2 SAMUELE 5

₁Foo ga tla ditso tsotlhe tsa Iseraele kwa go Dafite kwa Heberone, tsa bua tsa re: “Bona, re lesapo la gago le nama ya gago. ₂E rile mo metlheng e e fetileng, Saule a sa le kgosi ya rona, e ne e le wena yo o bolotsang o ba o gorosa Baiseraele; Jehofa a go raya a re: ‘O tlaa otla tšhaba ya me Iseraele, o tlaa nna kgosana ya Iseraele.’ ” ₃Jalo bagolwane botlhe ba Iseraele ba tla kgosing kwa Heberone; mme kgosi Dafite a dira kgolagano nabo mo Heberone fa pele ga Jehofa; mme ba tlotsa Dafite, gore a nne kgosi ya Iseraele. ₄E rile Dafite a simolola go busa a bo a le dinyaga di le 30, mme a busa ka dinyaga di le 40. ₅Ya re mo Heberone a busa Bajuta ka dinyaga di supa le dikgwedi di le thataro; mo Jerusalema a busa Baiseraele botlhe le Bajuta ka dinyaga di le 33.

₆Kgosi le batho ba yone ba ya Jerusalema ba ya go tlhasela Bajebuse, banni ba lefatshe; ba ba kileng ba bua le Dafite ba re: “Fa o sa tlose difofu le batlhotsi, ga o ketla o tsena mono;” ba bo ba ithaya ba re: “Dafite ga a ka ke a tsena.” ₇Le fa go ntse jalo Dafite a gapa kago e e thata ya Sione; oo ke one motse wa ga Dafite.

₈Mme Dafite a bua ka tsatsi leo, a re: “Le fa e le mang yo o kgemethang Bajebuse, a a tlhatlogele kwa moeding wa metsi, mme a kgemethe batlhotsi le difofu, e le ba ba ilwang ke mowa wa ga Dafite.” Ke gone ka moo go tleng go twe: “Go na le difofu le batlhotsi gone; ga a ka ke a tsena mo ntlong.”

₉Dafite a aga mo kagong e e thata eo, mme a e bitsa Motse wa ga Dafite. Dafite a aga motse mo tikologong ya gone go tswa Milo le go ya kwa teng. ₁₀Dafite a gola bogolo bogolo; gonne Jehofa Modimo wa masomosomo a bo a na nae.

₁₁Hirame kgosi ya Tura a roma batho kwa go Dafite, a isa ditlhare tsa masetara, le babetli ba dikgong, le baagi; mme ba agela Dafite ntlo. ₁₂Dafite a lemoga fa Jehofa a mo tlhomamisitse go nna kgosi ya Iseraele le go re, o goleditse bogosi jwa gagwe ka ntlha ya Baiseraele, tšhaba ya gagwe.

₁₃Dafite a fela a tsaya bagadingwana ba bangwe le basadi mo Jerusalema, a sena go tswa kwa Heberone; Dafite a fela a bona bana ba basimane le ba basetsana. ₁₄Maina a ba o ba bonyeng mo Jerusalema ke a: Shamua, Shobabe, Nathane le Solomone. ₁₅Le Ibehare, Elišua; le Nefege, le Jafie; ₁₆le Elišama, le Eliata, le Elifelete.

₁₇E rile Bafilisitia ba utlwa fa ba tloditse Dafite go nna kgosi ya Baiseraele, Bafilisitia botlhe ba ya go batla Dafite; mme Dafite a utlwa, mme a fologela kwa kagong e e thata. ₁₈Jaana Bafilisitia ba ne ba tsile, mme ba ikanamisa mo molapong wa Refaime. ₁₉Dafite a botsa Jehofa a re: “A ke ke bololele Bafilisitia? A o tlaa ba tsenya mo seatleng sa me?” Jehofa a raya Dafite a re: “Bolola; gonne ruri ke tlaa tsenya Bafilisitia mo seatleng sa gago.”

₂₀Dafite a tla mo Baale-perasime, Dafite a ba kgemetha gone; mme a re: “Jehofa o phomegeletse baba ba me fa pele ga me, jaaka go phomegela ga metsi.” Ke gone ka moo a raya felo foo leina a re, Baale-perasime. ₂₁Mme ba tlogela ditshwantsho tsa bone tsa medimo gone, mme Dafite le banna ba gagwe ba di tsaya.

₂₂Bafilisitia ba tla gape, ba ikanamisa mo molapong wa Refaime. ₂₃E rile Dafite a botsa mo go Jehofa, a re: “O se ka wa bolola; o ba dike morago, o tle mo go bone bolebagana le ditlhare tsa mamulubere. ₂₄Go tlaa dirala e tlaa re o utlwa mosumo wa motsamao mo godimo ga ditlhare tsa mamulubere, foo o itshikinye; gonne e tlaa bo e le gone Jehofa o yang fa pele ga gago a ya go kgemetha ntwa ya Bafilisitia.” ₂₅Dafite a dira jalo, jaaka Jehofa a mo laotse; mme a kgemetha Bafilisitia go tswa Geba go tsamaya o fitlha mo Gesere.