DITIRO 18

₁Morago ga dilo tse Paulo a tswa mo Athene, a ya a fitlha kwa Korinthe. ₂A fitlhela Mojuta mongwe, yo go tweng Akwila, e le motho wa kwa Ponto ka fa losikeng, yo e leng gone o tswang kwa Itale, a na le Perisila mosadi wa gagwe, ka gobo Kelaudio a ne a laotse gore Bajuta botlhe ba tswe mo Roma; mme Paulo a ya kwa go bone; ₃ya re ka a le tiro nngwe fela nabo, a nna nabo, mme ba dira, gonne e ne e le badiri ba megope ya dikhai. ₄Ka Sabata mongwe le mongwe, a fetolana le batho mo ntlong ya thuto, a leka go kgona Bajuta le Bagerika.

₅E rile Silase le Timotheo ba tswa kwa Maketonia, Paulo a patelelwa ke lefoko, a supetsa Bajuta fa Jesu e le ene Keresete. ₆Mme ya re ba ikganetsa, ba kgala, a ikudubatsa kobo, a ba raya a re: “A madi a lona a nne mo ditlhogong tsa lona! Nna ke tlhapile, jaanong ke tloga ke ya kwa go Baditšhaba.” ₇A tswa teng, a ya mo ntlong ya monna mongwe go twe Tito Juseto, e le motho yo o obamelang Modimo, yo ntlo ya gagwe e tshwaraganyeng le ntlo ya thuto. ₈Mme Kerisepo, molaodi wa ntlo ya thuto, a dumela mo Moreneng, le botlhe ba ntlo ya gagwe; le Bakorinthe ba le bantsi, ya re ba utlwa, ba dumela, mme ba kolobediwa.

₉Morena a bua le Paulo bosigo ka ponatshegelo a re: “O se ka wa boifa, bua fela, o se ka wa didimala; ₁₀gonne ke na nao, ga go ope yo o tlaa go tlhaselang go go utlwisa botlhoko; gonne ke na le batho ba le bantsi mo motseng o.” ₁₁A nna teng ngwaga le dikgwedi di le thataro, a ba ruta lefoko la Modimo.

₁₂E rile Galio a le molaodisiwa wa Akaia, Bajuta ba tsogologela Paulo gongwe, ba mo isa kwa sennong sa tshekelo, ₁₃ba re: “Monna yo, o khukhela batho gore ba obamele Modimo ka fa mokgweng o o tlhabanang le molao.”

₁₄Mme ya re Paulo a itlhoma gore o a bua, Galio a raya Bajuta a re: “Bajuta ke lona, le gale fa e ka bo e le sengwe sa molato, le fa e le sa bolotsana, ke ne ke ka fitlhela ke tshwanetse go iphapaanya le lona; ₁₅mme fa e le dikgang tsa mafoko le maina le molao o e leng wa lona ka losi, a go iponele lona koo; nna ga ke na go nna moatlhodi wa dilo tseo.” ₁₆Mme a ba leleka mo tshekelong. ₁₇Botlhe ba tshwara Sosethenese, molaodi wa ntlo ya thuto, ba mmeletsa fa pele ga senno sa tshekelo. Mme Galio a se ka a re sepe ka dilo tse.

₁₈Paulo, o rile a sena go tlhola malatsi a le mantsi morago ga dilo tse, a sadisa bakaulengwe sentle, a tswa teng ka sekepe, a ya kwa Siria, a na le Perisila le Akwila; a bile a ipeotse tlhogo mo Kenkerea; gonne o ne a na le ikano. ₁₉Ba fitlha kwa Efeso, mme a ba tlogela teng; ene a tsena mo ntlong ya thuto, a nna a fetolana le Bajuta. ₂₀Ya re ba mo lopa gore a name a sa ntse nabo, a se ka a dumela; ₂₁mme ya re a sena go ba sadisa sentle, a tswa mo Efeso ka sekepe, a ba reile a re: “Fa e le go rata ga Modimo, ke tlaa ba ke boela kwano go lona.”

₂₂O rile kwa Kaesarea a tswa mo sekepeng a tlhatloga a ya go dumedisa phuthego, mme a itse go fologela kwa Antioke. ₂₃E rile a sena go fetisa lobaka teng, a tloga a tsamaya, a ya a ralala lefatshe la Galatia le la Ferugia ka thulaganyo, a kgothatsa barutwa botlhe.

₂₄Jaana Mojuta mongwe a tla mo Efeso, yo go tweng Apolose, e le Moalekesanteria ka fa botsalong, e le motho yo o seleta mo puong; a bile a nonofile mo dikwalong. ₂₅Monna yo, o kile a nna a rutwa mo tseleng ya Morena; mme ka a ne a le motho yo o mowa o tlhoafetseng, a bua a ba a ruta batho dilo tse e leng ka ga Jesu ka kelelelo, a itse kolobetso ya ga Johane e le yosi fela. ₂₆A simolola go bua ka pelokgale mo ntlong ya thuto. Ya re Perisila le Akwila ba mo utlwa, ba mo itseela kwa ga bone, ba mo phuthololela tsela ya Modimo ka kelelelo bogolo. ₂₇O rile a na le keletso ya go tlolaganyetsa kwa Akaia, bakaulengwe ba mo nametsa pelo, ba ba ba kwalela barutwa, gore ba mo tshole sentle; ya re a fitlha a thusa thata ba ba dumetseng ka tshegofatso; ₂₈gonne a ganetsa Bajuta, a ba sita thata, e bile e le mo ponatshegong, a supa ka dikwalo fa Jesu e le ene Keresete.