopo ya one yotlhe fela, o o fisetse Jehofa Modimo wa gago; mme o tlaa nna mokoa fela ka bosakhutleng; o se ka wa agiwa gope. 17Go se nne sepe sa selo seo se se neeletsweng se se ngaparelang letsogo la gago; gore Jehofa a boe mo kgotelong ya bogale jwa gagwe, a nne boutlwelobotlhoko, a go tlhomogele pelo, a go ntsifatse jaaka a ikanetse borraeno; 18mogang o reetsang lentswe la ga Jehofa Modimo wa gago, go tshegetsa ditaolo tsotlhe tsa gagwe tse ke di go laolelang gompieno, go dira se se siameng mo matlhong a ga Jehofa Modimo wa gago.
