DITIRO 20

₁E rile magawegawe a sena go khutla, Paulo a bitsa barutwa, a ba laya, a ba sadisa sentle, mme a bolola a ya kwa Maketonia. ₂Ya re a sena go ralala mafatshe ao, le go ba laya thata, a ya a fitlha kwa lefatsheng la Gerika. ₃Ya re a sena go nna dikgwedi di le tharo teng, mme e re ka Bajuta ba mo rera ka ditogamaano, jaaka a tlaa tloga a ya Siria ka sekepe, foo a bona mogopolo o sele wa go boa ka tsela ya Maketonia. ₄Go ya go fitlha kwa Asia, a patwa ke Sopatere wa Berea, morwa Pureho; le Arisetareko le Sekunto e le Bathesalonika; le Gaio wa Derebe, le Timotheo; le Tukiko le Terofimo e le ba Asia. ₅Ba, ba ne ba fetetse kwa pele, mme ba bo ba re letile kwa Teroase, ₆mme ra tswa mo Filipi ka sekepe morago ga malatsi a senkgwe se se sa bedisiwang, ra ya go fitlha kwa go bone kwa Teroase ka go tsamaya malatsi a le matlhano; mme ra tlhola teng malatsi a supa.

₇Ya re ka letsatsi la ntlha la beke, ka re phuthegetse go ngathoganya senkgwe, Paulo a nna a bua nabo, a ikaeletse go tsoga a tsamaya ka moso; a gololela puo ya gagwe go ya bosigogare. ₈Ga bo go le dipone di le dintsi mo ntlong e e fa godimo, e re phuthegetseng mo go yone. ₉Ga bo go dutse mo seiponeng lekau lengwe go twe Eutiko, a fentswe ke boroko jo bogolo; mme ya re ka Paulo a sa ntse a buele pele, ka a fentswe ke boroko, a wela fa fatshe a tswa kwa ntlong ya boraro e e kwa godimo, mme a tsholediwa a sule. ₁₀Mme Paulo a fologa, a mo wela godimo, a mo tlamparela, a re: “Lo se ka lwa tsosa modumo; gonne mowa wa gagwe o mo go ene.” ₁₁Ya re a sena go tlhatloga, mme a ngatlhogantse senkgwe, e bile a jele, a bile a buile nabo ka boleele, bosigo jwa ba jwa tla jwa sa, jalo a tloga a tsamaya. ₁₂Mme ba tlisa mosimane a tshedile, mme ba gomotsega thata.

₁₃Rona, e re ka re ne re fetetse pele kwa sekepeng, ra ya kwa Asoso ka sekepe, re ikaeletse gore re tlaa tsaya Paulo teng; gonne o ne a laotse jalo, ka ene a ikaeletse go tla a potologa le tsela ya lefatshe. ₁₄E rile re rakana nae kwa Asoso, ra mo tsholela mo sekepeng, mme ra ya go fitlha kwa Mitulene. ₁₅Ra tswa foo ka sekepe, mme ka moso ra fitlha bolebana le Kiose; ka moso o mongwe ra ama Samose, ka moso o mongwe gape ra fitlha kwa Mileto. ₁₆Gonne Paulo a ne a laotse gore re fete Efeso ka sekepe, gore a tle a se ka a bona tiego mo lefatsheng la Asia; ka a itlhaganela, e tle e re kgotsa a bone go nna kwa Jerusalema ka tsatsi la Pentekoste, fa go ka nna jalo.

₁₇A le kwa Mileto a roma kwa Efeso, a ya go bitsa bagolwane ba phuthego. ₁₈E rile ba sena go fitlha kwa go ene, a ba raya a re: “Lona ka losi lo a itse ka fa ke ntseng ka nna mo go lona ka teng ka metlha yotlhe, go simolola ka letsatsi la ntlha le ke gorogileng ka lone mo lefatsheng la Asia. ₁₉Ke direla Morena ka boikokobetso jotlhe jwa pelo, le ka dikeledi, le ka diteko tse di nkwetseng ka ditogamaano tsa Bajuta; ₂₀ka fa ke se kang ka boifa ka teng go lo bolelela sengwe le sengwe se se molemo, ke ruta mo ponong, le ka go nna ke tsamaya le matlo. ₂₁Ke supetsa Bajuta le Bagerika tlhabologelo Modimong, le tumelo mo go Morena wa rona Jesu Keresete. ₂₂Jaana bonang, ke etela kwa Jerusalema, ke pitlaganye mo moweng, ke sa itse dilo tse di tlaa nkwelang teng; ₂₃fa e se gore, Mowa o o Boitshepo o nkaela mo motseng mongwe le mongwe gore dikgole le dipitlagano di ntuletse. ₂₄Mme botshelo jwa me ga ke bo kaye sepe, gore e kete ke bo rata thata, e le gore ke tle ke wetse sebaka sa me sa tshiamelo, le tirelo e ke e amogetseng mo go Morena Jesu, ya go supa Mafoko a a Molemo a tshegofatsho ya Modimo.

₂₅“Jaana bonang, ke a itse gore lona lotlhe ba ke ntseng ka nna ka tsamaya mo go lona ke rera bogosi, ga lo ketla lo tlhola lo bona sefatlhogo sa me gope. ₂₆Ke gone, ke supa mo go lona gompieno ka ga batho botlhe, fa ke se na molato mo mading a bone. ₂₇Gonne ga ke a ka ka boifa go lo bolelela kgakololo yotlhe ya Modimo. ₂₈Lo itise, lo bo lo dise letsomane lotlhe, le Mowa o o Boitshepo o lo dirileng baokami ba lone, gore lo otle phuthego ya Modimo e o e rekileng ka madi a one. ₂₉Ke a itse fa e tlaa re ke sena go tsamaya, go tlaa tsena mo go lona diphiri tse di setlhogo, tse di sa rekegeleng letsomane; ₃₀le mo go lona ka losi, go tlaa tsoga banna ba ba buang dilo tse di sokameng, go tla ba itshadisa barutwa morago. ₃₁Ke gone disang, lo ntse lo gakologelwa fa e kile ya re ka lobaka lwa dinyaga di le tharo, ka nna ka lo gakolola lotlhe ka dikeledi, bosigo le motshegare.

₃₂“Jaana ke lo neela Modimo, ke lo neela lefoko la tshegofatso ya one, le le nonofileng go lo agelela, le go lo naya boswa mo go botlhe ba ba itshepisitsweng. ₃₃Ga ke a ka ka eletsa selefera sa ope, le fa e le gouta, le fa e le diaparo. ₃₄Lona ka losi lo a itse fa diatla tse di diretse go tlhoka ga me, le go tlhoka ga ba ke ne ke na nabo. ₃₅Ka lo beela sekao mo dilong tsotlhe, sa ka fa lo tshwanetseng go thusa ba ba bokoa ka teng, ka go dira mo go ntseng jalo, le go gakologelwa mafoko a Morena Jesu, ka fa ene ka esi o buileng ka teng a re: ‘Ga aba go lesego bogolo go go amogela.’ ”

₃₆E rile a sena go bua jalo, a khubama, a rapela nabo botlhe. ₃₇Mme ba lela botlhe mo go botlhoko, ba wela mo thamong ya ga Paulo, ba mo atla. ₃₈Ba hutsafadiwa bogolo ke lefoko le o le buileng a re, ga ba ketla ba tlhola ba mmona sefatlhogo gope. Mme ba mmuledisa ba mo fitlhisa kwa sekepeng.