DANIELE 8

₁E rile ka ngwaga wa boraro wa puso ya kgosi Belešasare ga bonala ponatshegelo mo go nna, e bong mo go nna Daniele, morago ga se se bonaletseng mo go nna ga ntlha. ₂Ka leba mo ponatshegelong; mme ga nna jaana: ga re e rile ke bona, ka bo ke le mo Shušane motse wa kgosi, o o mo kgaolong ya Elame ya lefatshe; mme ka bona mo ponatshegelong, ka bo ke le fa nokeng ya Ulai. ₃Foo ka tsholetsa matlho, ka leba, mme bonang, ga bo go eme fa pele ga noka phelefu e e dinaka pedi; dinaka tse pedi tsa bo di le ditelele; mme lo longwe lo feta lo longwe, lo lotelele lwa tswa morago ga lo longwe. ₄Ka bona phelefu e segolela ntlheng ya bophirimatsatsi, le ya botsheka, le ya borwa; mme go ne go se na ditshedi dipe tse di ka emang fa pele ga yone, le gone go no go se na ope yo o ka gololang mo go yone; ya dira se e se ratang, mme ya ikgodisa.

₅Ya re ke sa ntse ke akanya, bonang, ga tswa phoko ntlheng ya bophirimatsatsi ya tla godimo ga lefatshe lotlhe, mme e se ka ya ama lefatshe; phoko eo ya bo e na le lonaka longwe lo lo bonalesegang gare ga matlho a yone. ₆Ya tla mo phelefung e e nang le dinaka tse pedi, e ke e bonyeng e eme fa nokeng, ya tabogela mo go yone ka tšararego yotlhe ya nonofo ya yone. ₇Ka e bona e atamela thata fa phelefung, mme ya bo e tlhotlhelediwa ke bogale ka ga yone, ya segola phelefu, ya roba dinaka tsa yone tsoo pedi; mme go ne go se na thata mo phelefung ya go ema fa pele ga yone; mme ya e digela fa fatshe, ya e gataka; mme go ne go se na ope yo o ka gololang phelefu mo go yone.

₈Phoko ya ikgodisa thata; e rile e le thata, lonaka lo logolo lwa robega; mme mo boemong jwa lone ga tlhoga dinaka di le nne tse di bonalesegang di lebanye le diphefo tsoo nne tsa legodimo. ₉Mo go longwe lwa tsone ga tswa lonakana lo lo golelang thata kwa ntlheng ya borwa, le ntlheng ya botlhabatsatsi, le ntlheng ya lefatshe le lentlentle. ₁₀Mme lwa gola thata, lwa ba lwa fitlha le kwa bontsintsing jwa legodimo; mme dingwe tsa bontsintsi joo le tsa dinaledi ya di latlhela fa fatshe, ya ba ya di gataka. ₁₁Ee, ya ikgodisa ya ba ya fitlha kwa kgosaneng ya bontsintsi; ya e tlosetsa tshupelo ya phiso ya metlha yotlhe, le bonno jwa felo ga yone ga boitshepo jwa digelwa fa fatshe. ₁₂Ya neelwa bontsintsi, le yone tshupelo ya phiso ya metlha yotlhe ya e neelwa ka ntlha ya tlolo; ya digela boammaaruri fa fatshe, ya dira se e se ratang, mme ya tlhogonolofala.

₁₃Foo ka utlwa moitshepi mongwe a bua; moitshepi yo mongwe a raya moitshepi yo o buang, a re: “Ana ponatshegelo ka ga tshupelo ya phiso ya metlha yotlhe, le tlolo e e swafatsang, e tlaa nna ka lobaka lo lo kae, ya felo ga boitshepo le bontsintsi go gatakwa?”

₁₄A nthaya a re: “Ke go ya go fetisa maitsebowa le meso e le 2 300; foo felo ga boitshepo go tlaa ntlafadiwa.”

₁₅Ga dirala, e rile nna Daniele ke sena go bona ponatshegelo, ka leka go se tlhaloganya; mme bonang, ga bo ga eme fa pele ga me e kete ponalo ya monna. ₁₆Ka utlwa lentswe la motho gare ga dimota tsa Ulai le goa, le re: “Gaberiele, tlhaloganyetsa monna yo ponatshegelo.” ₁₇Jalo a atamela fa ke emeng teng; mme ya re a tla, ka boifa, ka wela ka sefatlhogo fa fatshe; mme a nthaya a re: “Morwa motho tlhaloganya; gonne ponatshegelo ke ya lobaka lwa kwa bokhutlong.” ₁₈Jaana ya re a sa ntse a bua le nna, ka thulamela, sefatlhogo sa me se le fa fatshe; mme a nkama, a nkemisa. ₁₉A re: “Bona, ke tlaa go itsise se se tlaa nnang mo lobakeng lwa morago lwa tšhakgalo, gonne ke sa lobaka lo lo laotsweng lwa bokhutlo.

₂₀“Phelefu e o e bonyeng e e dinaka tse pedi, ke dikgosi tsa Media le Peresia. ₂₁Phoko e e maodi, ke kgosi ya Gerika; mme lonaka lo logolo lo lo fa gare ga matlho a yone ke kgosi ya ntlha. ₂₂Ka ga lo lo robegileng, lo dinaka di le nne tse di emeng mo boemong jwa lone, magosi a le mane a tlaa ema a tswa mo morafeng o le mongwe fela, mme e seng ka thata ya yone kgosi eo.

₂₃“E tlaa re mo motlheng wa morago wa bogosi jwa tsone, mogang batlodi ba sena go tlatsa ditlolo, kgosi nngwe e e sefatlhogo se se bogale, e e lepololang dinyoba tse di lefifi, e tlaa ema. ₂₄Nonofo ya yone e tlaa nna kgolo, mme e seng ka nonofo ya yone tota; e tlaa senya kgakgamatso, mme e tlaa tlhogonolofala, e ba e dira se e se ratang; mme e tlaa senya banonofi le batho ba ba itshepileng. ₂₅Boferefere bo tlaa tlhogonolofala mo seatleng sa yone ka botlhale jwa yone; e tlaa ikgodisa mo pelong, e tlaa senya batho ba le bantsi mo go iketleng ga bone, le gone e tlaa tsogela e emalana le kgosana ya dikgosana; mme e tlaa thujwa e seng ka letsogo. ₂₆Ponatshegelo ya maitseboeng le meso e e boletsweng e ammaaruri; mme wena tswalela ponatshegelo, gonne ke ya metlha e le mentsi e e tlang.”

₂₇Mme nna Daniele ka idibala, mme ka bobola malatsi mangwe. Foo ka nanoga, ka dira tiro ya kgosi; mme ka gakgamalela ponatshegelo, mme ga bo go se na ope yo o e tlhaloganyang.