II JOHANE 1

₁Ke nna mogolwane, ke kwalela mohumagadi wa moitshenkedwi, le bana ba gagwe ba ke ba ratang ruri: mme e seng nna nosi, mme le botlhe ba ba itseng boammaaruri; ₂ka ntlha ya jone boammaaruri jo bo nnetseng ruri mo go rona, bo tlaa nnela ruri le rona ka bosakhutleng.

₃Ka re, tshegofatso e tlaa nna le rona, le boutlwelobotlhoko, le kagiso, e le tse di tswang mo Modimong Rara, le mo go Jesu Keresete, Morwa Rara, mo boammaaruring le mo loratong.

₄Ke itumela thata ka ke fitlhetse bangwe ba bana ba gago ba tsamaya mo boammaruring, fela jaaka re amogetse taolo mo go Rara. ₅Mme jaana ke a go rapela, mohumagadi, e seng jaaka e kete ke go kwalela taolo nngwe e ntšha, fa e se e re ntseng re na nayo le mo tshimologong, ya gore re ratane. ₆Lo ke lone lorato, gore re ke re tsamaye ka fa ditaolong tsa one. E ke yone taolo, fela jaaka lo ntse lwa nna lwa utlwa le mo tshimologong, gore lo ke lo tsamaye mo go one.

₇Gonne batsietsi ba le bantsi ba tswetse mo lefatsheng, e bong bone ba ba sa ipoleleng fa Jesu Keresete a tsile mo nameng. Motsietsi ke ene yoo, le moganetsa Keresete. ₈Lo ipone, gore lo se ka lwa latlhegelwa ke dilo tse re di dirileng, fa e se gore lo tle lo amogele tuelo e e tletseng.

₉Le fa e le mang yo o tlolelang pele, a sa nnele ruri mo thutong ya ga Keresete, ga a na Modimo; yo o nnelang ruri mo thutong eo, ke ene yo o nang le Rara le Morwawe. ₁₀Fa mongwe a tla mo go lona, a sa tle le thuto e, lo se ka lwa mo tsholela mo ntlong ya lona, le gone lo se ka lwa mo dumedisa; ₁₁gonne yo o mo dumedisang o tlhakanetse nae ditiro tsa gagwe tse di bosula.

₁₂E re ka ke na le dilo di le dintsi go di lo kwalela, ke ne ke sa rate go di kwala ka pampiri le enke; ke solofetse gore ke tlaa fitlha koo go lona, le gore re tlaa bua re lebanye, gore boitumelo jwa lona bo tle bo dirale.

₁₃Bana ba ga monnao wa moitshenkedwi, ba a go dumedisa.