DITIRO 15

₁Banna bangwe ba fologa kwa Jutea, ba fitlha ba ruta bakaulengwe, ba re: “Fa lo sa rupa ka fa mokgweng wa ga Moše, ga lo ka ke lwa bolokwa.” ₂E rile Paulo le Barenabase ba ganela, ba botsanya nabo thata, bakaulengwe ba laola gore Paulo le Barenabase, le ba bangwe ba bone, ba tlhatlogele kwa Jerusalema kwa baaposetoleng le kwa bagolwaneng ka ga kgang e.

₃Ba buledisiwa ke phuthego; ba feta ba ralala Finikia le Samaria, ba eta ba bolela tlhabologo ya Baditšhaba; ba itumedisa bakaulengwe botlhe ka boitumelo jo bogolo. ₄Ya re ba sena go fitlha mo Jerusalema, ba tsholwa ke phuthego le baaposetole le bagolwane, ba bolela dilo tsotlhe tse Modimo o di dirileng nabo. ₅Mme ga tsoga bangwe ba lekoko la Bafarisai ba ba dumelang, ba re: “Ke tshwanelo go ba rupisa, le go ba laya gore ba tshegetse molao wa ga Moše.”

₆Baaposetole le bagolwane ba phuthegela kgang e go e bua. ₇E rile go sena go dirala kgang e kgolo, Petere a ema, a ba raya a re: “Bakaulengwe, lo a itse ka fa e rileng mo motlheng ole Modimo wa itebalebela mo go lona ka teng, gore Baditšhaba ba utlwe lefoko la Mafoko a a Molemo ka molomo wa me, mme ba dumele. ₈Modimo o o itseng pelo ya motho, wa supa ka ga bone ka go ba naya Mowa o o Boitshepo, fela jaaka o o neile rona; ₉mme ga o a ka wa farologanya mo go rona le bone, mme wa ntlafatsa dipelo tsa bone ka tumelo. ₁₀Ke gone, lo lekelang Modimo, fa e bo ne ne lo baya mo thamong tsa barutwa jokwe e e reteletseng borraetsho le rona go e rwala? ₁₁Re a dumela fa re tlaa bolokwa ka tshegofatso ya Morena Jesu, fela jaaka bone.”

₁₂Mme batho ba bantsi botlhe ba didimala; ba reetsa Barenabase le Paulo ka ba bolela ditshupo le dikgakgamatso tse Modimo o di dirileng mo go Baditšhaba ka bone. ₁₃E rile ba sena go khutla go bua, Jakobe a fetola a re: “Bakaulengwe, ntheetsang: ₁₄Simone o boletse ka fa e rileng pele Modimo wa lekola Baditšhaba ka teng, gore o tlhaolele leina la one batho mo go bone. ₁₅Le mafoko a baperofeti a dumalanye le gone; jaaka go kwadilwe ga twe:

₁₉“Ke gone, katlholo ya me ke e, ka re: A re se tshwenyeng ba ba tswang mo go Baditšhaba ba sokologela mo Modimong; ₂₀mme a re ba kwaleleng, gore ba ithibe mo go tse di leswefatsang tsa medimo ya disetwa, le mo boakeng, le mo go se se betilweng, le mo mading a dilo tse di tlhabilweng. ₂₁Gonne e sa le ka metlha ya bogologolo, Moše o ntse a na le ba ba mo rerang gale mo motseng mongwe le mongwe, ka a balwa mo matlong a thuto ka boSabata botlhe fela.”

₂₂Foo baaposetole le bagolwane, ba na le phuthego yotlhe, ba fitlhela go ka nna molemo go itshenkela banna bangwe ba lesomo la bone, le go ba roma kwa Antioke, ba ya le Paulo le Barenabase; e bong Jutase, yo o bidiwang Baresabase, le Silase, e le batho ba bagolo mo bakaulengweng. ₂₃Mme ba kwala ka bone jaana, ba re: “Baaposetole le bakaulengwe ba bagolwane ba dumedisa bakaulengwe ba bone ba Baditšhaba, ba ba kwa Antioke le kwa Siria, le kwa Kilikia; ra re: ₂₄E re ka re utlwile fa bangwe ba ba duleng mo go rona, ba lo tshwentse ka mafoko, ba fudua mewa ya lona; mme e le ba re sa ba nayang taolo epe; ₂₅e re ka re dumalanye, re fitlhetse go ka nna molemo go itshenkela banna bangwe, le go ba roma kwa go lona, ba ya le Barenabase le Paulo, baratwa ba rona, ₂₆e le banna ba ba beetseng leina la Morena Jesu Keresete matshelo a bone. ₂₇Ra re, re romile Jutase le Silase, ba le bone ba tlaa lo bolelelang dilo tse, ka puo ya molomo. ₂₈Gonne, go le Mowa o o Boitshepo, go le rona, re fitlhetse go le molemo gore re se ka ra lo baya morwalo ope go fetisa dilo tse di tshwanetseng tse; ₂₉e bong gore lo ithibe mo dilong tse di isediwang medimo ya disetwa ditlhabelo, le mo mading a dilo tse di tlhabilweng, le mo dilong tse di betilweng, le mo boakeng; tse e tlaa reng fa lo ithibile mo go tsone, go bo go tlaa nna molemo mo go lona. Dumelang.”

₃₀Jalo e rile ba sena go newa tsela, ba ya ba fitlha kwa Antioke; mme ya re ba sena go phutha batho ba le bantsi, ba ba naya lokwalo. ₃₁Ya re ba sena go lo bala, ba itumelela kgomotso. ₃₂Jutase le Silase, ka le bone e le baperofeti, ba laya bakaulengwe ka mafoko a le mantsi, ba ba nitamisa. ₃₃E rile ba sena go fetisa lobaka teng, ba newa tsela ka kagiso go tswa mo bakaulengweng, le go boela kwa go ba ba ba romileng. ( ₃₄Mme ga kgatlha Silase go nna teng.)

₃₅Paulo le Barenabase ba diega mo Antioke, ba ruta, ba rera lefoko la Morena, ba na le ba bangwe ba le bantsi.

₃₆E rile malatsi mangwe a sena go feta, Paulo a raya Barenabase a re: “Jaanong a re boe, re ye go tlhola bakaulengwe mo motseng mongwe le mongwe o re boletseng lefoko la Morena mo go one, re bone ka fa ba tshelang ka teng.” ₃₇Mme Barenabase a bo a rata gore le ene Johane, yo o bidiwang Mareko, a ye nabo. ₃₈Mme Paulo a se ka a fitlhela go ka nna molemo fa ba ka ya le motho yo o ikgaogantseng nabo kwa Pamfilia, mme a se ka a ya nabo tirong. ₃₉Mme ga tsoga kgang e e botlhoko, ba ba ba tla ba kgaogana; Barenabase a tsaya Mareko, a ya kwa Kupero ka sekepe; ₄₀mme Paulo a tsaya Silase, a bolola, bakaulengwe ba sena go mo rapelela tshegofatso ya Morena. ₄₁A ya a ralala Siria le Kilikia, a ntse a nitamisa diphuthego.