2 DIKGOSI 25

₁Ga dirala e rile ka ngwaga wa 9 wa puso ya gagwe, ka kgwedi ya lesome, ka tsatsi la lesome la kgwedi, Nebukatenesare kgosi ya Babilone a tla Jerusalema, ene le ntwa yotlhe ya gagwe, a fitlha a thibelela fa pele ga one; ba aga dikago tsa tlhabanelo mo tikologong ya one. ₂Motse wa tlhaselwa go ya go fitlha mo ngwageng wa 11 wa ga Setekia. ₃E rile ka letsatsi le le ferang o le mongwe la kgwedi ya bone mmopamo wa bo o le botlhoko mo motseng, dijo tsa ba tsa tlhokafalela batho ba lefatshe. ₄Foo ga dirwa phatlha mo motseng, mme batlhabani botlhe ba tshaba go le bosigo, ba tsaya tsela ya kgoro e e fa gare ga dithako tse pedi, e e fa tshimong ya kgosi; Bakalatea ba bo ba dikanyeditse motse ka ntlha tsotlhe; kgosi ya tsaya tsela ya Araba. ₅Ntwa ya Bakalatea ya konatelela kgosi, ya mo tshwarela mo dipaleng tsa Jeriko; ntwa yotlhe ya yone ya e falalela. ₆Foo ba tshwara kgosi, ba e isa kwa kgosing ya Babilone kwa Ribela; mme ba atlhola ka ga gagwe. ₇Ba bolaya bomorwa Setekia fa pele ga matlho a gagwe, ba gonya matlho a ga Setekia ba mo golega ka diketane ba mo isa kwa Babilone.

₈Jaana e rile ka kgwedi ya botlhano, ka letsatsi la bosupa la kgwedi, ka o e leng ngwaga wa 19 wa kgosi Nebukatenesare kgosi ya Babilone, Nebusaratane molaodi wa bahemedi, motlhanka mongwe wa kgosi ya Babilone, a tla Jerusalema. ₉A fisa ntlo ya ga Jehofa, le ntlo ya kgosi; le matlo otlhe a Jerusalema; e bong matlo otlhe a matona a a fisa ka molelo. ₁₀Botlhe ba ntwa ya Bakalatea ba ba nang le molaodi wa bahemedi, ba thubaka dithako tsa Jerusalema mo tikologong. ₁₁Masalela a batho ba ba neng ba setse mo motseng, le bone ba ba thobileng ba thobetse kwa kgosing ya Babilone, le masalela a bontsi jwa batho, Nebusaratane molaodi wa bahemedi a ba tlosa ba golegilwe. ₁₂Molaodi wa bahemedi a tlogela bahumanegi ba lefatshe gore ba nne babaakanyi ba mafine le balemi.

₁₃Maotwana a kgotlho a a ne a le mo ntlong ya ga Jehofa, le ditlhomo le lewatle la kgotlho, tse di ne di le mo ntlong ya ga Jehofa, Bakalatea ba di thubaganya, ba isa kgotlho ya tsone kwa Babilone. ₁₄Le dipitsa, le diolamolora, le dipoma tsa dipone, le dintshwana, le dilwana tsotlhe tsa kgotlho tse go ne go direlwa ka tsone, ba tsamaya ka tsone. ₁₅Le ditshola molelo, le megotšana; se e leng sa gouta e le gouta, le se e leng sa selefera e le selefera, molaodi wa bahemedi a tsamaya ka tsone jalo. ₁₆Maotwana a mabedi, lewatle le lengwe fela, le ditlhomo tse Solomone o ne a di diretse ntlo ya ga Jehofa; kgotlho ya dilwana tse tsotlhe e ne e se na palo ya bokete. ₁₇Bogodimo jwa lekotwana le le lengwe e ne e le selekanyo sa mabogo a le 18, mme le na le tlhogo ya kgotlho; bogodimo jwa tlhogo e le mabogo a le mararo; tlhogo e na le tiro e e selotloa, le digaranata mo tikologong ya yone, e le ya kgotlho yotlhe; le lekotwana la babedi le na le dilo tse di tshwanang le tse, le tiro e e selotloa.

₁₈Molaodi wa bahemedi a tsaya Seraia moperesiti yo mogolo, le Sefania moperesiti wa bobedi, le balebedi ba bararo ba kgoro; ₁₉mme mo motseng a tsaya moopafadiwi mongwe yo o ne a laodisitswe batlhabani; le banna ba le batlhano mo go bone ba ba neng ba leba sefatlhogo sa kgosi, ba ba fitlhetsweng mo motseng; le mokwaledi, e bong molaodi wa ntwa yo o ne a tle a phuthe batho ba lefatshe; le banna ba le 60 ba batho ba lefatshe ba ba fitlhetsweng mo motseng. ₂₀Nebusaratane a ba tsaya, a ba isa kwa kgosing ya Babilone kwa Ribela. ₂₁Kgosi ya Babilone ya ba kgemetha, ya ba bolaela mo Ribela mo lefatsheng la Hamathe. Jalo Bajuta ba ntshiwa mo lefatsheng ba tlosiwa ba golegilwe.

₂₂Ka ga batho ba ba setseng mo lefatsheng la Juta, ba Nebukatenesare kgosi ya Babilone o ba tlogetseng, a dira Getalia morwa Ahikame, morwa Shafane, molaodi wa bone. ₂₃Jaana e rile balaodi botlhe ba mephato, bone le batho ba bone, ba utlwa fa kgosi ya Babilone e dirile Getalia molaodi, ba ya kwa go Getalia kwa Misepa, e bong Išemaele morwa Nethania, le Johanane morwa Karia, le Seraia morwa Tanahumethe wa Monetofatha, le Jaasania morwa motho wa Maakathe, bone le batho ba bone. ₂₄Getalia a ba ikanela le batho ba bone, a ba raya a re: “Lo se ka lwa boifa ka ntlha ya batlhanka ba Bakalatea; lo nne mo lefatsheng, lo direle kgosi ya Babilone, mme go tlaa nna molemo mo go lona.”

₂₅Mme ya re ka kgwedi ya bosupa, Išemaele morwa Nethania, morwa Elešame, wa losika lwa segosi, a tla, a na le banna ba le some, mme a itaya Getalia a swa, le Bajuta le Bakalatea ba o nang nabo mo Misepa. ₂₆Mme batho botlhe, bannye le bagolo, le balaodi ba mephato, ba nanoga ba ya Egepeto; gonne ba boifa Bakalatea.

₂₇Ka ngwaga wa 37 wa botshwaro jwa ga Jehoiakine kgosi ya Juta, ka kgwedi ya 12, ka letsatsi la 27 la kgwedi, Efile-merotake, kgosi ya Babilone, ka ngwaga o o simolotseng go busa ka one, a tsholetsa tlhogo ya ga Jehoiakine kgosi ya Juta, a mo ntsha mo tlong ya kgolegelo. ₂₈A bua nae ka pelonomi, a tlhoma setulo sa gagwe sa bogosi godimo ga ditulo tsa dikgosi tse di nang nae mo Babilone. ₂₉A mo apola diaparo tsa gagwe tsa ntlo ya kgolegelo, mme a jela dijo fa pele ga gagwe ka gale ka malatsi otlhe a botshelo jwa gagwe. ₃₀Mme ka ga kabelo, ga nna kabelo e o e newang ke kgosi ka gale le ka gale, ka malatsi otlhe a botshelo jwa gagwe.