DITIRO 24

₁E rile malatsi a le matlhano a sena go feta, Ananiase moperesiti yo mogolo a tla, a na le bagolwane bangwe, a bile a na le mmueledi mongwe, yo go tweng Teretulo; mme ba bolelela molaodi ka ga Paulo. ₂Ya re a sena go bidiwa, Teretulo a simolola go mmaya molato, a re: “E re ka re bona kagiso e kgolo ka wena kgosi, le dilo tse di bosula di tlosediwa morafe ono ka tlamelo ya gago, ₃re a go amogela ka mekgwa yotlhe le mo mafelong otlhe ka tebogo e kgolo, Felekise Motlotlegi yo mogolo. ₄Mme gore ke se ka ka tlhola ke go lapisa, ka re, ke a go rapela gore o utlwe mafokonyana mangwe a rona, ka bopelonomi jwa gago. ₅Gonne re fitlhetse monna yo e le letshwenyo, le serukhutlhi mo Bajuteng botlhe mo lefatsheng lotlhe, e bile e le tlhogo ya lekoko la Banasaretha; ₆yo o bileng a leka go itshepolola tempele; yo re bileng ra mo tshwara; (mme ra rata re ka bo re mo sekisitse ka fa molaong wa rona. ₇Mme mong wa mephato, e bong Lusiase a tla, a mo phamola ka thata mo diatleng tsa rona. ₈A laola balatofatsi ba gagwe gore ba tle fa pele ga gago;) yo e tlaa reng fa o mo lotolotsa ka wesi, o bo o tlaa tlhaloganya dilo tse tsotlhe tse re mmayang molato ka ga tsone.” ₉Bajuta le bone ba dumalana nae mo mafokong ao, ba tlhomamisa gore dilo tseo di ntse jalo.

₁₀E rile molaodi a sena go mo gwetlha gore a bue, Paulo a fetola a re: “E re ka ke itse fa o ntse o le moatlhodi wa morafe o ka dinyaga di le dintsi, ke a ikarabela ka boitumelo. ₁₁Ka kgosi e ka tlhaloganya ka ga lobaka lo ke simolotseng go ya go obama kwa Jerusalema ka lone, fa letsatsi la gompieno e le la 12 fela. ₁₂Ga ba ise ba bo ba fitlhele ke ganela le ope mo tempeleng, le fa e le go tlhotlheletsa batho mo matlong a dithuto, le fa e le mo motseng. ₁₃Ga ba ka ke ba go tlhomamisetsa dilo tse ba mpayang molato ka ga tsone gompieno. ₁₄Se, ke a se go ipolela, gore, Modimo wa borraetsho, ke o direla ka fa Tseleng e bone ba e bitsang lekoko, ke ntse ke dumela dilo tsotlhe tse di ka fa molaong, le tse di kwadilweng mo baperofeting. ₁₅Ke na le tsholofelo mo Modimong, e le bone ba e lebeletseng, ya gore go tlaa nna tsogo ya basiami le ya basiamolodi. ₁₆Ke bile ke a itlwaetsa, gore ke tle ke nne le pelo e e se nang sekgopi mo Modimong le mo bathong, ka metlha yotlhe.

₁₇“Jaana e rile dinyaga di sena go feta di le dintsi, ka tla ke tsholetse morafe wa gaetsho dikatso le dineo. ₁₈Ya re mo gare ga dilo tse, ba mphitlhela mo tempeleng ke iitshekisitse, ke se mo bontsing, ke bile ke sa tsose modumo, mme ga bo go le Bajuta bangwe ba ba tswang kwa Asia teng, ₁₉ba ba neng ba tshwanetse ya bo ne ne ba le fa pele ga gago fa, gore ba supe molato, fa ba na le sengwe se ba nnyatsang ka sone. ₂₀Le fa e le banna ba, a ba bolele tshiamololo e ba e bonyeng jale, jaaka ke ne ke eme fa pele ga lekgotla, ₂₁fa e se lentswe le le lengwe fela, le ke le buetseng godimo ke eme mo go bone, ka re: ‘Ke sekisiwa fa pele ga lona gompieno ka ga go tsoga ba baswi.’ ”

₂₂Mme Felekise ka a na le kitso e e tletseng, bogolo ka ga Tsela, a ba beisa pelo, a re: “E tlaa re fa Lusiase mong wa mephato a tsile, ke tlaa atlhola kgang ya lona.” ₂₃Mme a laola molaodi wa mophato gore a disiwe, le gore a direlwe ka pelonomi; le gore a se ka a itsa ditsala tsa gagwe go tla go mo direla.

₂₄E rile malatsi mangwe a sena go feta, Felekise a tla a na le Durusila mogatse, yo e leng mosadi wa Sejuta, mme a bitsa Paulo, a mo utlwa ka ga tumelo mo go Keresete Jesu. ₂₅Ya re a ntse a mo ranolela ka ga tshiamo, le boikgapo, le tsheko e e tlang, Felekise a boifa thata, mme a mo fetola a re: “Gompieno o ka tsamaya, mme ke tlaa re fa ke bonye lobaka lo lo siameng ke go bitse.” ₂₆Le gone a solofetse gore o tlaa newa madi ke Paulo; mme a nna a mmitsa gantsi ka ntlha ya gone moo, mme a bua nae.

₂₇E rile dinyaga di le pedi di sena go feta, Porekio Feseto a tsena mo boemong jwa ga Felekise; mme e re ka a ne a rata go kgatlha Bajuta, Felekise a tlogela Paulo a golegilwe.